زۆرن مرۆڤە بوێر و نەبەزەکان لە تاقیکردنەوەکانی ژیانا زۆرجار کەوتونەتە هەلومەرجێکەوە کە شکستی و داڕمان ڕویتێکردون، داڕمانێك کە هیوای هەستانەوە و دوبارە و چەندبارە لەسەر پێی خۆ وەستانەوەی  گەلێك زەحمەت و لەبەرچاوی زۆر لە دەوروبەر مەحاڵ بوە. خۆشبەختانە هەمیشە باوەر بە خۆ و باوەر بە بەهای خۆ و  و هاندان و پشتیوانی مرۆڤەکانی دەوروبەر ئەگەرچی وەکو کەسێکی ئاوبردو دەستیان بە پوشێکیشەوە گرتبێت بێهیوایی بەسەریاندا زاڵ نەبووە. زۆرن ئەو مرۆڤانەی  لە ناوەندی نەهامەتیەکانا ریالیستانەو هەنگاو بە هەنگاو  هەستاونەتەوە و خەیاڵ بافیان نەکردووە و بەردی زلیان هەڵنەگرتووە کە نیشانەی نەهاویشتن بێت.

بە پێچەوانەی مرۆڤ گەرلێکی ئاوا، بەڕێز زاهیر باهیر وەکو هەڵگری بیری ئەنارشیزم کە لەخەون و خەیاڵبافی نەبونی دەسەڵات و دەوڵەت و یاسا و ڕێسا و ...هتد دایە  لە ووتارێکیدا بە ناوی (کۆنگرەی ژینگە و دیموکراتی و بەرکوڵێک ) لە هەوڵی ئەوەدایە هەموان ئاوا دەستەوەستان خەو ببینین و بەرامبەر هەر جموجوڵێکی دڵسۆزان و بوێران  ڕەشبین بین و لەگەڵ دەرکەوتنیان نەك تەنها ڕەشبین بین بەرامبەریان بەڵکو چەندین تۆمەتی ناڕەوا و بێبنەمایان بخەینەپاڵ و لە هەوڵی ئەوەدا بین ناهۆشیارانە هاوکاری دەسەڵاتە دز و جەردە و خیانەتکارەکەی هەرێم  بیانخەینە ژێر نەفرەتی خەڵك و لەیەکەمین هەوڵ و هەنگاویان لە کار بخرێن. بەداخەوە وەك لە تێڕوانینەکانیا دەبینرێت  دەیەوێت هەمو جموجۆڵێکی دەنگی ئازاد و گۆڕانخواز بە مانای گۆرانخوازی نەك (نەوشیروانی) لە تاریکی و بێهیواییدا بهێڵێتەوە. یان بیانخاتە ئەو دونیا ئایدیالییەی  کە تەنها  بە خەون و خەیاڵ  دێتە دی. دونیایەك نەك ئەمڕۆ و نەك سەدان ساڵی تر بەڵکو هەزاران ساڵی تر نە من و نە خۆی و نە هاوزمانەکانمان و  نە مرۆڤایەتی ڕەنگە  پێی نەگات. ئەوەش تەنها پاسیف کردنی مرۆڤەکانەو تەنها مانەوەیانە بۆ بۆڵە بۆڵ و خورتە خورتی سەر کاغەز و لایفەکان.

کاك زاهیر سەرەتای نوسینەکەی بە توانجێکی هەرزەکارانە دەسپێدەکات و بە بێ هیچ بەڵگەك دێت تۆمەتێکی قێزەون دەبەخشێتەوە وەك ئەوەی  لە سێ رستەی یەکمیدا  و وەك دەسپێك دەڵێ: " پاش پسکە پسکی دوو ساڵ و لە خشتەبردنی هەندێك کەسی دڵسۆز و پرس و ڕا بە هەندێك لەسەرانی یەکێتی نیشتمانی کوردستان، حیزبێکی نوێ سەری لە هێلکە جوقان. لە راستیدا دوکانێکی سیاسەتبازیی بۆ ڕامکردنی هەرچەند بکرێت لە خەڵکی داما و و بێ هیوای کوردستان، کرایەوە،''

بەڕێز کاك زاهیر ئەم  کۆپڵە سێ ڕستەییە تەنها گاڵتەجاڕی ، ناشرینکردنی بێبنەما، تاوانبارکردنی بێبەڵگە ، سوکایەتیپێکردن و تۆمەت و چەواشەکاری  لە خۆی دەگرێت.  بۆیە بە پێویستی دەزانم " وەکو بەرکوڵێك" لە ڕێگای ئەم نوسینەوە بەڕێزتان و کەسایەتیتان بە پێی توانام لە ڕێگای ئەم سێ رستە و دەربڕینەکانتانەوە بە خودی خۆتان بناسێنمەوە.

بێگومان نە دەمەوێت بە شان و باڵی ئەو جموجۆڵەدا  هەڵبدەم کە هێشتا ناویان نە لە خۆیان ناوە حیزب نە ڕێکخراو نە بزوتنەوە. بەڵکو بەووردی تێی دەڕوانم و هاوکاریانم و لەو باوەرەشدام ڕەخنەی بنیانەر لە هەموانەوە زیاتر سودمەندە بۆیان ، بەتایبەتی لە کەسانی خاوەند بیر و  قەڵەم.  بۆیە بە ئەرکی خۆمی دەزانم وەڵامی ئەو هێرشەتان بەو شێوازە ناڕەوایە  بدەمەوە.

سەرەت لە پسکە پسکی دوساڵ دەدوێن! بەڕێزم ئێوە وەکو ئەندامێکی دێرینی یەکێتی و پاشان مارکسی-لینینی و ئەمڕۆ ئانارشیست بە دڵنیاییەوە تاقیکردنەوەی ڕێکخراوەییتان هەیە و بە ئاگان لە مێژووی بزوتنەوە ڕزگاریخوازەکانی گەلان و بزوتنەوە ئازادیخوازیەکانی جیهان و ڕێکخراو ەچەپ و راست و مارکسی و لیبرال و ئانارشیستەکان و  مەدەنی و تەنانەت ئایینیە سیاسیەکان و ...هتد، هەرگیز ڕودیداوە شەوێك بە مورتاحی سەربخەنە سەرسەرین و سبەینێ لەخەوهەستان ڕێکخراوێکیان بۆ ئامادەکرابێت و وەکو شەمەندەفەر و پاس و میترۆکان سواری بن و بەو ئیستگەیەیان بگەیەنێت کە بلیتیان بۆ بڕیوە؟  بە چ ویژدان و لەسەر چ بنەمایەکی زانستی بە هەوڵ و ماندوبون و دەیان کۆبونەوەی ڕاستەوخۆ و ناڕاستەوخۆی دەستەیەك کە لە بیری ئەوەدا بن ئامادەکاری بکەن بۆ  بنیاتنانی ڕێکخراوێکی نوێ کە لە توانایاندا هەبێت یان نا، بە ئامانجەکانیان بگەن یان نا، بەرنامەیەکی کامڵ و گونجاو و لەباریان هەبێت یان نا، تەنها ویستی گۆڕانکاری و باشکردنی باری گوزەرانی خەڵكی و گۆرانکاری ئەم بارە ناهەموارەی خەڵکیان لە بیر و هزردا بێت ناوی بنێیت پسکە پسك! بۆچی پسکە پسك؟ پسکە پسك  سینۆنیمی کۆمەڵێك دەربڕینە لەوانە؛  وورتە وورت ، لە ژێرەوە دوانی نەرێنی بەرامبەر کەس یان کەسانی تر ، دوان بۆ پلانگێری یان خراپکاری. لە لایەکی ترەوە  دەکرێت پسکە پسك بەو مانایە بێت لە کار و هەوڵێکی ڕەوادا بیت بە شێوازێك کە دوژمن لێت بە ئاگا نەبێت. وەك ئەوەی ڕێکخستنە دێرینەکان کە شان بەشانی یەکتری بە شەقامەکاندا دەگەڕان لە بری دەنگێکی بەرز و هاوار هاوار پسکە پسکیان دەکرد و خۆیان لە بەعس و پیاوەکانی بەعس دەپاراست. بە دڵنیاییەوە بەڕێزتان مەبەستتان ئەوە نیە کە ئەمان دو ساڵە پسکە پسك دەکەن و نایانەوێت دوژمن کە پارتە دەسەڵاتدارەکانی ئەمڕۆی کوردستانە لێیان بە ئاگا بن و پێش ئەوەی بێنە سەر پێی خۆیان لە قاچیان بدەن! لەبەر ئەوەی بەڕێزتان "دوور لە ئێوە" وا دەدوێن  وەك ئەوەی کەسێکی ناو یان  نزیك لە دەزگا هەواڵگیریەکان بن و  بە ئاگا بن لەوەی کە  ئەوان لەم دوساڵەی پسکە پسکەکانیان دا "پرس و ڕایان بە هەندێك لەسەرانی یەکێتی نیشتمانی کوردستان" کردووە و ڕەزامەندی ئەوانیان وەرگرتووە. بەڕێزم من وەك کەسێکی هاوکار و نزیك لەو پسکە پسك کەرانە زۆر سوپاسگوزارتان دەبم کە ئاگادارم بکەنەوە ئایا ئەو سەرانەی ینك کێن کە پرس و ڕایان پێکراوە؟ تاوەکو منیش وەکو کەسێك لەوانەی کە وەك ئەوەی ئێوە دەڵێن "ڕام کراوە " هەڵوێستی خۆمیان بەرامبەر وەربگرم!. ئەگەر بە ڕێزتان نەتوانن وەڵامێکی کۆنکرێت و ناوی ئەو پسکە پسك کەرانە و ئەو بەرپرس یان بەرپرسانە نەخەنە ڕو بە دڵنیاییەوە یان دەخرێنە ناو خانەی بوختانکەرێکی ناڕاستی ناڕەوا یان کەسێك کە بوێری ئەوەی نیە ڕاستیەکان وەکو خۆی بخاتە ڕو. بۆیە تەنها ڕێگایەکی ڕاستتان لەبەردەمدا بێت ئەوەیە کە یان داوای لیبوردن بکەن لە بوختانکاریە ناهۆشیاریەکەتان یان تەواوی ڕاستیەکان ئاشکرا بکەن. بە کورتی تۆپەکە لە بەر پێی خۆتان و لە مەیدانەکەی خۆتاندایە.

پسکە پسك لە لایەکی ترەوە بۆ ڕاوچی بەکاردەهێنرێت کە بە وردی و لە پشتی سەرەوە خۆی لە نێچیرەکەی یان نێچیرەکانی نزیك دەخاتەوە، بەو مانایەی هەوڵ و ماندوبونی دوساڵەی ئەوان دەکەنە هەوڵی دوساڵەی ڕاوکردنی هەندێك کەسی دڵسۆز یان  وەك ئەوەی ئێوە دەڵێن:" لە خشتەبردنی هەندێك کەسی دڵسۆز" . لێرەدا دەمەوێت ئەو راستیە بدرکێنم کە بەندە یەکێك بووە لەو کەسانەی لە تەمەنی هەرزەکاریمەوە ئەندامێکی چالاكی کۆمەڵەی ڕەنجدەران بوم، بێگومانم لەوەی کە تۆش ڕابردویەکی لەو جۆرەت هەیە، بەڵام ئایا ئێمە بەو هۆکارەوەی کە لەخشتە براوین دەکرێت بگەینە ئەو ڕۆژەی کە ئیتر دیوارێك لە نێوان خۆمان و تەواوی هیواکان و تێکۆشان و لەخۆبوردەیی و ئاوات و خەونەکانمان دروست بکەین؟ ئایا سەرباری ئەوەی کە ئەمڕۆ بە ئاگا بوینەتەوە لەوەی کە لە سەردەمێکدا پەیرەوی بنەمای " نفذ ثم ناقش" مان کردووە و توشی دەیان کێشە کراوین،  ئیتر دەبێت تاکو ئەو ڕۆژەی دەخرێینە گۆرەوە پاسیف و دەستەوەستان بین؟یان پێویستە لە پاڵ هەر شکست و کەوتنێکمان لە پێش هەمو شتێکدا لە بیر و بەرنامەی هەستانەوە و ڕابونەوە بین و بە شێوازێکی هۆشیانە تر شان بدەینەوە بەر ئەو ئەرکانەی کە وەکو مرۆڤێکی خاوەن بەها  تاکو ئەو ڕۆژەی دەخرێینە ژێر خاکەوە بە ئەرکی سەرشانمانی بزانین. ئایا بەڕێزتان یان هیچ یەکێكتان ناسیوە کە لەگەڵ دەسپێکردنی بەهەر پرۆژەیەکی سیاسی، ئابوری، هونەری، ...هتد گەرەنتی سەرکەوتنی پێدرابێت؟ بەڕێزم دەسبەکاربون بە ئاگا و هۆشیاریەوە و دوائەنجام شکست و ملشکانیش ئەنجامەکەی بێت هێشتا جێگای شانازیە و تایبەتمەندی مرۆڤ بونمان پێدەدات نەك خۆ و خەڵك  قەتیسکردن لە تاریکی دا یان  هەوڵی هێشتنەوەیان لە ژێر چەتری بێهیوایی.  هەمو دەسپێشکەریەك کردنە خراپکاری و ڕەوایی دان بە  خۆدزینەوە و لەو ڕێگایەشەوە تەنها خەوی سەیروسەمەرە بینینکردارێکە کە دوا ئەنجامی "ناهۆشیارانە" خزمەت بەو دەسەڵاتەیە کە ڕۆژانە لە ڕێگای ووتار و سۆشیال میدیاکانەوە تەنها لێی دەخوێنن و بێکردارن بەرامبەری. لە کاتێکدا  سەرقاڵی کەموکورتی کێشەکانی ئەو دونیایەن کە دەیان ساڵە لە ژێر چەتری سیستەم و حکومەت و یاساکانیدا کە لە هەزاران میلەوە کۆچتان بۆی کردووە و لە ژێر سایەیدا  حەواونەتەوە.