لە رۆژانی رابوردودا کاری خۆکوژی لە هەرێمی کوردستان بە شێویەکی بەرچاو زیادیکردوە.

ئێمە بەئاگایان لەوەی هەڵکشانی رێژەکانی خۆکوشتن پەیوەندی بە دۆخی خراپی ئابوری و کۆمەڵایەتیەوە. ئەو دۆخە خراپەش زادەی راستەوخۆ سیاسەتە چەوتەکانی دەسەڵات و حکومەتی هەرێمەوە هەیە. لە ئەنجامدا رێژەیەکی زۆری هاوڵاتیان بە تایبەتی گەنجان توشی خەمۆکی قول و دڵەراوکێ و فشاری دەرونی گەورە بونەتەوە. ئێمە لەوەش هۆشیارین کە بە چارەسەرکردنی هۆکارە بنەڕەتیە ئابوری و سیاسی و کۆمەڵایەتیەکان، خۆکوشتن بەردەوام دەبێ و زیاتریش دەکات.

بەڵام وەکو تۆڕێک کە خەمی تەندروستی گشتی هەرێمی کوردستان دەستەوەستان نابین لەبەرامبەر ئەم دیاردە کوشندەیە. لێروەوە کەمپینێک ڕادەگەینین بۆ کەمکردنەوە و بنبڕکردنی خۆکوژی و درێژکردنی دەستی هاوکاری بۆ ئەوانەی پێویستیانە. کەمپینەکەمان ئەم چالاکییانە دەگرێتە خۆ:

* دابینکردنی ژمارەی تەلەفون کە ئەو کەسانەی بیر لە خۆکوژی دەکەنەوە یا خێزان و هاورێکانیان پەیوەندی پێوە بکەن بۆ وەرگرتنی ئامۆژگاری و فریاگوزاری خێرا.

* بڵاوکردنەوەی پۆستەری تایبەت بە رێگری لە خۆکوژی لە تۆڕە کۆمەڵایەتیەکاندا

*پەیوەندیکردن بە رێکخراوە نێودەوڵەتیەکان بۆ هاندانیان بۆ پێشکەشکردنی خزمەتگوزاری خێرا لەم بوارە

*دروستکردنی فشار لەسەر دەزگا فەرمییەکان بۆ ئەنجامدانی هەنگاوی خێرا بۆ ڕێگری لەم دیاردەیە.

تۆڕی پاراستنی تەندروستی گشتی بەردەوام دەبێت لە هەوڵەکانی لە پێناو پاراستنی مافە تەندروستیەکانی هاوڵاتیان.