وتار
ژنه‌ك ب هه‌یبه‌تا گاره ب ناڤێ بێریڤان به‌رگاره‌یی
Tuesday, 06.21.2022, 01:53 PM
هه‌تا نه‌هات ئازادكرن قه‌ت نه‌هات ناسین، ده‌مێ ئازاد بوو چاڤێن تاری ژ دلێن پڕ گومان نه‌كارین بناسن. ساڵه‌كێ لژێر چاڤدێریا سیخورێن پاراستنێ دا خه‌باتێن ویژدانی و مه‌ده‌نیانه گێڕابوو. ب هۆڤیتی هات گرتن كه‌سێ نه‌زانی. شه‌ش مانگێن ده‌سپێكێ ب مانگرتن و ئه‌شكه‌نجه‌یێن ڕه‌شچالێن هۆلاكۆیێن سه‌رده‌مدا بێ كه‌س، بێ پارێزه‌ر، بێ هه‌ڤدیتن بێ ناڤ و بێ نیشان وه‌ك چیاێ گاره په‌نجه ل ڕووچكێ مرنێ دژه‌نی. ماڵپه‌ڕا ئه‌نجۆمه‌نا دره‌وان داخواز ژ ئه‌نترپۆل كربوو ژبۆ كو دگه‌ل وان هه‌ڤكاریێ بكه‌ن د ڕێگریا ل دلێ بێریڤانێ.
كه‌سێ نه‌دیت ده‌مێ لبه‌ر چاڤێ زارۆكا خوه ئیمانا 9 ساڵی چاوا هات زنجیركرن، كه‌سێ ده‌نگێ قێرینا ئیمانا بچوك نه‌بهیست و نه‌كر مانشێتا رۆژنامه و سایتێن دره‌وین و فه‌حاش، دیاره هێلیلۆفان ده‌رفه‌ت ستاندبۆ، ئیمانێ هاوار دكر: هه‌ی بێ وژدانینا كه‌له‌مچا ژ ده‌ستێن دایكا من ڤه‌كن، ئه‌و پڕ دلۆڤانه، كه‌سێ ژ بێریڤانا كه‌له‌مچه‌كری نه‌بهیست ده‌مێ بێریڤان ب ده‌ستێن كه‌له‌مچه‌كری چاوا د ڤێ هه‌وڵێ ده بوو ئیمانا بچوك هین بكه‌ت لاڤایێن خوه یێن پیرۆز نه‌خیته به‌ر ده‌ست و لنگێ به‌ختێ ڕه‌شێ ڤان دلتاریان.
كه‌سێ لێكۆلینێن دژوارێن ب رۆژان و ب مه‌هان یێن لسه‌ر بێریڤانێ نه‌دیتن، شه‌ڤ و رۆژێن ل تاریخانه‌یێن به‌ختێ ڕه‌شێ بنه‌ماڵا هه‌ڤپه‌یمانێ فاشیستێ ترك، فاشیستێ كو دژمنێ خوینا گاره و هه‌رچی ل دانگا وێ گارێ، دژمنێ سویند خاریێ دیرۆكا گارێ، دژمنێ هه‌رچی دار و كه‌سكاتی و گیانه‌ور و گه‌ریده یێن وێ گارێ، داربه‌ڕویێن وێ گارێ، دژمنێ یاخی و به‌رخوه‌دێرێن وێ گارێ و وه‌ڵاتپارێزێن ل به‌رێگارێ.
كه‌سێ نه‌زانی ده‌مژمێرا ساڵه‌ك و 7 مه‌هان چاوا كار دكه‌ت، ل تاریخانه‌یێن ب شه‌ڤ و رۆژێن درێژ یێن ڤان ڕه‌شچالێن ده‌ستێن ڕه‌ش و به‌ختێن ڕه‌ش د ده‌ستێ وان ڕه‌شدلێن كو ده‌رڤه‌ی ده‌ستخوه‌شیا سه‌ڵته‌نه‌تا سه‌رێ ڕه‌ش، كول و ده‌رده‌ك دی د دلێ واندا جهێ خوه نابینیت، ئیمان و باوه‌ریا وان ئه‌و موچه‌یه كو وه‌ك سه‌یێن به‌ر ده‌رۆكان بێ وێ قه‌ت باوه‌ری بخوه نینن بكارن زكه‌ك تێر بخۆن! كێ دیت بێریڤانێ ب درێژاهیا وان هه‌موو شه‌ڤ و ڕۆژان مه‌ره‌قا یه‌ك خوله‌ك دیتنا ئیمانا بچوك، محه‌مه‌دێ 5 ساڵی، په‌لاتینكێن خوه‌یێن په‌روه‌ردا ده‌ست و هه‌ستێن خوه، چاوا ب زكێ برسی و برینێن ئه‌شكه‌نجێن پاشمایێن هۆلاكۆیان تێپه‌ڕاند؟ هێڤیا سڵاڤه‌كا دلۆڤانیا ماڵباتێ، دایك و باب و خێزانا كو د مه‌نجه‌لا ڕه‌شا جڤاكا پاشڤه‌مایی، ب زهنیه‌تا پاشڤه‌ڕویا سه‌دساڵێن ناڤه‌راست ل وێ ته‌ماشه دكرن، نه‌ك وێ فه‌خره‌ك ب هه‌یبه‌ت به‌لكو وه‌ك ته‌غمه‌ك قڕێژ ل سه‌ر ده‌همه‌نا خوه‌یا فئۆدال ببینن كو هه‌وڵ بده‌ن وێ ته‌غمێ ب هه‌ر ڕه‌نگێ بویی پاقژ بكه‌ن.
كه‌سێ نه‌زانی ده‌مێ بێریڤانا به‌رێ گارێ بهیستی زاڕۆك و پێشه‌ڕۆژێن وێ ژی ژێ هاتن ستاندن كه‌ت چ ڕه‌وشه‌كێ، ده‌مێ كو هێدی ژێر لێڤێن خوه گۆتی: ئه‌و ژی بلا، به‌رخوه‌دان ژیانه..
لێ زارۆكێن د خوینا خوه‌دا كه‌لاندی، زاڕۆكێن لاشی وێ مژتین و ب جه‌سته‌یێ وێ گیان گرتین، لبه‌ر سیا وێ كرامه‌ت ناسین، ب روح و گیانه‌ك به‌رپرسیارانه په‌روه‌راندین، د هه‌مبێزا پیرۆزیه‌ته‌ك كوردانه دا مه‌زن كرین، هه‌موو بڕیاره ب چڕقێنا چه‌كۆچێ بێدادگه‌هه‌ك ڕه‌شا بنه‌ماڵه‌یی ڕاده‌ستی مێره‌كێ بهێنه كرن كو ئه‌و ژی وه‌ك هه‌ر زه‌ڵامه‌كێ پاشڤه‌ڕوو كه‌لیایێ وێ مه‌نجه‌لا ڕه‌ش و وێ بێدادگه‌هێ یه.
لێ كه‌سێن دیتی ته‌نی ئیشكه‌نجه‌كار بۆن، ئه‌وێن كو ته‌نێ ل تاریا نیڤه‌شه‌ڤان ب خه‌نجه‌را ل پشتێ مێرخاسن، كه‌سێن كو غیره‌تا شه‌ڕڤانیا وان ته‌نێ ل هه‌مبه‌ر ژنێن ده‌ست و لنگ كه‌له‌مچه‌كری د ڕه‌شچالاندا دگه‌هیته لۆتكێ، كه‌سێن فیشه‌كا خلاسیێ ل سه‌رێ هزاران به‌یان و مارگارێتان چرقاندین، كه‌سێن كو دیمه‌نێ وان پڕ ڤه‌كری ل پشتا هینویا له‌شكه‌ریا 3ی ئابا 2014 جهه‌ك ڕه‌ش د دیرۆكێدا گرتی، ده‌مێ لپشتا خوه كرامه‌تا سه‌دان هزار ژن و زاڕۆكان قوربانی به‌خته‌ك ڕه‌ش و ئدعایه‌ك ڤاڵا كرین، بێ كو مسقاله‌ك شه‌رم و حه‌یا ل سه‌ر روچكێ وان ده‌ركه‌ڤیته ئه‌كرانان لنگێ خوه دانانه سه‌ر ده‌وسا خوینا هزاران قوربانیان و گۆتن ئه‌م ڕزگاركه‌ر و نوینه‌رێن مه‌زلومانه.
كه‌سێن ئه‌شكه‌نجه ل بێریڤانێ كرین ئه‌و كه‌سن یێن ته‌نێ ئه‌گه‌ر 2 رۆژان خوارن نه‌گه‌هیته زكێ وان دێ رۆندك ژ چاڤێن وان هێنه خارێ، به‌لكه ژی پشتی چه‌ند ڕۆژان ژ تڕسا وێ برسێ بمرن، له‌وره دێ چه‌په‌ران به‌رده‌ن و ڕه‌ڤن، دێ هه‌ر تشتێ به‌ر ده‌ستێ خوه فرۆشن، دێ گاره و هه‌رچی كه‌سێ ل بنارێ وێ فرۆشن، ئه‌ون یێن كو ژ ترسا برسێ هه‌تا رۆژه‌كێ دێ ئه‌ربابێن خوه ژی فرۆشن، ئایینێ خوه، كلتورێ خوه، نه‌ته‌وا خوه، كرامه‌تا ئه‌ژدادێ خوه و داربه‌رویێن سه‌دان ساڵان ل ڤێ خاكێ ژیای دێ ژ ڕیشالان ده‌رینن و ب پارێ وێ ئه‌كرانه‌كێ دانن كو تێدا بێژن ئه‌م
پارێزڤانێ خاكا داربه‌ڕویانه، ئه‌م نوینه‌رێت بێریڤانێن ل دانگا گارێ نه، ئه‌م شڤانێن په‌زی نه، ئه‌م گاره‌نه، ئه‌م داربه‌ڕوونه، ل ده‌مه‌كێ كو وێ بێریڤانێ و وی په‌زی، وێ داربه‌رویێ هه‌مویێ دێ فرۆشن ته‌نێ ژبۆ كو ژ تڕسا وێ برسێ ڕزگار ببن.
لێ ژ قه‌ده‌را كامباخ بێریڤانا دل پۆڵاد كو بانگا ڕێگریا ل ڤان ژه‌هران ل سه‌ر جڤاكا خوه دكر ب ده‌هان ڕۆژ بێ خوارن ب جاران ب زكێ ڤاڵا ب ده‌ستێ هه‌مان نه‌كه‌سان هات ئه‌شكه‌نجه دان. به‌لێ هه‌مان نه‌كه‌سێن تڕسۆنه‌ك كو مێرخاس و عه‌گیدان ب بهاێ خانه‌كا ڕه‌نگینا خوارنێ دفرۆشن، خوینا ب هزاران ڕه‌ئوف و سادق عه‌مه‌ران بۆ تا دیار غه‌ریب هه‌تا فه‌رهادان ب په‌یكه‌ك شه‌رابا 75 ساڵی دگه‌ل توران وبه‌ربه‌ره‌كێ هۆڤ بهه‌ڤڕه دچڕكینن.
ئه‌و دگه‌ل هه‌ستێ بێریڤانان غه‌ریبن، به‌یان و مارگارێتان ناناسن، جنس و ئاژۆیێن وانن كو ژ میناكا گیانه‌وه‌ران چاڤێ وان زیق دكه‌ت، برسه كو وان وه‌ك سه‌ی وه‌فادارێ ده‌ر و ناڤ و سه‌رێن ڕه‌ش دكه‌ت. ل ئازادیێ ل كێله‌ك بێریڤانێ سه‌یێن چاڤچریكێن برسی هه‌بوون، ل زیندانێ ل كێله‌ك بێریڤانێ دۆستێن دل ڕه‌شێن خایین هه‌بوون، ده‌مێ ئازاد بوی ژی نه‌كه‌سێن كۆره فامێن هلوه‌شیای و دۆڕدایێن قومارا سیاسی ڤیرۆسا دلێ خوه‌ێ چركین ل سه‌ر بێریڤانێ به‌ڵاڤ كرن، دیسا بێریڤان نه‌هات دیتن، ئه‌رێ جڤاك چه‌ند دڤێت كۆره و تاری بووبیت، چه‌ند دڤێت ژ هش و روح و تێگه‌هان كه‌تبیت كو ڤێ هه‌موو رۆناكیێ ب چاڤان ژی نه‌كاریت ببینیت.
نه‌كه‌سێن كۆرفام كو لژێر سیا وێ خوه بچوك ددیتن ب ده‌ربڕینێن خوه یێن مری هه‌وڵ دان لنگێ خوه دانن سه‌ر هیممه‌تا وی ژبۆ كو ب بهاێ كۆمنته‌كێ ب ده‌مه‌ك كورت ژی بیت تامه‌كێ ژ بلنداهیێ بكه‌ن، بێریڤانێ ئه‌و ژی هه‌دار كر و نه‌كر هه‌وار و دیسا ل به‌رخوه‌دا و دیسا كه‌سێ خوه‌دی چاڤه‌ك رۆناكبین نه‌بوو كو ببینیت..و دیسا ل بن لێڤا گۆت: به‌رخوه‌دان ژیانه..
ئیرۆ ژی كه‌س بێریڤانێ نابهیسیت، كه‌س نزانیت چاوا دژیت، كه‌س نزانیت وێ ئه‌ڤ هه‌موو قوربانی پێخه‌مه‌ت چ تشته‌كێ دان، لێ ئه‌و هێژی دمه‌شیت، ب هه‌موو بارێ گرانێ لسه‌ر دلێ خوه ڤه دمه‌شیت.
لێ براستی كه‌سێ ڕۆندكێن بێریڤانێ ژی نه‌دیتن، كه‌سێ ناڵینا بێریڤانێ ژبۆ دیتنا زاڕۆكێن خوه ژی نه‌دیتن، كه‌سێ لاڤه و رجاركرنێن بێریڤانێ ژی نه‌دیت، نه ئه‌شكه‌نجه‌كاران، نه بێدادگه‌ران، نه ئازادیخوازان، لێ هه‌موویا بلێتا دیتنا فلمه‌ك ب خوین و خوێدان، ب هێسرێن بخوین ژ چاڤێن بێریڤانێ د به‌ریكێ دابوو. هه‌میا دیتنا جه‌نازه‌ك شه‌وتی و بێ گیان هیڤی دكر، لاشێ ژنه‌كا ته‌سلیم بوی كو هاتبیته ته‌جاوز كرن، ژبۆ كو چ جارا ده‌ڤێ خوه ڤه‌نه‌كه‌ت! ژنه‌ك كو جهێ ئه‌شكه‌نجێن وه‌داتان لسه‌ر لاشێ وێ قیچ بكه‌ن، لێ بێریڤانێ تشته‌ك جودا دانی به‌چاڤێ جڤاكا خوه و ته‌ڤاهیا جڤاكا جیهانێ، تشتێ كو دچاڤ و ڕوح و گیانێ هه‌مویاندا غه‌ریب بوو، تشته‌ك كو پێناسه و شوینه‌وارێن وێ د دیرۆكا ته‌مه‌نێ واندا قه‌ت نه‌هاتبۆ دیتن،به‌لێ... ئیراده‌ك ژ گیانێ گارێ، كرامه‌ته‌ك ژ هه‌یبه‌تا گارێ، به‌رخودانه‌ك ژ هیممه‌تا گارێ، دله‌ك ژ بێریڤانا به‌رێگارێ.!
ئەو بابەت و هەواڵانەی کە ناوی نووسەرەکانیان دیار و ئاشکرایە، تەنیا
نووسەرەکەی بەرپرسیارە، نەک تەڤداپرێس
وێنە
مسعود بارزانی دوای سەرنەکەوتنی لە رواندنی ددانی دەستکرد
براوەی کۆنگرەی چواردە
ململانێی نێوان بنەماڵەی بارزانی
جاشایەتی ئال بارزانی بۆ ئەردۆغان
تابلۆکانی شەهیدانی قەلەم لەکوردستان
راپرسی
