سۆرانی

نمایشەکەی مەسعود بارزانی و مانۆرە سەربازیەکەی؟!‏

سەرۆکی پارتی دیمۆکراتی کوردستان مەسعود بارزانی بە بۆنەی چاپکردنی زنجیرە ‏پەرتووکێکی بەڵگەدار دەربارەی هەر دوو رێبەری تەریقەتی نەقشەبەندی بارزان، شێخ ‏عەبدولسەلام بارزانی و شێخ ئەحمەد بارزانی، لە گردبوونەوەی رۆژی ١٨ی مانگ لە ‏هەولێر تیشکی خستە سەر کەسایەتی بەرزی ئەو دوو رێبەرە و باسیشی لە هەزاران بەڵگە ‏ئێرانی و عوسمانیەکان کرد کە پارێزراون لە ئەرشیفی هەر دوو دەوڵەتی ئێران و تورکیادا و ‏باس لە کەسایەتی و چالاکی و کردەوەکانی ئەم دوو رێبەرە رۆحیە دەکەن.‏

بێگومان ئەم دوو کەسایەتیە  لە رووی کۆمەڵایەتی و رۆحی و سیاسیەوە لە سەردەمی خۆیاندا ‏رۆڵێکی بەرچاویان هەبووە.‏

جێگرتنەوەی شوێنی رێبەری تەریقەتی نەقشەبەندی بارزان بە پێی شێوازی دەستنیشان کردنی خودی ‏تەریقەتەکە وەها بووە کە  رێبەر خۆی بە شێوەیەکی ناراستەوخۆ هێمایەک دەدات بەو کەسەی ‏کە شایستەی پاراستن و ئیدامەدانی تەریقەتەکەیە. ئەمەش بەو واتایە  دێت کە رێبەرایەتی ‏تەریقەتەکە هیچ پەیوەندیەکی ئەوتۆ بە خزمایەتی خوێن و پەیوەندی خوێنەوە نیە، بەڵكو زیاتر ‏پەیوەندی بە لێهاتوویی و بلیمەتی و راست و دروستی و مۆڕاڵ و پابەندبوونی  رێبەری ‏داهاتووەوە هەیە بە بنەما و پرنسپپە سەرەکیەکانی تەریقەتی بارزان. ‏

بۆیە پەیوەندی خوێن یان خزمایەتی نزیک بە واتای ئەوە نایەت كە ئەو کەسە ببێتە هەڵگری ‏میراسی تێكۆشان و قوربانیدانی ئەو دوو رێبەرە، چونکە ئەوانە موڵکی خۆیان نین، بەڵكو ‏موڵکی هەموو مورید و  شوێنکەوتووەکانی خۆیان و گەلەکەیانن. ئەو کار و کردەوانانەی کە ‏کردوشیانە جگە لە ئەرکێکی رۆحی و ئایینی و مرۆیی و نشتیمانی بێبەرابەر بووە بە پاداشت ‏و ئیمتیازیاتی دونیایی، بەڵکو چاویان لە رۆژی مەحشەر بووە کە خودا لێیان رازی بێت و ‏پاداشتیان بداتەوە.‏

بەڵام بەکارهێنانی ئەو میراسە جوان و دەوڵەمەند و پڕبایەخە وەکو کەرەستەیەک بۆ  ‏خۆشاردنەوە، پەردەپووشکردن، خۆ دزینەوە لە تاوانەکان ، جەور و ستەم، تاڵانکردنی ‏سەروەت و سامانی گشتی، حەراجکردنی خاکی کوردستان، خزمەتکردنی داگیركەرەکان  یان ‏گۆڕینەوەی داگیركەرێك بە داگیركەرێكی دی، كوشتنی شەرڤانانی ئازادی، بێسەروشوێن ‏كردنی خەڵكی ئازادیخواز، ئەشكەنجەدانی خاوەن دەنگە بوێرەكان و قوڵبەستکردنیان یان ‏بێسەروشوێنکردنیان، كۆكردنەوەی دز و جەردە، ژنكوژ وپیاوكوژ،  نشتیمانپەروەركوژ، ‏نووسەركوژ، سیاسەتمەداركوژ و بكوژ و بكوژو بکوژ.......یان بۆ راكێشانی سۆزی ‏هەواداران و شوێنکەوتووانی تەریقەتەکە، نەک تەنیا لە ئەرزشی میراسی ئەو دوو رێبەرە کەم ‏دەکاتەوە، بەڵکو بێبایەخ و بێناوەرۆکیش دەکات!.‏

چونکە سەرۆکی پارتی نە رێبازی تەریقەتەکەی پیادەکردووە و نە پابەندی هیچ لە پیودانگ و ‏بەها و بنەما ئەخلاقیەکانی بووە، بۆیە شایستەی ئەوە نیە کە مێژووەکەیان  وەکو شانازیەک بۆ ‏خۆی تۆمار بکات و نمایشی پێبکات؟! ‏

هەرچەندە بەم نمایشەکردنەش ناشێ لەو هەموو تاوانانە رزگاری بێت كە وەكو رۆژی ‏رووناک دیارن و یەخەی بەرنادەن و بە خۆ-هەڵواسین بە سنگەکەی تەریقەتی بارزانەوە ‏ناتوانێ لە  کۆڵ خۆی بکاتەوە. هەرچەندە نووسینی زنجیرە پەرتووکێکی بەڵگەداری تایبەت ‏بەهەر دوو رێبەری تەریقەتەکە،  کارێکی بەجێ و باشە، بەڵام دەبێ چاوپۆشیش لەوە نەکرێت ‌‏ کە بە پارەی دزراوی خەڵکەوە ئامادە ولە چاپ دراون، بۆیە ناشێ لە ژێر پەردەیانەوە خۆی بشارێتەوە و وەکو بەرزەکی بانان بۆی دەرچێت.‏

بە هەمان شێوە ناتوانێ خەڵکی وشیار و زرنگ فریو بدات و بەرۆکی خۆشی پاک بکاتەوە و ‏خۆی لە ناڕەزایی خەڵكی تۆڕە و برسیکراو وبەشخوار و بێدەنگکراو قوتار بکات.‏

هەروەها  لە ئاهەنگەکەدا سەرۆکی پارتی باسی لەوە کرد کە خۆیان رادەستی هیچ هێزێک ‏ناکەن و بەرامبەر بە هەر گوشارێکی ئێراقی بەرگری لە خۆیان دەکەن!‏

پرسیارەکە لێرەدا ئەوەیە کە  دەبێ چ جۆرە بەرگریەک بێت؟ ‏

هەمان ئەو بەرگرییەی کە بەرامبەربە تەراتێنی هێزە سەربازیەکانی تورکیا لە سەر خاکی ‏باشورکوردستان و پەلاماردانی درۆنەکانی تورکیا دەبێت؟! ‏

یان ئەو بێباکییە دەبێت کە بەرامبەر بە خەڵكی مەدەنی  بێچەک لە  شەنگال نواندی ؟! ‏

یان هاوشێوەی ئەوهەڵوێستە ترسنۆکەکەی دەبێت کاتێ داعش نزیکی هەولێر بوویە هاوینی  ‏ساڵی ٢٠١٤ کە بە دەنگێکی لەرزۆکەوە تەلەفۆنی بۆ جێگری سەرۆکی ئەوسای ئەمەریکا ‏جۆو بایدن کرد بووی؟ یان هاوشێوەی ئەو بەڵێنە دەبێت کە  رۆژێک پێش ریفراندوم دا و ئامادەیی خۆی ‏دەربڕیبوو کە ملی خۆی لە سەر دانابنێ؟ ‏

یان لەشێوەی پاڕانەوەکەی دەبێت بۆ دەسەڵاتدارانی ئێراق کاتێ ریفرۆندومەکەی ساڵی  ‌‏٢٠١٧شکستی هێنا بوو؟ ‏