خویشكا من یا گیانشاد كو ب هۆڤانه‌ هاتیه‌ كوشتن و تاوانبار بێ سزادان ماین د ته‌مه‌نێ زارۆكتیدا هاته‌ زه‌وجاندن، ئه‌و ژدایكبۆیا 1997ێ بوو، سه‌ره‌ڕای ته‌مه‌نێ بچوكێ خوه‌ كچه‌ك پڕ هشیار و بیرتیژ، مرۆڤاهیخاز، ئاژه‌ڵدۆست و ڕۆوه‌كخۆر بۆ، پڕ حه‌زدارێ زانین و پێشكه‌ڤتنێ بوو، خوه‌دی ئایدیایێن تیگه‌ها پێشكه‌ڤتن و هشمه‌ندیا ئازادیا هزری بوو، خویندكاره‌ك وه‌سا زیره‌ك بوو كو ل هه‌موو سالێ ب پله‌یا نمونه‌یی ده‌ردچۆ، هه‌لبه‌ستڤانه‌ك پڕ بهێز و هه‌ستیار بوو كو ب پله‌یا دووه‌م بۆ خوه‌دیێ خه‌لاتێ باشترین هه‌لبه‌ستڤان لسه‌ر ئاستا دهۆكێ. هه‌م ژی د وارێ راگهاندنیدا ژی كچه‌ك پڕ ژیر بوو كو ب ئۆمێده‌ك سه‌ره‌رای ڕێگریا ل خوه‌ندنا كچان د جڤاكا مالباتا مه‌دا لی دیسان ڕێگری ل خوه‌ندنا خویشكا من یا بچوك نه‌هاته‌ كرن و وێ كاری ئاستا خوه‌ندنا خوه‌ هه‌تا زانكۆیێ بگه‌هینیت، لێ مخابن وێ مالباتا كوژه‌رێن خویشكا من یا ته‌مه‌ن بچوك ده‌ست ژێ به‌رنه‌دان و هه‌تا كو كارین ماڵباتا مه‌ ڕازی بكه‌ن و خویشكا من توشی وێ زه‌واجا ڕه‌ش كرین كو هه‌ر وی ده‌می ژی ئێدی به‌خته‌وه‌ریا وێ هه‌تا ژیانا وێ ژی دگه‌ل ڤێ زه‌واجێ بداوی هات.
خوشكا من پشتی لنگێ خوه‌ دانایه‌ ناڤا ڤێ ماڵێ هه‌ر د ئێكه‌م مه‌ها زه‌وجینێ دا هێما و ئاسه‌وارێن ئه‌شكه‌نجه‌، ترس و ئازارێن وێ ب ئاشكرا ڕۆژانه‌ دگه‌هشتنه‌ ماڵباتا مه‌، بتایبه‌ت دگه‌هشتنه‌ من.
وان ڕێگریه‌ك پڕ زێده‌ لێ دكرن بۆ كو نه‌هێته‌ ماڵباتا خوه‌ و ده‌ما په‌یوه‌ندی ژی دكر پێویست بۆ ب نهێنی بكه‌ت. پشتی ڤێ زه‌واجێ به‌رده‌وام هژیانێ په‌یوه‌ندی بمن دكر و ب ڕێیا ته‌له‌فۆنێ ئێش و ئازارێن خوه‌ یێن دده‌ستێ ئه‌ندامێن وێ ماڵباتێ ژبۆ من دڤه‌گێڕان، وێ دگۆت: ڕفتارا ڤێ مالێ دگه‌ل من وه‌ك كۆیله‌یانه‌ كو ئه‌ز نه‌شێم ڤی به‌په‌ژرینم، هه‌ر ژبه‌ر ڤێ ژی توندوتیژیا وان لسه‌ر من گه‌له‌ك زێده‌تر دبیت، ئه‌ز وه‌ك زیندانیه‌كێ مه‌ كو هه‌ر ده‌مه‌كێ دكارن بڕیارا سێداره‌دانا وێ بده‌ن..
دگۆت رۆژه‌كێ ئه‌ز دێ لسه‌ر ناڤێ خوه‌كوژیێ ب ده‌ستێ ڤان هیمه‌ كوشتن و كه‌س لسه‌ر مرنا من ناهێته‌ جواب ژبۆ كو وان بخوه‌ ئه‌ڤ ده‌ربڕینه‌ كرینه‌.
زه‌ڵامێ هه‌ڤژینێ خویشكا من ڕفتاره‌ك نه‌مرۆڤانه‌ دگه‌ل خویشكا من دكر. دشا خویشكا من ژی وه‌ك پترینا ئه‌ندامێن وێ خێزانێ و وه‌ك خه‌سیا وێ رفتاره‌ك گه‌له‌ك خراب دگه‌ل خویشكا من هه‌بوون، ئه‌و ژی هه‌ر پشتی 2 مانگان ب دله‌كه‌ پڕی ئازار و نه‌خۆشی و دلگرانی ژ وێ ماڵێ ده‌ردكه‌ڤیت و په‌ناێ دگه‌هینته‌ به‌ر باره‌گه‌هێ پاراستنا مافێ ئافڕه‌تان یا دهۆكێ، ژبۆ كو ئه‌و زهنیه‌تا فه‌ئۆدالا ماڵباتێ بباوه‌ر نه‌بوو ب ڤێ گومانێ كو بنگه‌هێ روبه‌رووبونا ل توندوتیژیا لهه‌مبه‌ر ژنان یا حزبی دێ مافێ وێ و گیانێ وێ پارێزن، لێ ئه‌و ژی بێ كو گرنگیێ بده‌نه‌ ئاریشه‌ و گۆتنێن وێ لگۆری ڕێبازا فه‌ئۆدال و عه‌شیره‌تیا حكومه‌تا هه‌رێمێ په‌ناێ دبه‌نه‌ به‌ر سیسته‌ما خێله‌كی و په‌یوه‌ندیێ ب برایێن من دكه‌ن و وێ راده‌ستی مالباتا مه‌دكه‌ن.
لێ ب ماتێكاریه‌كا به‌رفره‌ھ یا كه‌سوكارێن مه‌ یێن فه‌ئۆدال و نه‌هشیار ل شوینا كێشه‌یێن خوشكا من ناس بكه‌ن یان بپڕسن و لدیف چاره‌سه‌ریان بگه‌ڕن خوشكا من دكه‌ڤیته‌ به‌ر تاوانێ كو گوایه‌ بوكا 2 مه‌هان ب ڤێ جودابونێ شه‌رمه‌زاریێ ژبۆ ئیجاخا مه‌ دروست دكه‌ت و سه‌رێ مه‌ نه‌وی دكه‌ت!
هه‌ری داوی ژی بێ كو كه‌سه‌ك ژ وێ ماڵباتێ داخازا ڤه‌گه‌ڕینا خویشكا من بكه‌ن ماڵباتا مه‌ بخوه‌ دیسان وێ نه‌چاری ڤه‌گه‌ڕاندنا به‌ر سینگێ وی مێری و وێ ماڵباتێ دكه‌ن‌‌، خویشكا من ب بێ هیڤی مانا ژ هه‌ر ئالی و بی په‌نا و چ پشتگیری دڤه‌گه‌رینن بۆ ناڤا وی ئاگرێ كو تنێ ئه‌و تێدا دشه‌وتی.
به‌رده‌وام خویشكا من د په‌یوه‌ندیێن خوه‌دا ترسا خوه‌ یا ژ كوشتنا بده‌ستێ وان دیاردكر و ژبۆ من دڤه‌گێڕا كو وان گه‌فێن كوشتنێ لێ كرینه‌ و گۆتینه‌ مرنا ته‌ دێ گه‌له‌ك ئاسایی بیت ژبۆ كو ئه‌م دێ بێژین ته‌ بخوه‌ خوه‌ كوشتیه‌. زۆر نه‌ڤه‌كێشا چه‌ند ڕۆژان پشتی ڤه‌گه‌رینا نه‌چاریا خویشكا من بۆ ناڤا وێ ماڵێ، لگۆری شه‌هده‌ییا هه‌یی دیسان ل 27/8/2015 هژیانا خویشكا من هه‌وڵ دده‌ت ژ وێ ماڵێ بڕه‌ڤیت و به‌ر ب لاێ مالباتا مه‌ یان هه‌ر جهه‌كێ په‌نایه‌كێ لێ ببینیت دڕه‌ڤیت، هاتیه‌ دیتن كو خویشكا من ب پێخاسی ل وێ ڕۆژا كو هاتیه‌ كوشتن دكاریت هه‌تا كۆلانا ده‌رڤه‌ی ماڵێ ژی بڕه‌ڤیت و بڤی ره‌نگی دكه‌ڤیته‌ به‌رچاڤێ خه‌لكه‌كێ و ده‌نگێ قێژی و هاواریان خه‌لكێ لسه‌ر دجڤینیت و ئه‌ڤ ڕه‌وش دكه‌ڤیته‌ به‌ر چاڤێ خه‌لكێ، لێ ئه‌ندامێن ڤێ خێزانێ خویشكا من ب زۆڕێ و خشاندنێ ڤه‌دگه‌ڕیننه‌ ماڵێ كو د هه‌مان ڕۆژێدا ژی بڕه‌نگه‌ك مژه‌وی گیانێ خۆ ژده‌ست دده‌ت، یان ب واتایه‌ك دی دهێته‌ كوشتن.
ماڵباتا وی زه‌ڵامی پشتی ڤێ بۆیه‌رێ ڕادبن ب دروستكرنا سناریۆیه‌كا سه‌خته‌كارانه‌ كو وه‌ك ژ سه‌رده‌ما ڕژێما به‌عس ژبۆ وان ئه‌ڤ چه‌مك ب میرات مابیت دیمه‌نه‌كێ ب ڕێكو پێك ژ ژۆره‌كا هه‌لاویستنێ و ده‌ریه‌كێ قفل كری و په‌نجه‌ره‌كا شكه‌ستی ل ژۆرا نڤستنا هژیانا خویشكا من دڤه‌هینن ب ره‌نگه‌كێ كو گوایه‌ وێ بخوه‌ خوه‌ خه‌ندقاندیه‌ و وان ب ڕێا شكاندنا په‌نجه‌رێ كارینه‌ داكه‌ڤنه‌ ژورا وێ و د ئیفادێن خوه‌ دا هژیانا خویشكا من ب خۆكوژیێ تۆمه‌تبار دكه‌ن. لی وان ب نه‌فامانه‌ ل دیف خوه‌ گه‌له‌ك به‌لگه‌یێن پڕ ئاشكرا بجھ هێلابۆن كو یێك ژ به‌لگه‌یێن هه‌ری به‌رچاڤ ئه‌و بوو وه‌كه‌ دهێته‌ زانین ئه‌و ژورا كو وان ده‌ربڕینا خۆكوژیا خویشكا من تێدا ڤه‌هاندی بانێ وێ گه‌له‌ك بلنده‌ و پشتی بشكنینێ هاته‌ زانین كو به‌ژنا خویشكا من و هه‌تا كه‌سه‌كێ ژ وێ بلندتر ژی لسه‌ر وێ كورسیكا كو د وێ مه‌زه‌لێ دا هاتبۆ دانان ناگه‌هیته‌ سه‌قفێ بانی كو كه‌فیه‌كێ ب مه‌ره‌ما خوه‌ هلاویستنێ پێڤه‌ گرێده‌ت و خوه‌ بكوژیت. هه‌ر ئه‌ڤ تشته‌ و گه‌له‌ك ئاسه‌وارێن كو لسه‌ر له‌شێ خویشكا من و شیوازێ مرنا وێ لگۆر ده‌ربرینێن پزیشكێ یاسایی ئاشكه‌را دكرن كو هژیانا خوینشكا من خوه‌ نه‌كوشتیه‌ به‌لكو ئه‌و بده‌ست یا هاتیه‌ خه‌ندقاندن، ژبه‌ركو چ ئاسه‌واره‌كێ خوه‌ هلاویستنێ لسه‌ر له‌شێ وێ دیار نه‌بوو، هه‌تا ئه‌و كه‌سێن شاهدیا ڕێوڕه‌سما ئۆلی یا ڤه‌شویشتنا جه‌نازێ خویشكا من كرین ده‌ربڕینێ ژ ڤێ چه‌ندێ دكه‌ن كو ئه‌ڤ ژنه‌ هاتیه‌ كوشتن نه‌ك خوه‌ كوشتیه‌.
پشتی ڤێ كریارێ ئه‌و ماڵباتا تاوانبار جه‌نازێ خویشكا من هه‌ر ب وی ره‌نگی دهێلن و هه‌وڵا برنا وێ بۆ نه‌خۆشخانێ ژی ناده‌ن. هه‌تا كو ل دوماهیێ ب هایداریا خه‌لكی كو ژبه‌ر ته‌مه‌نێ وێ یێ بچوك وه‌سا گومان دكه‌ن زارۆكا وێ مالێ یه‌ و هایداریا پۆلیسان دكه‌ن و بێ كو كه‌سه‌ك ژ وێ ماڵێ هه‌ڤڕێ بیت پۆلیس بخوه‌ جه‌نازێ خویشكا من دگه‌هیننه‌ نه‌خۆشخانێ. د هه‌مان ڕۆژێ دا زاڤایێ مالا مه‌ یێ دی كو ب مه‌ره‌ما كاره‌كێ خوه‌ دگه‌هینته‌ وی جهی دبینیت یێك ژ تاوانباران یا بناڤێ هه‌لبین كو دشا هژیانا خویشكا من بوو ژ ماڵێ دڕه‌ڤیت و هه‌تا ماوه‌یه‌كێ ژی خوه‌ وندا دكه‌ت. پاشی ژی د ئیفاداندا دبێژیت ئه‌ز ل وێ رۆژێ ل جهێ بویه‌رێ نه‌بوومه‌، ل ده‌سپێكێ لگۆری ده‌ربڕینا پزشكێ یاسایی ژی خویشكا من وه‌كه‌ بده‌ستێ كه‌سه‌ك یان كه‌سانه‌كا هاتبیته‌ كوشتن دهێته‌ دیاركرن، هه‌تا پۆلیس دبێژنه‌ ماڵباتا من: "كچا وه‌ خوه‌ نه‌كوشتیه‌ و وه‌كه‌ دیار هاتیه‌ كوشتن" هه‌م ژی ژ مالباتا مه‌ پڕس دكه‌ن داخوازا وه‌ لهه‌مبه‌ر ڤێ تاوانێ چیه‌؟!
ماڵباتا مه‌ دبێژن مه‌ تشته‌ك نه‌ڤیت ده‌رڤه‌یی تۆلا كچا مه‌ بده‌ستێ یاسایێ كو مافێ وێ نه‌هێته‌ به‌رزه‌كرن. مالباتا مه‌ سكالاێ لسه‌رهه‌لبین ئاكره‌یی یا (دشا خویشكا من) و ته‌فیق ئاكره‌یی (هه‌ڤژینێ خویشكا من) و فاتما ئاكره‌یی (خه‌سیا خویشكا من) تۆمار دكه‌ن و لگۆر به‌لگه‌ و شه‌واهدێن به‌رده‌ست ئه‌و تاوانبار دهێنه‌ ناسین و دوو ژ وان ژلاێ پۆلیسان دهێنه‌ ده‌سته‌سه‌ركرن، هه‌م ژی ماڵباتا مه‌ ب گوژمێ پاره‌كێ زێده‌ پارێزه‌ره‌كی ژبۆ كه‌یسا كوشتنا خویشكا من دادمه‌زرینن. لێ پشتی ماوی 2 هه‌یڤا تاوانبار ژلاێ ده‌ستهه‌لاتێ ڤه‌ دهینه‌ به‌ردان بێ كو بهێنه‌ دادگه‌هكرن یان هه‌ر ڕه‌نگێ گرنگی پێدانه‌كا لسه‌ر خوینا ژنه‌كا بێتاوان كو ته‌مه‌نێ وێ كێمتری 18 ساڵان بوو. ئه‌ڤ تاوانبارانه‌ ب ره‌نگه‌كێ نهێنی ژلایێ یاسایا ده‌ستهه‌لاتا خێله‌كیا هه‌رێمێ بێ كو ماڵباتا مه‌ بهینه‌ ئاگه‌هداركرن هاتنه‌ به‌ردان وده‌ری لسه‌ر كه‌یسێ ڤێ تاوانا گران و نه‌مرۆڤانه‌ دهێته‌ گرتن.
لگۆری ده‌ربڕینێن پارێزه‌رێ كه‌یسا كوشتنا خویشكا من وی دگۆت: ته‌ڤاهیا به‌لگه‌ و شه‌واهدان ڤێ دده‌نه‌ دیاركرن كو كچا وه‌ هاتیه‌ كوشتن لێ ئه‌ڤ بنه‌ماڵه‌ ده‌ستێ وان دناڤ ده‌ستهه‌لاتێ دا گه‌له‌ك بهێزه‌ له‌وره‌ ئه‌م نه‌كارین ل هه‌مبه‌ر ده‌ستهه‌لاتێ ڕاوستین.
پشتی وێ ژی ده‌ستهه‌لاتێ ته‌ڤاهیا به‌لگه‌یێن كو دسه‌لماند ئه‌ڤ ماڵباته‌ تاوانبارن هه‌موو ژ فایلێن یاسایێ ژناڤبرن.
خوینا خویشكا من یا گه‌نج و بێتاوان ب ده‌ستێ ڤێ ماڵباتا هۆڤ سیفه‌ت لژێر یاسایا ده‌ستهه‌لاتێ ب عه‌ردێ دا چۆ، ماڵباتا من ب بێ مام و پسمام و كه‌سوكار ب لاوازی و بێچاره‌یی مان بێ كو بكارن تشته‌كێ بكه‌ن وه‌كه‌ كو ئه‌ڤ تاوانا مه‌زن لسه‌ر خویشكا من په‌ژراندبن وه‌كه‌ بێچاره‌یان ئێدی بێده‌نگ مان و گۆتن دادا خوه‌ ئه‌م ژ خودێ دخازین..
تو بێژی تنێ ژبه‌ر كو خویشكا من ژنه‌ك بۆ وه‌كه‌ كه‌سێ بهاێ مرۆڤه‌كێ پێ نه‌هێته‌دان تاوانا لسه‌ر وێ هاتیه‌ كرن نه‌هێته‌ دیتن. هه‌تا تاوان و تراژدیایه‌ك بڤی ڕه‌نگێ قه‌ت رۆژه‌كێ نه‌كه‌ته‌ لاپه‌ڕێن ڕۆژنامه‌یان ژی و پر ب ساده‌ییڤه‌ هاته‌ ژبیركرن. لێ من چ جارا ئه‌ڤ بێدادیه‌ نه‌په‌ژراندیه‌ و ئه‌ز هه‌تا دوماهیێ داواكارێ خوینا خویشكا خوه‌ ژ ڤێ بنه‌مالێ مه‌ و هه‌تا دادگه‌ها حكومه‌تا هه‌رێمێ ژی دگه‌ل ڤێ تاوانا هۆڤانه‌ هه‌ڤده‌ست لێ هات و ل شوینا دادوه‌ریا لسه‌ر كه‌سێن تاوانان ده‌رحه‌قێ ڤان ڕه‌نگێ مه‌زلوماندا دكه‌ن به‌ره‌ڤاژی بۆیه‌ ده‌سته‌كده‌رێ تاوانباران و دادگه‌ھ كریه‌ ئامیره‌ك ژبۆ نخافتنا تاوانێن تاوانباران و به‌رزه‌كرنا مافێ زوڵملێكریان.
تاوانبارێ كو هه‌ڤژینێ خویشكا من بۆ وه‌ك چه‌وا پێشتر ژی چه‌ندین تاوانێن دی دبارا ژنین دگه‌ل زه‌وجین پێك ئیناین نها ئازاده‌ و دبیت لژێر سایا ڤێ یاسایا نه‌دادوه‌رانه‌ هێژی ل دیف كه‌مینه‌ك دی بیت یان چه‌ندین تاوانێن دی یێن هۆڤانه‌ پێك ئینابن. هه‌لبه‌ت پشتی قه‌تل كرنا خویشكا من ب لێكۆلینێن مه‌ یێن به‌رفره‌ھ ژنوو گه‌له‌ك زانیاریێت لسه‌ر تاوانێن ڤێ ماڵباتێ ژبۆ مه‌ ئاشكرا بوون.
ئه‌ڤ ماڵباتا فه‌ودال بنه‌ماله‌ك خوه‌دیێ گه‌له‌ك تاوانێن دێرین و نوو نه‌ و خوه‌دیێ مێژوویه‌كا پڕ ڕه‌شێن كوشتن و تاوانانه‌، ل سه‌رده‌مێ ڕژێما به‌عسدا ئه‌ڤ مالباته‌ دخزمه‌تا وی ڕژێمێ دا بوویه‌ و ب به‌لگه‌ و شاهدیا گه‌لێ ده‌ڤه‌رێ، هه‌تا خه‌سویا خویشكا من ژی یا بناڤێ فاتما كو ناڤداربوو ب (فاتۆكا ئاكره‌یی) ل سه‌رده‌ما خوه‌ مسته‌شارا ڕێما به‌عس بویه‌ و دخزمه‌تا ده‌زگایێ هه‌والگریا وێ ڕژێمێ دا گه‌له‌ك تاوانێن مه‌زن ل هه‌مبه‌ر گه‌لی ده‌ڤه‌را به‌هدیناندا كرینه‌‌، ئیرۆ ژی ب هه‌مان شێواز دیسان د خزمه‌تا ده‌زگایێ پاراستنا پارتیدا بوون، وی ده‌می دخزمه‌تا دیكتاتۆریا عه‌ره‌بی خوینا گه‌لێ مه‌ یێ ده‌ڤه‌رێ ب ده‌ست و تلیێن ڤێ بنه‌ماڵێ ڤه‌ بوون، ئیرۆژی ب ژن و كچ و مێرڤه‌ لژێر دیكتاتۆریه‌تا كوردی دیسا خوینا مه‌ ب ده‌ست و تلیێن وانڤه‌ یه‌. فاتۆكا ئاكره‌یی یا دایكا (ته‌فیق)ێ كوژه‌رێ خوشكا من ژنه‌ك بویه‌ كو ل ژێر سایا دیكتاتۆریا به‌عسدا داییم ب چه‌ك بویه‌ و وی ده‌می كه‌سێ نه‌دكاری ل دژی وێ راوستیت، ئیرۆ ژی هه‌مان ڕۆلی دگێڕیت لێ ڤێ جارێ لژێر سایا دیكتاتۆریه‌ته‌ك كوردی. ماڵباته‌ك كو هه‌ر ژ كه‌ڤن تا نها ژی داییم ب زۆڕداری و زوڵما خوه‌ ژبۆ گه‌لێ ده‌ڤه‌رێ دیسا جهێ ترسێ بوونه‌ و گه‌له‌ك تاوانێن كوشتنان ل ڤان ساڵێن بۆری ب پارا قه‌ره‌بۆ كرینه‌، كو ئه‌و ژی لژێر پارێزڤانیا ده‌ستهه‌لاتا بێدادیا هه‌رێمێ كرینه‌ كو وه‌ك دهێته‌ زانین هه‌رده‌م ڕژێمێن خوه‌سه‌پین پێویستی ب ڤان ڕه‌نگێ ماڵباتان هه‌بوینه‌ و بكار ئینانه‌.
ئه‌ڤ مالباته‌ نها ده‌ستێ وان دگه‌ل ده‌ستهه‌لاتێ خورته‌، ژ خوشك و دایكێ بگره‌ هه‌تا گه‌نج و كالێن ڤێ ماڵباتێ هه‌روه‌ك به‌رێ كو ژێر سایا ڕژێما به‌عس، ئیرۆ ژی ژێر سایا ڤێ ده‌ستهه‌لاتێ د داموده‌زگایاندا خوه‌دی هێزن. هه‌مان ماڵباتێ گه‌فێن كوشتنێ ل براێ من ژی كرن و ب پشتگیریا ده‌ستهه‌لاتێ براێ من ژ كارێ خوه‌ ژی هاته‌ لادان، تنێ ژبه‌ر كو ژ ده‌ڤێ براێ من ده‌ركه‌تبۆ كو گۆتبۆ خویشكا من هاتیه‌ كوشتن نه‌ك خوه‌ كوشتیه‌.

دەقی ئەم تێکستە لەم لینکەدا بە ڤیدیۆ گوێ لێبگرە