هێشتا ڕاپۆرتا ئیكه‌ما لسه‌ر گه‌نده‌لیێت ده‌ستهه‌لاتا هه‌رێمێ به‌رسڤا خۆ بدروستاهی وه‌رنه‌گرتی ڕاپۆرته‌كا دی یا ناڤده‌وله‌تی لسه‌ر پێشێلكاریێن ده‌ستهه‌لاتا ماڵا مه‌سعود بارزانی به‌ڵاڤبوو.

ڕێكخراوا هیۆمان رایتس وۆچ یا ناڤده‌وله‌تی ژبۆ مافێن مرۆڤ ل نویترین ڕاپۆرتا لسه‌ر ده‌ستهه‌لاتا هه‌رێما كوردستانێ ڕاگهاند: "ل هه‌رێما كورستانا عێراقێ ل سالا 2022 ده‌ستهه‌لاتدارێن هه‌رێمێ ژبۆ ئارمانجگرتنا ڕه‌خنه‌گرێن ده‌ستهه‌لاتێ، یاسایا په‌یڤا نه‌شه‌فاف بكار ئینانه‌ تنێ ژ ئه‌گه‌را ده‌ربڕینا وان ژ بۆچونێن خوه‌ و ڕه‌خنه‌گرتن به‌رامبه‌ر وان بابه‌تێن كو ژێ نه‌ڕازینه‌"

د ڕاپۆرتا ساڵانه‌یا خوه‌ دا ڤێ ڕێكخراوێ ڕاگهاند د مانگا ئابدا ده‌ستهه‌لاتدارێن هه‌رێمێ به‌ری خۆپێشاندانا كو ژلاێ ڕه‌خنه‌گرێن حكومه‌تا هه‌رێمێ پلان ژبۆ وی هاتبۆ‌ داڕشتن و بانگه‌وازیا وێ هاتیه‌ كرن، ب ده‌هان ڕۆژنامه‌ڤان و چالاكڤان ده‌سته‌سه‌ر كرینه‌.

ڕێكخراوا ناڤبری هه‌م ژی دده‌ته‌ دیاركرن: سێ ژ وان كه‌سێن هاتینه‌ ده‌سته‌سه‌ركرن و بۆ ماوه‌كێ كورت هاتینه‌ ڕاگرتن، ئه‌ندامێن جڤاتا نوینه‌رێن عێراقێ بوون، ب هه‌مان شێوه‌ ل ساڵا 2021 دادگه‌ها تاوانێن هه‌ولێرێ سزاێ شه‌ش ساڵ زیندانی كرنێ ب سه‌ر سێ ڕۆژنامه‌ڤان و چالاكڤاناندا سه‌پاندیه‌.
ئه‌ڤ ڕاپۆرتا ڕێكخراوا هیۆمان ڕایتس وۆچ پشتی ڤێ دهێت كو ئه‌ڤرۆ حكومه‌تا هه‌رێمێ د به‌رسڤا ڕاپۆرته‌كا وه‌زاره‌تا ده‌رڤه‌ یا ئه‌مریكا ڕادگه‌هینیت "تا دوماهیك ڕاده‌ ئازادیا ڕاده‌ربڕینێ ل هه‌رێمێ هه‌یه‌، چاڤكانیا زانیاریێن ئه‌مریكا ژی نه‌حه‌زێت حكومه‌تا هه‌رێمێ نه‌.

د ماوێ چه‌ند ساڵێن ده‌ربازبوویی دا چ ڕاپۆرته‌كا ناڤده‌وله‌تی نه‌بۆیه‌ كو به‌حسێ ڕه‌وشا ئازادیا ڕاده‌ربڕینێ و حوكمڕانیا حزبێن ده‌ستهه‌لاتا ل كوردستانێ ب باشی كربیت.