ئه‌ز عاشقێ كچا مه‌سعود بارزانیمه

Thursday, 05.04.2023, 11:31 AM

ئه‌ز عاشقێ كچا مه‌سعود بارزانیمه
"سه‌رده‌شت عوسمان"‌

وی ب زمانه‌كێ سیاسیا كۆمیدی ڕه‌خنه‌یی نڤیسه‌كا زۆر ب واته‌ نڤیسابوو، كو نوكه‌ بۆیه‌ لاپه‌ڕه‌كێ مێژویا قڕێژا بنه‌ماڵا بارزانی و دێ هه‌ر مینیت.
هه‌كه‌ سه‌رده‌شت عوسمان نه‌هاتبا تیرۆر كرن، بێ گومان دا ئه‌ڤ نڤیسینه‌ هه‌ر وی ده‌می به‌رزه‌ بیت و نه‌دما.
لێ نوكه‌ ئه‌ڤ نڤیسینه‌ چ بساڵانه‌ هه‌ر جار دهێته‌ دۆباروه‌كرن و ڤه‌گێڕان و نویكرن، ئه‌و چ جارا كه‌ڤن نابیت و دێ بۆ مێژوویه‌كا هه‌تا هه‌تایی هه‌ر مینیت.
هندی دیرۆكا كورداتیێ هه‌بیت دێ نفشێ كوردا ڤێ ناما تراژیدیا و پڕ واته‌ خوینن و نه‌فره‌تا ل ده‌ستهه‌لاتا خێله‌كی و بنه‌ماڵه‌یی و دز و گه‌نده‌ل كه‌ن و دێ ب بچمێ وان یێ بێ فام كه‌نه‌ كه‌نی و دێ ل دیف نڤیسینێن دی یێن سه‌رده‌شت عوسمان گه‌ڕن و دێ قه‌ستا مه‌زارێ وی كه‌ن.
ژبۆ كو نفشێ پاشه‌ڕۆژێ ئیدی یێ نه‌زان نابیت، دێ ئێك دنیا فه‌لسه‌فه‌ و دیرۆك و راستی و سه‌ربۆرا ژ ڤێ كورته‌ نڤیسێ و ڤێ بنه‌ماڵێ و ڤی گه‌نجێ هزر ئازادێ تیرۆركری ده‌رێخن!

سەردەشت عوسمان چ گوت؟ :-
ئه‌ز عاشقێ كچا مه‌سعود بارزانیمه
"سه‌رده‌شت عوسمان"‌
ئه‌و زه‌ڵامێ كو جارجار ده‌ردكه‌ڤیت و دبێژیت ئه‌ز سه‌رۆكم، لێ پا ئه‌ز حه‌زدكه‌م خه‌زیرێ من بیت، ئانكۆ من دڤێت ببمه‌ هه‌ڤلنگێ نێچیرڤانی.
هه‌كه‌ ببمه‌ زاڤاێ بارزانی، دێ هه‌یڤا خوه‌‌ یا هنگڤینی ل پاریسێ بۆرینین و ئێك دوو شه‌ڤه‌كا ژی بۆ سه‌ره‌دان دێ چینه‌ كۆچكا مامێ خۆ ل ئه‌مریكا. دێ ماڵا خوه‌ ژ تاخێ هه‌ژارا یا هه‌ولێرێ گوهێزم بۆ سه‌رێ ڕه‌ش و ب شه‌ڤا دێ سه‌یێن ئه‌مریكی و پاسه‌وانێت ئسرائیلی چاڤدێریێ ل ماڵا من كه‌ن.
بابێ من یێ خۆلیسه‌رێ پێشمه‌رگێ ئه‌یلولێ ژی كو هه‌تا نوكه‌ پارتی خزمه‌تا پێشمه‌رگاتیا وی په‌سند ناكه‌ت ب ڤێ حێجه‌تێ كو نوكه‌ ئێدی پارتی نینه‌، ئه‌ز دێ كه‌مه‌ وه‌زیرێ پێشمه‌رگه‌.
براێ خۆ یێ فه‌قیر و خۆلیسه‌ر ژی كو زانكۆ بدوماهیك ئینایه‌ و بێكاره‌ و دڤێت ب قه‌چاخی بچیته‌ ده‌رڤه‌ی وه‌ڵاتی، دێ كه‌مه‌ به‌رپرسێ پاسه‌وانێت خۆ یێن تایبه‌ت.
خوشكا من ژی كو هه‌تا نوكه‌ شه‌رم دكه‌ت بچیته‌ بازاڕی دڤیا وه‌كو كچێت بارزانی پڕادۆ و وه‌نه‌وشه‌یا بهاژۆت.
دایكا من ژی ژبه‌ر كو نه‌خوه‌شیا شه‌كرێ و یا دلی و زخت هه‌یه‌ و پاره‌ نینن نەشته‌رگه‌ریا ده‌رڤه‌ی وه‌ڵاتی بۆ بكه‌ین، دێ دوو نوژدارێن ئیتاڵی ل مال ژبۆ وێ دامه‌زرینم.
بۆ مامێت خۆ ژی دێ چه‌ند كۆچكا ڤه‌كه‌م و پسمام و كوڕخالێت خۆ دێ هه‌میا كه‌مه‌ نه‌قیب و عه‌مید و لیوا.
لێ هه‌ڤاڵێن من دبێژنه‌ من: "كوڕۆ سه‌رۆ ڕوینه‌ خارێ خوه‌ نه‌ده‌ كوشتن، ئه‌ڤه‌ ماڵا مه‌ڵایه‌ هه‌ما ھەگەر گۆتن هه‌ڕڕه‌، ئێدی دێ كارێ ته‌ بدوماهیك هێت" باشه‌ خو من كوفری نه‌كرینه‌ سویند ب ده‌ستكێ خه‌نجه‌را مه‌ڵامسته‌فای كه‌م، ئدریس بارزانی دگه‌ل بابێ من سێ شه‌ڤا ل بن ته‌حته‌كێ چیای ڕۆژ پێكڤه‌ بۆراندینه‌، ما چ تێدا هه‌یه، بلا هه‌ر مه‌سعود بارزانی خۆ بسه‌رۆك بزانیت، هه‌كه‌ ژ ڕاستا سه‌رۆكه‌ بلا بێژیت ل ڤان هه‌ژده‌ ساڵێت بۆریدا چه‌ند جارا سه‌ره‌ك ل تاخه‌كێ هه‌ولێری و سلێمانیێ دایه‌‌؟
به‌س كێشا من ئه‌ڤه‌یه‌ ئه‌ڤ زه‌ڵامه‌ هند مرۆڤه‌كێ عه‌شایریه‌ ل وی سه‌رێ ڕه‌ش هێرڤه‌تر كه‌سه‌كێ ب زه‌ڵام نزانیت، ژنا هه‌موو سه‌رۆكێت دنیاێ بڕێكا ئێك كلیكێ په‌یدا دكه‌م، لده‌مه‌كێ كو هه‌تا نوكه‌ نزانم خه‌سیا من شكلێ وێ چه‌وایه‌.
‌نزانم بۆ خازگینا كێ دگه‌ل خوه‌ ببه‌م؟
ل ده‌سپێكێ من ڤیا چه‌ند مه‌ڵا و ڕێدین سپی و پێشمه‌رگێن كه‌ڤن لهه‌ڤ كۆم بكه‌م و ئێڤاره‌كێ ناڤێ خودێ بینین، لێ هه‌ڤاڵه‌كێ من یێ ڕۆژنامه‌ڤان گۆتی: "كوڕێ باش هه‌ره‌ هنده‌ك جاش و ئه‌نفالچیا په‌یدا بكه‌ و ببه‌، مه‌سعود گه‌له‌ك حه‌ژ وان دكه‌ت".
براده‌ره‌كێ دی گۆتی وڵاهی هه‌كه‌ ب گۆتنا من بكه‌ی ل كۆنگره‌كا ڕۆژنامه‌ڤانیا نێچیرڤان بارزانیدا هه‌ڕه‌ خۆ بده‌ بن باڵێ ویدا و بێژێ وڵا من شۆله‌كێ خێرێ یێ هه‌ی، یان ژی هه‌كه‌ چێ نه‌بۆ كورۆ هه‌ما بێژه‌ "ده‌شنێ" ئه‌و زوو ب زوو وان دبینیت بێژێ دێ بۆ ته‌ ڕێك ئێخیت.
سه‌رده‌شت عوسمان شه‌هیدێ پێنوسی