ل ڕۆژه‌ك وه‌ك ئه‌ڤرۆ ڕێكه‌ڤتی 26\10\1969 تاكه‌ژنه‌ پێشمه‌رگه‌یا قه‌هره‌مانا لناڤ ڕێزێن پارتی هاته‌ ته‌جاوزكرن و تیرۆركرن.

مارگارێت كچا مالباته‌كا كورد يا خريستيانا ئاسورى د سالا1941 ل ده‌ڤه‌را به‌روارى بالا سه‌ر ب دهۆكێ ژدايك بويه‌. ل سالا 1960 ده‌سپێكێن شۆره‌شا ئێلولێ یا كو وی سه‌رده‌می ب شۆره‌شه‌كا نه‌ته‌وه‌یی ناڤ ده‌ركربۆ د ته‌مه‌نێ 19 ساليێ دا ل كێله‌ك بابێ خوه‌ ''جۆرج مالك'' ته‌ڤلی ڕێزێن پێشمه‌رگا دبیت. مارگرێت بۆ ماوێ 9 ساڵان لهه‌مبه‌ر ڕژێما به‌عس ڤی خه‌باتێ به‌رده‌وام دكه‌ت، ئه‌ڤ كچا كوردا ئاسوری چه‌وا كو ب شه‌رڤانى و جه‌ساره‌تا خوه‌ لسه‌ر زار و زمانان بو، د هه‌مان ده‌مێ دا ب جوانی و به‌ده‌ویا خوه‌ ژی بناڤ و بانگ بو.

ژنا كو د شێواز و ڕفتار و كه‌ساتيا خوه‌ دا ل سه‌رده‌مێن سالێن شێستان دا ببو ميناك و سيمبوله‌ك دچاڤێ ژنێن چه‌وسى لژێر باندۆرا بالاده‌ستيا مێران ل وى سه‌رده‌مى و پڕ باندۆر خستبو سه‌ر ژنان.

كو لگۆرى كو خويشكا وێ ''ڕۆزا ''د چاڤپێكه‌فتنه‌كێ دا كو د ڕۆژنامه‌يا ئازاديا وه‌لات دا هاتيه‌ وه‌شاندن دبێژيت: "باندۆرا مارگارێتێ ل سه‌ر ژنان گه‌له‌ك زێده‌ بوو، وێ گه‌له‌ك پێنگاڤێن مه‌زن هاڤێتن بۆ كو گه‌نج ته‌ڤلی ناڤ ڕێزین تێكۆشینێ ببن، وێ دگۆت شۆره‌ش تنێ شه‌ر ل چيايان نينه‌، خریستیان و موسلمان گه‌له‌ك ژێ باندۆر دبوون. 9 سالێن د ناڤا ڕێزێن پێشمه‌رگێن كورد هه‌موو چیایێن هه‌رێما به‌رواريان دابۆ بن پێیان. ئە‌و و بابێ من چ جارا ژ هه‌ڤدوو جودا نه‌دبوون, ل كێله‌ك بابێ من دكه‌تنه‌ ناڤ شه‌ران و به‌رده‌وام پێكڤه‌ دبوونه‌ شاهدێ سه‌ركه‌فتن و خوشی و نه‌خوه‌شیان، وێ بڕيار گرتبو كو حه‌تا مرنێ دناڤا شۆڕه‌شێ و به‌رخوه‌دانێ دا بمينیت، وێ دگۆت ئەز ژنا چیا مه‌ و چ جاران نازه‌وجم. نابیت چ جارا مارگارێت بهێته‌ ژبير كرن.".

ئه‌و خوه‌دى ئيراده‌ و هه‌ست و خاسته‌ك وه‌سا سه‌ربخوه‌ بو كو تشته‌كێ نه‌دكارى به‌رسينگا شۆڕ و هه‌ستێن وێ يێن به‌رپرسياريا ئازادى و به‌رخوه‌دانێ ڕاوه‌ستیت. ژنه‌ك بڤى ڕه‌نگى دكارى ل وى سه‌رده‌مى ڕۆله‌كێ گرنگ د پێشه‌نگاتيا ژنا كورد دا بگێڕیت، دكارى ڕۆله‌ك گرنگ ژبو پێشخستنا ئيراده‌يا ژنا كورد بگریته‌ ووستو، ژنا كو هه‌رتم هه‌ڤده‌رد و خه‌م ل كێله‌ك و مل ب ملێ مێڕێ كوردێ شۆڕه‌شگێر ڕاستى ئازار و دژوارى و نه‌خوه‌شيان هاتی، دكارى ببيته‌ ميناكه‌ك ژ پێكڤه‌ ژيان و فه‌ره‌ ڕه‌گه‌زى و فه‌ره‌ ئۆلى و فه‌ره‌ نه‌ته‌وى ژبو لاپه‌ڕێن ديرۆكا كوردا، لێ مارگارێت دكه‌ڤیته‌ به‌ر پێلین شه‌هوه‌تا قڕێژا كه‌ساتیێ كو بناڤێ سه‌ركرده‌ێ نه‌ته‌وتا كورد پێناسه‌ دبۆ، مسته‌فا بارزانی كو چ جارا ده‌رونێ وی یێ ناپاك نه‌ ژ شه‌هوه‌تا ده‌ستهه‌لاتدارێ و نه‌ ژی ژ شه‌هوه‌تا جنسی تێر نه‌دبۆ، بڤی ڕه‌نگی ده‌ستێ خۆ درێژی مارگارێتا كچا شه‌هیدێ هه‌ڤسه‌نگه‌رێ خۆ دكه‌ت و بڤی ڕه‌نگی به‌رسڤا تێكۆشین و خوین و كه‌دا هه‌ڤال و هه‌ڤخه‌باتێ خوه‌ دده‌ت. ئه‌ڤ كریارا مه‌لا مسته‌فا درێژیێ په‌یدا دكه‌ت تا ئاستێ كۆ ئێدی حه‌مایلا هه‌ڤژینا مه‌ڵامسته‌فا ئاگه‌هداری ڤێ چه‌ندێ دبیت و بڕیارێ لسه‌ر كوشتنا وی دده‌ت و مه‌لامسته‌فا خوه‌ نه‌چار دبینیت وێ بكوژیت، بڤی ڕه‌نگی ئه‌سحه‌د خۆشه‌وی هه‌ڤال و هه‌ڤسه‌نگه‌ره‌كێ دی یێ بابێ مارگارێتێ ژبۆ ڤی تاوانێ دهێته‌ ئه‌ركداركرن.

كێ دزانیت، دویر نینه‌ "جورج مالك"ێ بابێ مارگارێتێ ژی هه‌ر پێخه‌مه‌تی ڤێ تاوانێ و ژبۆ بده‌ستڤه‌ ئینانا كچا وی ب پیلان هاتبیته‌ كوشتن.

ب بڕیارا مه‌ڵامسته‌فا و حه‌مایلا كچا مه‌حمودئاغاێ جاشێ حكومه‌تا به‌غدا، ئه‌سحه‌د خۆشه‌ڤی دهێته‌ ئه‌ركداركرن و ئه‌و ژی دگه‌ل گرۆپه‌كا پێشمه‌رگێن خوه‌ ل شه‌ڤا 1969/10/26 كچه‌ گه‌نجا ئاسوری مارگارێت جورج سه‌هلۆ ب ته‌عدا و د وێ ته‌مه‌نێ گه‌نجاتيێ دا پشتی 9 سالان خزمه‌ت و خه‌باته‌كا چه‌له‌نگانه‌ و نه‌ته‌وه‌یى بو كوردان د ته‌مه‌نێ 28 سالیێ دا ل ده‌ڤه‌را كانی ماسێ ژلاێ ئه‌سحه‌د و چه‌كدارێن دگه‌ل دا دهێته‌ گوله‌بارانكرن و جه‌نازێ ڤێ ژنا تێكۆشه‌ر ل دۆڵا قومریێ ب بێ نرخی دهێته‌ هاڤێتن..

پلانا قرێژا كو تا ڤى سه‌رده‌مى هێشتا ژ ئه‌گه‌را به‌لگه‌ێن تاوانا سكس په‌رستیا سه‌ركردێن پارتیا مالا بارزانی و ژێده‌رێ بڕيارا ڤێ تیرۆرێ و وان ده‌ستێن غه‌دارێن لپشتا په‌رده‌يان، تشته‌ك نه‌هاته‌ به‌لاڤكرن و ئاشكرا كرن.

تا رۆژا ئیرۆ ژی ماڵباتا مارگارێتێ دزانن كو ئه‌ڤ تاوان ژلاێ مه‌لامسته‌فا و حه‌مایلێ بڕیار لسه‌ر هاتیه‌ دان، لی لبه‌ر چاڤێ ڕایا گشتی جه‌ساره‌تا ڤه‌گێڕانا ڤێ تاوانێ نینن.

وه‌كه‌ كو گۆتنا ڕۆزايا خويشكا مارگارێتێ كو ل ماڵپه‌را ئاژانسا فرات دا دبێژيت: (كه‌س نزانیت ئه‌و چاوا هاته‌ كوشتن. شه‌ڤه‌كێ دهێته‌ گوله‌بارانكرن ل گه‌ليێ قومريێ دهێته‌ هاڤێتن، هه‌تا نوكه‌ ژى كه‌س نزانیت چاوا و بۆچی هۆسا كریت هاته‌ كوشتن. ل وى جهێ بريارگه‌هێ ته‌نێ ئه‌و هاتبو كوشتن. هه‌ر كه‌سێ دگۆت كچا ئاسۆرى ب ده‌ستێ كوردان هاته‌ كوشتن، لێ مه‌ نه‌ڤیا كه‌سێ تاوانبار بكه‌ين)

ژ خويشكا مارگارێتێ دهێته‌ پڕسين ئه‌رێ وه‌ چ جارا ژپارتیا مالا بارزانی كو مارگارێت ئه‌نداما وان بو پڕسیار نه‌كريه و وه‌ ژێ نه‌خاستیه‌ كو ئه‌نجاما لێكولینا لسه‌ر ڤێ تیرۆكرنێ چ بۆیه‌؟ ڕۆزا دبێژيت: ( هه‌تا ڤى ده‌مى مه‌ پرسیار نه‌كریه‌)

ل ڤێڕێ ئاشكرایه‌ كو ئه‌و به‌رسڤا پرسێ دزانن له‌وما ژ مه‌زلومیه‌تا خۆ نه‌كارینه‌ هه‌تا پڕسیار بكه‌ن كانێ ئه‌گه‌را ڤێ كوشتنێ چبۆیه‌. دیاره‌ تاوانبار ده‌ستێ سه‌ركرداتیا وی ده‌می یا پارتی بۆیه‌ و ده‌ستێ راسته‌وخۆێ مه‌لامسته‌فا د ڤێ بابه‌تێ دا هه‌یه‌، ئه‌گه‌ر نه‌ دا په‌یامه‌كێ یان رۆنكرنه‌كێ بۆ مالباتا مارگارێتێ هنێرن.

ل ڤێ ده‌رێ وه‌كی ڕۆژێ دیاره‌ كو ئه‌گه‌رێن پێ نه‌ئاخڤين و ڤه‌شارتنا ڤێ تاوانا كوشتنا قڕێژ د قوناغا ڤان هه‌می سالێن ده‌رباسبويى و وه‌كه‌ نهێنى مانا وێ ئه‌وه‌ كو مژار گرێدای سه‌ركردێن شۆره‌شێ یه‌ و كه‌سێ ئه‌و جه‌ساره‌ت نه‌بويه‌ قه‌ت لسه‌ر ڤێ تشته‌كێ بێژیت‌.

هه‌لبه‌ت ژى تا نها نه‌ ئه‌ندامێن مالباتا وێ و نه‌ چ كه‌سێن ڕێهه‌ڤالێن كو وى سه‌رده‌مى دگه‌ل مارگارێتێ بوین و چ يێن كو ئه‌و ناس كرىن ژ كه‌ڤن تا نهو كو مايين، كه‌سه‌كێ گومان و گۆتنه‌ك نه‌ڕێك لسه‌ر كه‌ساتيا ڤێ ژنێ د بوارێن ڕه‌وشتى دا نه‌بويه‌.

كه‌سێن كو ژ نێزیكڤه‌ ئه‌و ناسكرین يان لسه‌رده‌ما وێ ژيان كرین هه‌می لسه‌ر ڤێ ڕايێ نه‌ كو ئه‌و ژنه‌ك زۆڕ خوه‌ڕاگر و بهێز و بليمه‌ت بويه‌، لێ د هه‌مان ده‌م دا ژنه‌ك تا دوماهیك ئاست جوان و به‌ده‌و و بڕێك و پێك بويه‌ و چاڤێ هه‌ركه‌سى لێ ڕانه‌دبوو.

ژنا كو دايكا وێ چل سالان ڕه‌شكا وێ گرێ دده‌ت و جلێن وێ يێن شۆڕه‌شگري هلدگريت و شيره‌ت دكه‌ت پاشى مرنێ وێ ب وان جلانڤه‌ بسپێرنه‌ ناڤ ئاخێ و ل دوماهیێ ژى دگه‌هيته‌ وێ مرادا خوه‌ و ده‌مێ وه‌فات دكه‌ت جلێن مارگارێتێ ژی دگه‌ل وێ پێكڤه‌ ڤه‌دشێرن.

دایكا مارگارێتێ ل وی سه‌رده‌می كه‌سێ خوه‌ نه‌بو و ب بێ كه‌سى ل حه‌ينێ مارگارێت هاتى شه‌هيد كرن ئاگه‌هدار دبیت و ژلاێ هنده‌ك كه‌سا جهێ ڤه‌شارتنا كچا وێ ل دۆڵا قومریێ نیشا دده‌ت، ئه‌و ژى ب بێ كه‌سی ب كارێ ڤه‌شارتنا كچا خوه‌ ڕاببيت و جه‌نازێ وێ لسه‌ر پشتا هه‌سپی سوار دكه‌ت و ژ دۆڵا قومریێ ڤه‌دگوهێزیت و بده‌ستێ خوه‌ ب تنێ دسپێریته‌ ئاخێ، بێ كو كه‌سه‌ك نه‌ وی سه‌رده‌می و نه‌ پشتی وی و نه‌ ئیرۆ ڤێ جه‌ساره‌تێ بده‌ته‌ خوه‌ و ژ ڤێ بنه‌ماڵا غه‌دار پرسیار بكه‌ت كانێ ئه‌ڤ ژنا قه‌هره‌مان چه‌وا و بۆچی هۆسا ب بێ روومه‌تی هاته‌ كوشتن؟! پرسیار بكه‌ت ئه‌گه‌را كوشتنا وێ ب ڤی ره‌نگێ كریت و بێ دادگه‌هكرن چبويه‌؟! يان گه‌ر ئه‌ڤ كوشتنه‌ سزادانه‌ك بويه‌ بۆچی كه‌سه‌ك ژ بنه‌ماڵا مه‌لامسته‌فای د قوناغا ڤان هه‌می سالێن ده‌ربازبويى لسه‌ر تاوانا وێ نه‌ئاخڤيه‌؟!

هه‌ر كه‌سێ كو مارگارێت ناس كرى بوتا نوكه‌ ژى تنێ ژ بلنديا كه‌ساتيا وێ و ژ ئيراده‌يا ژناتيا وێ دبێژيت و نه‌زێده‌تر.

ژ زار ده‌ڤێ سه‌ركردێن پارتی دهێته‌ بهیستن كو ئه‌و ژن بده‌ستێ جاشان هاته‌ شه‌هید كرن.

لێ گۆتنێن كه‌سێن ل وى سه‌رده‌مى ژيان كرين و ب چاڤێ خوه‌ ديمه‌نێ شێوازێ شه‌هاده‌تا وێ ژنا شۆڕه‌شگێر ديتين ڤێ ئيفادا سه‌ركرداتیا پارتی ڤاڵا ده‌ردخيت، ژخوه‌ ئه‌ڤ به‌رسڤا وان گومانا كوشتنه‌ك قڕێژ‌ و گه‌مار ژلايێ وانڤه‌ زێده‌تر لێ دكه‌ت، ژبه‌ر كو هه‌كه‌ جاشا كوشتبا دا ناڤێ وێ یان وێنه‌ێ وێ و سالیاده‌كا وێ یان بابێ وێ هه‌كه‌ جاره‌كێ ژی بیت دا ل جهه‌كێ هێته‌ گێران و باس كرن.

لگۆرى ڤه‌گێرانا ته‌ڤاهیا چاڤكانیێن باوه‌رپێكری یێن پاشمايى ژ وى سه‌رده‌مى، شه‌ڤه‌كێ ب نهێنى ب هه‌بوونا ده‌ستێ ئه‌سحه‌د خۆشه‌ڤی ب بریارا حه‌مایل و مه‌لامسته‌فا دهێته‌ گوله‌باران كرن و ژلايێ گرۆپه‌كا تايبه‌ت يا سه‌ر ب بنه‌ماڵێ ته‌رمێ بێ گيانێ مارگارێتا بی تاوان ب بێ نرخى ل‌ دۆڵه‌كێ ل گه‌ليێ قومريێ دهێته‌ فڕه‌دان و كه‌سێ لسه‌ر دئاخڤيت ژى ده‌ڤێ وان دهێته‌ گرتن و گه‌ف دهێنه‌ كرن هه‌ركه‌سه‌ك لسه‌ر ڤێ بابه‌تێ خوه‌ بێده‌نگ بكه‌ت و ژ وێ ترسا ڤێ بنه‌مالا كوژه‌ك ڤه‌هاندی هه‌ركه‌سه‌ك بێ ده‌نگ دمینیت....!

لێ چ جارا كه‌سێن ئه‌و ژن ناس كرين نه‌شیانه‌ بويه‌رێ ژبير كه‌ن و ل نخێڤان به‌رده‌وام لسه‌ر ڤێ تیرۆرا مه‌زلومانه‌ دهێته‌ ئاخڤتن..

دیاره‌ كو لژێر ڤێ نهێنیێ و ديار بونا ڤێ ئه‌سرارا هه‌يى گه‌له‌ك ڕاستی نخافتى هه‌بوینه‌، نهێنيێن كو نه‌دبه‌رژه‌وه‌نديا كه‌سێن بالده‌ست ێن وى سه‌رده‌مى دانه‌، به‌لكه‌ حه‌تا سه‌ركرده‌یێن ڤى سه‌رده‌مى ژى...

پڕسه‌كا گرنگا دی ل ڤیرێ دئازريت:

ئه‌گه‌ر چيه‌ كو تا نۆكه‌ هندى كو نه‌بويه‌ دره‌نگتر، جڤاته‌ك پێكهاتی ژ ژنێن ئه‌كادمیسیه‌ن و خوه‌دى هه‌لويستێن به‌رپرسیاری ژبۆ لێكۆلينان پێك نه‌هاتیه‌ كو ب حورمه‌ت و ڕێزا خوينا خانم "مارگارێت جورج سه‌هلۆ" ڤێ ژنا تێكۆشه‌ڕ و شۆڕه‌شگێرا ئاسوريا د خزمه‌تا نه‌ته‌وا كورد دا، هه‌ول بدن ب هه‌ڤكاريا كه‌سێن پاشمايێن وى سه‌رده‌مى په‌ردێ لسه‌ر ڤێ نهێنيا كو بێهنه‌ك پڕ قڕێژ ژێ دهێت هلده‌ن و ناڤێ وێ ژ ڤه‌شارگه‌ها بێرێزيا هاتيه‌ ڤه‌هاندن بهێته‌ ڕزگاركرن؟