بەهۆی بێسەروبەری دەستەڵات و حکومڕانی و پێشکەوتنی کۆمەڵێک بەڵتەچی بێسەواد و ستەمکارەوە بە ناوی حوکمڕانی حکومەت و حزبی باڵادەستەوە، کوردستان بۆتە بازاڕێکی بەرەڵا و بێ لێپرسینەوە و بێ چاودێری بۆ هاتنە ناوەوەی کۆمپانیا و کەس و بازرگانی جۆراوجۆر و خۆشکردنی زەمینەی دزی و تاڵانی زیاتر لەگیرفانی هاوڵاتیانی کوردستان..

کۆمپانیای(QNET) لەئەنجامی ئەو بێ سانسۆری و لێنەپرسینەوەیەی بازاڕەوە و ڕەفتاری بازرگانە بە ناو سیاسیە چاوچنۆک و بێسەوادەکانەوە لەهەرێمی کوردستان و سلێمانی بە تایبەتی گەشەی کردوە و لەپشتیەوە کۆمەڵێک دز و مافیا ڕاوەستاون، کە بە ئاشکرا دزی لەهاوڵاتیانی هەرێمی کوردستان بە ناوی بازرگانی نێتوێرکین و هێنانی کاڵای بیانی و بازاڕی ئەلکترۆنیەوە دەکات.

ئەم کۆمپانیایە لەبەرئەوەی چەند جەردەیەکیان لەپشتەوەیە، بێ مۆڵەتی پارێزگای سلێمانی بێ ترس کاردەکەن و کاڵایەکی بێ نرخ بۆ مەرجی ئەندام بون بە نرخێکی گران و پارەیەکی زۆر بەو کەسانە دەفرۆشن، کە بە ناوی کارکردنەوە ڕویان تێدەکەن و دەبنە ئەندام، کە بە هیچ جۆرێک ئەندام ئەو پارەیەی داویەتی لەبری کاڵایەکی بێ بەها و مایەکەی خۆی بە دەست ناهێنێتەوە، مەگەر نزیکی خۆیان و قۆڵبڕەکانی سەرەوە بێت، مەرجی پەشیمانبونەوە تەنیا هەفتەیەکە کەچی لەکاتی پەشیمانبونەوەی ئەندامەکەدا لەو هەفتەیەدا پارەکەی بۆ ناگەڕیننەوە و دەترسن لەبەرئەوەی ژمارەی پەشیمانبوەکان زۆرن، کێشەیان بۆ دروست بکرێت و هەمویان داوای گەڕانەوەی پارەکانیان بکەن و کۆمپانیاکە متمانە و مسداقیەت لەدەست بدات، کە هەر دەمێکە ئەو متمانەیەی نەماوە و دۆڕاندویەتی...

ئەم کۆمپانیایە کاری سپیکردنەوەی پارەیە لەوڵاتی مالیزیا و بردنە دەرەوەی پارە و داهاتی کوردستانە بۆ ئەو وڵاتانە، بە بێ ئەوەی تاکە یەک سود بە ئابوری و بازاڕی کوردستان بگەیەنێت، واتە جۆرێکە لەقۆڵبڕین و تەفرەدانی خەڵکی کوردستان و بڕینی گیرفانیان، کە تەنیا چەند کەسێک لەهەڕەمی سەرەوەی کۆمپانیاکە و ئەوانەی پشتیان سودی ماددی لێوەردەگرن، سەدان گەنج و خێزانیان دوچاری قەرز و ماڵ و موڵک فرۆشتن کردوە و کێشە و گرفتی خێزانی و ئینجا ئابوری و ماددیان بۆ دروستکردون...

کۆمپانیاکە لەبەرئەوەی لەلایەن کۆمەڵێک خزم و برا و زاوا و نزیکەوە بریکاریەتی دەکرێت و زۆریشیان درۆزنانە خۆیان بە ئیماندار و موسڵمان لەقەڵەم دەدەن، بۆیە کار بۆ داپۆشینی عەیبەکانی خۆیان و خەڵەتاندنی ئەوانەی خوارەوە بە جۆرێک دەکەن، کە تەواو یەکسانە بە دزیکردن لەگیرفانی میللەت و ساختەکاری و فریودان، لەکاتێکدا یەکێتی زانایان و ناوەندە ئایینیەکان بە پێی پێوەری ئایین بە حەرامیان لەقەڵەم داوە، جگە لەوەی لەڕوی نیشتمانی و نەتەوەیشەوە دزیە لەگەڵ و فرۆشتنی ئینتمایی کوردبون و وڵاتفرۆشیە و دەچێتە هەمان خانەی دزی و ساختەکاری هەردو دەستەڵاتی حوکمڕانەوە...

تا ئێستا چەند جارێک لەلایەن لیژنەی فەتوای کوردستان و پارێزگار و کەسێتی دیار و کۆمەڵێک ڕاگەیاندنەوە کار لەسەر ساختەکاری ئەو کۆمپانیایە و ئەوانیتر کراوە و ئاگادارکراونەتەوە، کە خەریکی چی جۆرێک لەبازرگانی ڕەشن، بەڵام تا ئێستا نەتوانراوە لەلایەن پارێزگاری سلێمانیەوە سانسۆر بکرێن و مۆڵەتی کارکردنی بێ یاسایان لێوەربگیرێتەوە، لەکاتێکدا لەهەولێر و دهۆک کیونێت ناتوانێت کار بکات، بۆیە دەکرێت داواکاری گشتی وەک ئەرکێکی نیشتمانی و غەمخۆرانە بۆ ئەوە مافە خوراوەی هاوڵاتیانی وڵاتەکەیان بێنە سەر هێڵ و بەدواداچون بۆ ئەم بازرگانیە ڕەشە بکەن و ڕای گشتیان لەناو جەماوەردا لەسەر دروست بکەن بۆ ئەوەی دابخرێن و پارەی ئەو خەڵکە هەژار و لێقەوماوە بگەڕیننەوە، کە لەئێستادا ژمارەیەکی زۆری ئەندامانیان بەهۆی نەگەڕانەوەی قازانج و مایەکانیان و ڕونبونەوەی ئەو ڕاستیانەی کۆمپانیاکە کشاونەتەوە و ڕۆژانەیش لەزیادبوندان، دەکرێت ئەم ژمارە زۆرە کۆببنەوە و داوایی یاسایی و فشاریان هەتا لەدادگاکانی عێراقیش لەسەر تۆمار بکەن و داوای گەڕاندنەوەی ماف بکەن...

لەداهاتودا کۆمەڵێک بەڵگەی ئاشکرایان دەخەینە ڕو....