ڕەخنە ب تێگەهەکێ درۆست، دەربرینێ ژ دیارکرنا کێموکاسی و عەیب و کرێتیێن هەر مژارەکێ دکەت کو ب جوانترین ئاوا و پاقژ بمینیت و بەردەوام بیت، لێ دوو جورێن ڕەخنێ هەنە، ڕەخنەیا ئاڤاکەر بمەرەما باشترکرن و دەولەمەندکرنا مژارا دیارکری، رەخنا خرابکەر ب مەرەما وێ یەکێ یە کو هەمی تشتان ژ باش و خرابان خراب بکەت، ئەو مژارێن توشی رەخنێ دبن سیاسی و ئەدەبی و هونەری .. نە، لێ هند جاران دەربرینا ڕەخنا ئاڤاکەر و خرابکەر ژی ژ ڕێرەوێن خۆ دەردکەڤن و دەربرین دهێتە گوهەرتن.

ل هەرێما کوردستانێ هەر چەندە ئازادیا رادەربرینێ و ڕەخنە یا چارچووڤەکریە لێ د هەمان دەم دا ژی ئەو بیاڤێن ڕەخنە تێدا دهێتەگرتن، ژ ڕێرەوێ خۆ دەرکەتیە و رەخنەیا کومێدی جهگرتیە، هەر چەندە هەبوونا رەخنێ ب چ ئاوایی بیت دلخوشکەرە لێ ئەڤا نها دهێت دیتن رەخنا کومێدی و بەرەلا یە و وێرانکەرە، ڕەخنا کومێدی ب وێ واتایێ نینە کو کەسێن کومێدیێن کورد رەخنا کومێدی دگرن، بەلکی پتریا خەلکی توشی ڤی ئاوایێ رەخنا فشەی و کەنی و بەرەلایێ بوویە هەیا دناڤ کەسێن سیاسی و ئەکادیمی دا ژی سەرهەلدایە، ژ ترسا ڕەخنەیا ڕژد ڕەخنا کومێدی هەلبژارتیە، بێ کو هەست ب هەبوونا وێ بکەن و ژ چاڤلێکرنێ بەربەلاڤبوویە، هەڤدەم هەر بابەتەکێ بهێتە زمان ئەگەر خو مووچێ وی یێ ٦۰ رۆژان گیرووبووی ژی بیت دێ ب سەدان ڕەخنێن کومێدی و فشەی و کەنی و لیق لیق و کێمدیتی دهێنەگرتن وەکی هزر بکەی کەسەک تێر و بێمنەتە و خوشیێ ژ مژارێ دبینیت و مژار نەگرنگە و پتریا جاران ئەو قوربانیێ وێ مژارێ یە، ئەڤ جورە رەخنە ل جادێ و سوشیال میدیا و میدیایێ ژی بەلاڤبوویە، کەسێن ڕەخنەیا کومێدی ژی دگرتن هندجاران وەک بێهیڤی دهێنەدیتن ژبەر وێ یەکێ هەمی تشتەکێ کێم دکەن، لێ ڕەخنەگرتن بخۆ هیڤیبوونە ب چێبوونێ، هەلگرێن ڕەخنەیا ڕژد ژی ب تبلێن دەستان دهێنە هەژمارتن، هەڤدەم جڤاك ژی نەهاریکار و پشتەڤانێ ڕەخنە و ڕەخنەگرانە، هەیا د کلتوڕێ کوردی دا ژی چەند گوتن هەنە ژبوو بێدەنگکرنا تاکی و نها بەردەوام دهێنە گوتن و کار پێدهێتەکرن ژ وان ژی (سەرا نەئێشتە نەهەوجەی دەرسوکێ یە، ئەزمانێ درێژ دارکوکێ سەرێ خودانی یە، پێت خۆ دیف بەڕکا بابێ خۆ درێژکە،.. ) کو د بنەرەت دا مەرەم ژ ڤان گوتنان ئەو نینە یا تاک پێ هزر، ئەو کەسێن ڤان تشتان دبێژن کێم ویژدانن راستیێ دزانن لێ ل راستیێ دبنە بەڵا و دەستان بۆ خرابیێ د قوتن، ژبەر وێ یەکێ بەرهەمێ رەخنێ ناهێتە دیتن و هەردەمەکێ بەزمەکە و هەمی ژی ددەمکی نه و رەوش ژی خرابترە.

دڤێرە دا فەرە وەلاتیێن هەڕێما کوردستانێ رێرەوێن ڕەخنا ئاڤاکەر و رژد پەیرەو بکەن ئەگەر خۆ بزانن دێ قوربانیێ ژی بۆ دەن، ڕەخنا ساخلەم دەرخەرە کو تاکێ هوشیار د جڤاکی دا هەنە، هەر جهەکێ ڕەخنەیا ئاڤاکەر و ڕژد تێدا هەبیت، قوناغێن بەرەڤپێشچوونێ بڕینە، ئەو خالێن تە ژ ڕەخنا ڕژد ددەنە پاش د بێ بنەمانە، هەروەسا دەما ڕەخنا رژد دگری، ب ئاوایەکێ نەراستەوخۆ ب وێ سازیێ دبێژی ئەڤە شاشیێنە و ئەڤە ژی چارەسەری و هایداربە، سازیا بەرامبەر ژی نەچار دبیت کارەکێ جوانتر بکەت و کارکرنەکا جوان، خزمەتکرنا وەلاتیانە، دەستبەرداری رەخنا بەرەلا و بفشەی و کەنی و لیق لیق بینن، ژبەرکو چ خوشگوزەرانی ب وێ رەخنێ دروست نابن بەلکی دەرفەتەکە بۆ زێدەتر شکاندنا یاسایێ و گەندەلیێ بێ کو تو هەست پێ بکەی، ژبەرکو هند کەس هەنە ویژدانا خۆ بۆ پارەیەکێ دفرۆشن، ئەڤجا چاوا وەرگرتنا برە پارەکێ گەندەڵ ل هەمبەر چەند فشە و کەنیپێکڕنا هەوە ناکەت، ژبەرکو بۆ وان دەمکی و ئاسایە، پشتی دەمەکێ دێ تو ژبیرکەی و ئەو ب وی پارێ گەندەلیێ دێ بیتە ئەزبەنی، ئەڤجا ئەگەر بشێی باخڤی رەخنەکا ساخلەم بگرە، ئەگەر نەشێی رەخنێ بگری مەلاقیێ و لیق لیقێ ژی بۆ چ کەس و مژاڕان نەکە و بێدەنگ بە.