(منداڵە وردکەو لاسارەکان)ی ئەم نیشتمانە لە پیرە سیاسی و ڕؤشنبیرە دەستەمۆکان باستر تێگەیشتون لە چۆنیەتی گۆڕان و باشترکردنی ژیانیان، بەرەی گەنجانی ڕاپەڕیو باش دەزانن کە بۆ گۆڕانکاری لە هەر دەستەڵات وسیستەمێکدا سەرەتا دەبێت لە«تێکدانی فەزای سەپاو جیگیر» و باوەوە  دەستپێبکەن کە دەستەلاتداران بە (فەزای ئارام) ناوزەندی دەکەن.

منداڵە وردکەکانی ئەم میللەتە،  چەندجار ستەملیکراوە لە هۆشیارەکان هۆشیاترن‌ و دەزانن کە (فەزای ئارامی‌و ئاسایشی‌ نەتەوەیی) وەهمێکی گەورەیەو دەستەڵاتداران بۆ پاراستنی تاڵانی‌ داهاتی ئەم نیشتمانە دروستیانکردوە، ژیانی زۆرینەی کۆمەڵگا لە ژێر سێبەرەکەیدا ژیانیان بوەتە جەهەنم، ئەم وەهمە گەورەیە لە هزرو زهنی منداڵە وردکەو لاسارەکانی نیشتمان جێگاو نەگرتوەو بونی نییە، ئەم وەهمە تەنها لە مێشکی وەستاوی پیرە سیاسیەکان‌و هەندێ لە ڕؤشنبیرە پێگەخوازو دەستەمۆکاندا دەقی گرتوەو وشک بوەتەوە.

خۆپیشاندان‌و ڕاپەڕینی گەنجانی پەراوێزخراوی ئەمڕۆ (منداڵە لاسارو وردکەکانی وڵات) بە تەواوی مانا سەربەخۆیە لە تەواوی حیزب‌و ڕێکخراوە سیاسی‌یەکان، سەربەخۆیە لە حیزب‌و سیاسەتمەدارە هەڵپەرست‌و فێڵبازەکان، سەربەخۆیە لە ڕۆشنبیرە بێکردارو قسە زلەکان، سەربەخۆیە لە مەلا دەم لوسە هەڵخڵەتێنەرەکان، ‌سەربەخۆیە لە چالاکوانە جرپن‌و پۆپۆلیستەکان، سەربەخۆیە لە توێژی نیمچە پارەدارە ترسنۆک‌و پاسیڤیستەکان.

جیاوازی گەورەی ئێستای خۆپیشاندانی ئەم منداڵە لاسارو پەراوێزخراوانە ئەوەیە، کە بێ حیزب‌ و بێ ڕێکخراوی سیاسی ‌و بێ ڕابەر و سەرۆکی تەماحکارو پۆستخوازو دەستەڵاتخوازن، بێ کۆبونەوەی کاوێژکاری نێو ژێرزەمین‌و ژورەکانن، بێ بەیاننامەو نامیلکەو بێ وتارو وتاف و شیعارو بێ لافیتە و كاغەزو ڕادیۆو ڕۆژنامەن، وە گەورەترین چەک بە دەستیناەوە تەنها مۆبایلێکی زیرەکە بۆ گەیاندن ‌و پەیوەندیکردنیان بە یەکترەوە.

ئەم منداڵە وردکە و لاسارانەی نیشتمان، لە خودا تەنهاترو بیکەسترن، هەریەکیان لە نێو کەسایەتی خۆیدا ڕابەرو سەرکردەیەکە بۆ خودی خۆی، ئێستا ئەم منداڵە وردکانە بونەتە ئەو کاریزمایە کە پیرە سیاسی‌و ڕۆشنبیرە قسە زلەکان لە بەرامبەر هەڵمەتەکانیان دەمیاندادەچەقێ.

ئەگەر پۆستەچی‌و سیاسی‌یە هەلپەرستەکان لێگەڕێن ئەم منداڵە لاسارانە بە ئاراستە راستی خۆیاندا بڕۆن، ئەوا ئەم گەنجانە دەبنە فریادرەسێکی نوێ‌ی  ئەم نیشتمانەو دەتوانن ئەم میللەتە لەم دەستەڵاتە تاڵانچیانە ئازاد بکەن، دەتوانن ئەم میللەتە لەم بێبەشی‌و نادادپەروەریە ڕزگار بکەن.

جیاوازی گەنجانی ئێستای ڕاپەریو ئەوەیە، لە فەزایەکی پڕ لە هەژاری‌و برسیەتی‌و بێئومێدی سیاسی پیرە سیاسی‌یەکاندا ڕادەپەڕن، زەمەن و کاتەکانی ئەم ڕاپەڕینە پێچەوانەی خۆپیشاندانەکانی سالانی پێشوی ئەم نیشتمانەیە، ئەم ڕاپەڕینە لە سەرەتای زستاندا گڕی گرت‌ نەک بەھار، لە درێژبونەوەی ساتی تاریکیدا بە شەواندا نەک بە ڕۆژ دەستیپێکرد، ئەو کاتە دێنە سەرشەقام کە سەرۆک‌و بەرپرسەکان مەستن‌و بەرەو جێگای خەو دەچن، گەنجان لە تاریکیدا ھاوار دەکەن تا زیاتر دەنگبدەنەوە، تا  خەو لە گەندەڵکاران بزڕێنن، لەساتی خەویاندا ھەواڵی سوتانی دەزگاو بارەگاکانیان پێدەگەیەن و پێبان دەڵێن ئەوە ئێمەین لەمەو دوا نایەڵین بە ئارامی سەر بکەنە سەرسەرین..ئەوە ئێمەین نانوین‌و هیچ کاتێک نەنوستوین ھەموو دزی‌و تاڵانیەکانتان دەبینین.

بێجگە لە دەستەڵاتدارە تاڵانچیەکان ئێستا پیرە سیاسیەکان و نەوەی کۆن  بونەتە ڕێگرێکی گەورە لەبەردەم هوشیاری منداڵە لاسارو وردکەکانی ئەم نیشتمانە. ئەگەر ئەمانە نەبونایەتە کۆسپی گەورە، ئەوا ئەم منداڵا لاسارانە هەر چەند ساڵێک دەیانتوانی دەستەڵات و حوکمڕانیەکی بەسەرچو بروخێنن و نەیاندەهێشت تەمەنی هیچ دەستەلاتێک لە دەیان ساڵەوە بۆ نیو سەدە‌ درێژ ببێتەوە چەق ببەستێت.

ئەم مەسیجە نوێیەی منداڵە وردکەو لاسارەکان ئێستا  جوانیەکەی لەوەدایە کە پێمان دەڵێن: دەستەڵاتێک پیشەی سیاسی تەنھا دزی‌و تاڵانی بێت دەبێت سەرلەبەری بسوتێنرێت..سوتاندنی بارەگاو دەزگاکانی حکومەت ئەوە نیە کە خوێندەوارو ڕۆشنبیرە پاسیڤ‌و خەواڵوەکان وەڵامی کورت‌و سادەی پێدەدەنەوەو بە خەم ساردیەوە دەڵێن ئەم خۆپێشاندانە ( ئاژاوەی منداڵە وردکەو لاسارەکانە).

بەڵام بە پێچەوانەوە، ئەم ڕاپەڕینە سەربەخۆیەی گەنجان گەورەترین دەلالەتی ھەیەو دەبێت خوێندنەوەو شرۆڤەی قوڵی بۆ بکرێت، مەسیجێکی گەورەی گەنجانە هەم بۆ دەستەڵات هەم بۆ نەوە کۆنەکانی کۆمەڵگا، بیرو هزرو نوێ‌ی گەنجانی ئەم سەردەمەیە، گەنجانی دونیای تەکنەلۆژیاو سۆسیال میدیاو ئەلکترۆنیەکانە، گڕوتینی دەرونی گەنجانی پڕ لە وزەیە بەرامبەر دەستەڵاتێکی بێ مەعریفەی پاوەنخوازو  مشەخۆری خاڵی لە هەموو بەهایەکی ئینسانی.

دەستەڵاتێک ٣٠ سالە داهاتی گشتی و هاوبەشی ئەم وڵاتە هەڵدەلوشێ‌، دەستەڵاتێک بەرنامەو پڕۆژەی تەنها دزی تاڵانیە، ئەم هۆکارانەی سەرەوە هەموو هۆکاری گەورەی سوتان‌و تێکدان‌و دەزگاو بارەگاکانە.

سوتاندنی بارەگای حیزبەکان پەرچەکرداری سوتانی داهاتو و ئاییندەی گەنجانە بە دەستی ئەم دەستەڵاتە، واتا دەزگاو بارەگای حیزبەکان لە بیرو ھزری گەنجاندا بارەگای پاراستنی دەستەڵاتێکی نادادپەروەرو تاڵانچیە، گەنجان کەمترین سودو قازانجیان لەم بارەگایانە نەبینیوە، گەنجان ئەو هوشیارییان هەیە کە چاکسازی و گۆرانکاری لەسایەی ئەم دەستەڵاتەدا بوەتە مەحاڵ، بۆیە ھەموو شتێکی ئەم دەستەڵاتە دەستوێنن چونکە نایەنەوێت ئەسەری ھیچ شتێکی ئەم دەستەڵاتە ناشیرین‌و ناشارستانی‌و گەندەڵە لە نێو کۆمەلگاکەیاندا بمێنێت!

گەنجانی ئێستای ئەم کۆمەڵگایە ئەگەر خاوەنی ھیچ ھوشیاریەکی قوڵیش نەبن، خاوەنی ئەو ھوشیاریەن کە دەبێت سەرلەبەری ئەم دەستەڵاتە تێکبدرێ‌و بسوتێنرێ‌و سەرلەنوێ بنیاتبنرێتەوە.

منداڵە وردکەو لاسارەکانی ئەم نیشتمانە ئێستا خاوەنی ئەو ھوشیاریە نوێیەن بۆیە جیاوازی لە نێوان حیزبەکاندا ناکەن‌و ڕوخساری ناوەوەی ماسکی ھەموو حیزبەکان هاوتای یەک بە ناشیرینی دەبین، خاوەنی ئەو ھوشیاریەن‌و دەزانن کە تەواوی حیزبەکان مۆدێلی حیزبی( پ.پ.پ)ێن واتا حیزبی ( پارەو پۆست و پیرۆزین).

وە دەزانن، ئەم  جۆرە (مۆدێلەی حیزب) ئەم نیشتمانەیان وێرانکردوەو داڕماندوە، گەنجان بەرچاویان ڕوون‌و تیژەو لە دوورەوە دەبینن کە  سەرۆک و سەرکردەو بەرپرسەکانی ئەم دەستەڵاتە چۆن ژێانێکی شاھانەیان بۆ خۆیان و نەوەکانیان دروستکردوەو بە ئاستەم ئاوڕ لە ژیانی ئێستاو ئاییندەی ئەوان نادەنەوەو ھەرگیزیش نەیانداوەتەوە.

لە ھزری گەنجانی ئەم سەردەمەدا، ئەم حیزبانە نەک هەر ھیچ پیرۆزی و بەھایەکیان  نییە و نەماوە؛ بەڵکو  بە بارو قورساییەکی گەورەی دەبینن لەبەردەم گەشەو خۆشگوزەرانی‌و ژیانێکی باشتری ئاییندەی خۆیاندا، گەنجانی ئێستا خاوەنی ئەو ھۆشیاریەن دەزانن کە ھەڵبژاردن‌و دەنگدان درۆو فێڵ و تەڵەیەکی گەورەیە بۆ دوبارەکردنەوەی ھەمان دەستەڵاتی حیزبی پیرە سایسیەکان، بۆیە چاوەڕوانی هیچ هەڵبژاردنێکیش ناکەن.

بە کورتی،  گەنجان ( منداڵە وردکەو لاسارەکان) خاوەنی ئەو هوشیاریەن، کە دەستەڵاتێک  لە ماوەی ٣٠ ساڵدا نەتوانێت  گۆڕانکاری بکات و ژیانیکی باشتر و سەردەمی و ئینسانی بۆ تەواوی هاوڵاتیانی ئەم نیشتمانە دابین بکات، ئەوا هیچ سودێکی بۆ ژیانی ئەوان‌و خێزانە ھەژارەکانیان نی‌یەو نەماوەو دەبێت ھەموو شتێکیان تێکبدرێ‌و  ئەسەریان لەم وڵاتەدا نەمێنێت!