هاونیشتمانی بەڕێز..

سەبارەت بە هەڵبژاردنەکانی ئەنجومەنی نوێنەرانی ئیراق، کۆمەڵێک چالاکەوانی سیاسی خۆبەخش و ژمارەیەک لە نوێنەری گرۆ و بازنەکانی گفتوگۆی جیاواز لە ناو کوردستان و دەرەوەی کوردستان، زنجیرەیەک کۆبوونەوەیان لەماوەی ڕابردوودا ڕێکخست. سەرئەنجام گەیشتینە بڕیار بۆ ڕاگەیاندنی هەڵمەتێك بۆ بۆیکۆت و بەرەنگاری هەموو ئەو پرۆسانەی ئەمڕۆ بە ناوی هەڵبژاردنەوە لە ئێراق و کوردستاندا بەڕێوەدەچن. ئەم هەڵمەتە پشتیوانی لە هەموو ئەو هەڵمەتە هاوشێوانەی خۆی دەکات کە لەلایەن گرۆ و کەناڵە جیاوازەکانی ترەوە لە کوردستان و ئێراقدا ڕاگەیندراون.

ئەمڕۆ لە ئێراقدا پرۆسەیەکی بەرەنگاری خۆڕسک و سروشتی بەڕێکەوتووە دژ بەو باند و پارتە دەسەڵاتدارانەی بێشەرمانە ژیانێکی سیاسی تاڵانکاری و ستەمکاری بەڕێوەدەبەن.

لە دۆخی پەرتەوازەکردنی شەقامی سیاسی و پشتگوێخستنی داواکاری و خۆپیشاندانەکاندا بۆیکۆتی هەڵبژاردن بەهێزترین چالاکی سیاسی ئەو بەرەنگارییە خۆڕسك و سروشتییەی خەڵکە. هەروەها یەکەم هەنگاوی سەرەتایی گرنگە بۆ بەرپەرچدانەوەی کۆی ئەو بێڕێزییەی بەرامبەر خەڵکی ئەم نیشتمانە دەکرێت. بەشداری نەکردنی خەڵک لەسەراسەری ئێراقدا، بەجۆرێک پەرەی سەندووە تەواوی دەسەڵاتدارانی هەراسانکردووە و لێرە و لەوێ بەعس ئاسا خەریکی بەرتیل بەخشینەوە و هەڕەشەی نانبڕینن، ئەگەر خەڵک بەشداری هەڵبژاردنەکان نەکات. بەڵام ئەم کردەوانە جگە لە شکست هیچ دەستخستێکی تری بۆ ڕژێمە باندگەراییەکەیان نابێت.

دەسەڵاتی دەرفەت دزی ئەمڕۆی ئێراق و کوردستان، هەرچی پێ بکرێت بۆ خۆ ڕزگارکردن لەو قەیرانانەی تێی کەوتووە دەیکات، لەوانە بژاردەی هەڵبژاردنی پێشوەختە. هەر لەناو ئەو هەڵبژاردنانەشدا لیست و باندەکانی قاچاخچێتی سامانی سروشتی، کەوتوونەتە شەڕێکی چەواشەکارانەوە لە ناو خۆیاندا بۆ گەرمکردنی شایی و گەمەکانی هەڵبژاردن. ئەم باندانە کۆکن لەسەر بەشبەشێنەی گەندەڵی و جگە لە خۆڵکردنە چاوی خەڵک هیچی تریان لێ چاوەڕوان ناکرێت. تەنانەت، دەنگدان بە تاکی سەربەخۆ و سەرخستنی هەندێک کەسایەتی بەڕێز بۆ ناوەندەکانی بڕیار، جگە لە ناشرینکردنیان هیچی تری لێ سەوز نابێت. ئەم باندانەی ستەمکاری کە ئەمڕۆ لە کوردستان و ئێراقدا دەستیان بەسەر دەسەڵاتدا گرتووە، هیچ کات گوێبیستی دەنگ و سەدای ئەوانە نابن کە دەخوازن مافەکانی خەڵک بۆ خۆیان بگەڕێتەوە. بەڵکو ئەوان چی بخوازن دەیکەن بێ گوێدانە شەرعییەت و بێ گوێدانە پرسەکانی خەڵک و نیشتمان. ئەم باندانە لەلایەن هێزە دەرەکییەکانەوە تەعینکراون و بەکرێگیراوانە لەسەر گەمەی دەسەڵاتداری لە ئێراقدا دەژین. سەبارەت بە کوردستانیش، هەتا ئەمڕۆ پرسەکانی هەرێمی کوردستان پرسێکن بەستراوەن بە ئێراقەوە و لە یەکتری جیانین، بۆیە گەمەی باندە دەسەڵاتدارەکانی کوردستانیش بەشێکە لەو پرۆسەی گەندەڵییەی لە ئێراق و ناوچەکەدا بەڕێوەدەچێت. هەر ئەم باند و قەوارانەش ناتوانن یەك هەنگاو پرسە نیشتمانییەکان بەرنە پێشەوە و ژیانی سیاسی و کۆمەڵایەتی و ئابووری خەڵک باشتر بکەن.

نەچوون بۆ دەنگدان و بەشداری نەکردن لەم پرۆسە گاڵتەجاڕییەدا و پەکخستنی پرۆسە و ناوەندەکانی دەنگدان ئەرکێکی نیشتمانی شەرەفمەندانەیە بۆ هەرکەسێک بە هۆشیارییەوە بەشداری تێدا بکات. ئەم ئەرکە بەتەنیا ئەرکێکی تاکەکەسی نییە، بەڵکو پرسێکی سیاسی گشتی جدییە و ڕەتکردنەوەی دۆخ و پرۆسەیەکی گێلکردنی نەخوازراوە. بەشداری نەکردن و ڕێگری کردن لەم پرۆسەیە لایەنی کەمی توانایی تێگەیشتنی هەر تاکە کەسێکی پێویستە و ستەمکاریش چەند ئەستووربێت، ناتوانێت هیچ بەرامبەر ئیرادەیەکی یەکگرتووی خەڵک بکات.

هەڵمەتی بایکۆت و بەرەنگاری