30 ساڵه‌ كار له‌ سه‌ر دروستكردنی میله‌تێك ده‌كه‌یت چۆن جڕت بكێشێ‌ ، چۆن گاڵته‌ به‌ هه‌موو شتێ‌ بكات ، چۆن به‌ گه‌وره‌و بچوك رابوێرێت ، تازه‌ به‌ ئاگادێیته‌وه‌و ده‌ڵێیت ئه‌م دۆخه‌ نابێت وابێت!

سی ساڵه‌ له‌ داخی یه‌كترو بۆ ئه‌وه‌ی بۆڕی یه‌كتر بده‌ن جاش و خه‌راپه‌كان له‌ ئامێز ده‌گرن و باش و دڵسۆزه‌كان دورده‌خه‌نه‌وه‌، له‌به‌ر باشترین جنێوفرۆش ده‌مرن و ئه‌وانه‌ دورده‌خه‌نه‌وه‌ كه‌ قسه‌ی ئاكاری ده‌كه‌ن.

به‌ دوای جنێوفرۆشاندا كون و كه‌له‌به‌ری دنیا ده‌گه‌ڕێن و له‌و ئه‌مه‌ریكایه‌ش جنێوفرۆشێكتان ده‌ستكه‌وێ‌ له‌ باوه‌شی ده‌گرن، میدیاو كه‌ناڵ و بڵاوكراوه‌كانیشتان به‌ڕوی خه‌ڵكی بگۆو به‌ شه‌ره‌ف و به‌ ڕوومه‌تا داده‌خه‌ن، سی ساڵه‌ ئاوی زێرابه‌كه‌ ده‌كه‌نه‌ سه‌ر باخچه‌كه‌ و ده‌ڵێن بۆنه‌كه‌ خه‌تای باخچه‌كه‌یه‌.

چ گه‌وجیه‌كه‌ بڵێی مادام فڵان حزب دوو ده‌مشڕی كردوه‌ به‌ به‌رپرس من چوار ده‌كه‌م ، مادام ئه‌وان فڵان هه‌ڵقون ده‌كه‌ن به‌ پارله‌مانتار من له‌و خراپتر ده‌كه‌م ، جاران خراپ نیشانده‌درا بۆ ئه‌وه‌ی لاسای نه‌كرێته‌وه‌و لێی دور كه‌وینه‌وه‌ ئێستا خراپ ئاماژه‌ی بۆ ده‌كرێت بۆ ئه‌وه‌ی لێوه‌ی فێر بین ، مامۆستای ئاینی خراپ ، سیاسی خراپ ، په‌رله‌مانتاری خراپ ، كادیری خراپ ، پڕۆفیسۆری خراپی زانكۆو زانكۆی خراپ ، په‌روه‌رده‌ی خراپ ، ته‌ندروستی خراپ ، ئه‌مه‌ به‌رهه‌می ئه‌و سی ساڵه‌یه‌ كه‌ بیست ساڵی خشتی ساوابوو هه‌ر فێری داره‌ داره‌ش بوو قوتی میله‌تی بڕی .

گه‌وجیه‌ بڵێی له‌ داخ ئه‌و حزبه‌ منیش كادیری حیزه‌ڵه‌و ده‌مدرێژ به‌رهه‌م دێنم ، له‌ كاتێكا كورد له‌ هه‌ر كات زیاتر پێویستی به‌ په‌روه‌رده‌ی ئاكاری و پێكه‌وه‌ بوون و یه‌كێتیه‌ ، پێكه‌وه‌ بون و یه‌كێتی قسه‌ی ڕووت نیه‌ ئاكاره‌ ، هه‌ستكردنه‌ به‌ ئازاری یه‌كتر ، پێنه‌خه‌نینه‌ به‌ یه‌كتر ، گه‌وجیه‌ شای له‌ سه‌ر برینی براكه‌ت بگێڕی ، وه‌ك ئه‌وه‌ی ئێمه‌ ده‌یانجار بینیومانه‌ ، كورد ده‌ڵێت حه‌یا قه‌تره‌یه‌كه‌ تكا ده‌تكێ‌ ، سی ساڵه‌ ئێوه‌ سه‌رچاوه‌ی حه‌یا وشك ده‌كه‌ن بۆ ئه‌وه‌ی ئه‌و قه‌تره‌یه‌ش كه‌ هه‌یه‌ نه‌مێنێ‌ ، باسی ده‌وڵه‌ت سازیش ده‌كه‌ن ، تۆی ده‌ره‌وه‌ی مێژوو ، ئه‌سڵه‌ن تۆی بێمێژوو ، تۆی بكوژی براكه‌ت و پاڵه‌وانی شه‌ڕی خۆ كوژی ، چۆن ئه‌مه‌ گه‌له‌ ده‌به‌یته‌ دیرۆكه‌وه‌ ، كه‌ هه‌ركات بیه‌وێت بچێت دوژمنان به‌ تۆلاقی ده‌كێشنه‌وه‌ .

مامۆستا قانعی مه‌زن نه‌یگوت " بێحه‌یایی باوه‌ ئه‌مڕۆ قوڕبه‌سه‌ردا كاحه‌یا "

گه‌وجیه‌كه‌ ئه‌وه‌یه‌ تۆ ناته‌وێ‌ وێنه‌یه‌كی جیاواز نیشان بده‌ی ، وێنه‌یه‌ك له‌ وێنه‌خراپه‌كانی ئه‌وانی تر نه‌چێت .