ئەگەر ڕاگەیاندن ڕەوتی ڕووداوەکان نەگۆڕێت، ڕای گشتی ئاراستەنەکات، کاریگەری لەسەردەسەڵاتی سیاسی نەبێت ،پیشەیی وبابەتیانە مامەڵەنەکات، ڕۆڵی سەرەکی خۆی لەدەست داوە و بۆتە سێبەر!
ئەگەر کۆمەڵگا هۆشیاری تاکی گەشەی نەکرد، بنەماکانی دیموکراسی وئازادی وئازادی ڕادەربرین ومافەکانی مرۆڤی نەچەسپاند و ڕێکخراوەکانی کۆمەڵگەی مەدەنی ئەرکی خۆیان نەبینی و هەستی بەرپرسیاریەتی وئەرک ومافەکانی نەکرد کۆمەڵگایەکی نەخۆش و دواکەوتووە!
ئەگەر حیزبەکان ،سیاسیەکان هەر خەریکی تێرکردنی خۆیان بوون ، نیشتمانیان کردەکاڵایەک بۆبەردەوامی دەسەڵاتیان متمانە لەدەست دەدەن،لەبری هیوا سیاسەتی نائومێدی بەرپادەکەن، ئەگەر شۆڕشگێری دوێنێش بووبوون، ئەمڕۆدەبنە بار بەسەر خەڵک و مۆری گەندەڵی لە ڕووخساریان دەدرێت،بۆمانەوەیان هەموو ڕێگەیەک دەگرنەبەر و دواجار دەبنە ئەو دوژمنەی کەخۆیان شۆڕش وڕاپەرینیان دژی هەڵگیرساند!
ئەگەر نووسەروشاعیر و ڕۆشنبیرەکان سەری نوکی پێنوسەکانیان شۆڕکرد، ناپاکیان لەووشە و نووسینو ویژدان کرد چاوەڕوانی کارەسات بن!
ئەگەر دادوەر و دادگاکان یاسایان لارکردەوە،سوێندی درۆیان وەک پولی سەرنوسینی داواکاری خستەبەردەم هەمووکەسێک و پیشەکەیان هەڕاج کرد، هیچ جیاوازیەک لەنێوان تاوانبار و بێ تاوان نامێنێت، جیاوازی لەنێوان ڕاستگۆودرۆزن، ئابڕوو بێ ئابڕوو،دەستپاک و دزو لەنێوان هەق و ناهەق نامێنێت!
ئەگەر مامۆستا پەروەرشکار بەپاکی لە(اقروا) وە دەستی پێنەکرد،نەوەیەکی نەخوێندەوار دەخەنەوە،لەبری پێنوس دەیان دەست وقاچ ماچ دەکەن بۆئەوەی بکرێنە پاسەوانی بەرپرسێکی داوێن پیس! دواتر بەقۆنداغەکلاشنکۆف و کلکەدەمانچە لەمامۆستاکەی خۆی دەدات کاتێ داوای مووچەپاشەکەوتەکانی دەکاتەوە!
ئەگەر زانا و دانا و مامۆستای ئایینی بوونەحیزبی وچوونەبەردەم بارەگا و کۆشکی سالار،لەباتی ووشەی هەق بەرامبەر تاغوت،چەمانەوە و بوونە کۆیلە، دەبێت فاتیحە بۆخۆیان و میللەت بخوێنن !
ئەگەر پشتکرا لە هونەرو ئەدەبی ڕەسەن، ئەگەر گەنج و لاوەکان هەر خەریکی چاولێکەری بێگانە بوون تەمبەڵ و تەوەزەل دەکەونەوە.
ئەگەر پێشمەرگە و ئاسایش وپۆلیس وەلائیان بۆ حزب و بنەماڵە بوو لەبری نیشتمان، هەرڕۆژەی پارچەیەک لەخاکمان لەدەست دەدەین !
ئەگەر پشتکرا لەخودا، چاوەڕوانی مەرگی گەل بن تابەنائومێدی سەردەنێتەوە!