🔘ڕه‌ئوف ئاكره‌یی كێ یه‌؟

ڕه‌ئوف كامل ئاكره‌یی نڤیسكار، رۆناكبیر، رۆژنامه‌ڤان، ئاكتڤیست و سیاسه‌تمه‌داره‌كێ نه‌ته‌وه‌یی یێ باشوورێ كوردستانێ (به‌هدینان) بوو.

د سالا 1951’ان ده‌ ل باژارۆكا ئاكرێ یا دهۆكێ هاتیه‌ دنێ. یه‌كه‌م خه‌باتا خوه‌ ل ناڤا یه‌كتیا قوتابیێن كوردستانێ ده‌ دایه‌ ده‌ستپێكرن. پشتره‌ كۆمه‌له‌یا خوه‌نده‌كاران دامه‌زراند و هه‌ری داویێ ژی د ناڤا خه‌باتا یه‌كتیا خوه‌نده‌كارێن شۆره‌شگه‌ر ئێن كوردستانێ ده‌ كو دامه‌زرێنه‌رێ وێ بوو، د خه‌بتی.

ڕه‌ئوف ئاكره‌یی د سالا 1975’ان ده‌ كو وێ ده‌مێ هێژ خوه‌نده‌كار بوو، ل گه‌ل كۆمه‌ك ره‌وشه‌نبیر پارتیا كاركه‌ران و ره‌نجده‌رانی كوردستانێ دامه‌زراندن.

د سالا 1976-1977’ان ده‌ ل كۆلیژا ئابۆری یا زانینگه‌ها موسلێ پله‌یا یه‌كه‌مین بده‌ست خوه‌ڤه‌ دئینیت و لسه‌ر ئاستێ زانینگه‌هێن ئیراقێ ژی پله‌یا دووه‌مین بده‌ست خوه‌ڤه‌ دئینیت. پشتی ساله‌ك ژی د ناڤه‌ندا ئامارانا دهۆكێ ده‌ وه‌ك كارمه‌ند ده‌ست ب كار دبیت. پشتره‌ ژ به‌ر دلسۆزیا وی یا وه‌لاتپارێزی و ته‌ڤگه‌ركرنا ده‌رڤه‌ی داخوازێن ڕژێما به‌عس ئه‌ركێ وی ژ بۆ رێڤه‌به‌ریا ئاماران یا تكریتێ تێت ڤه‌گوهه‌ستن. ڕه‌ئوف ئاكره‌یی ژی وه‌ك هه‌لوه‌سته‌ك ل دژی ڤێ بریارا رژیمێ ده‌ست ژ كار دبه‌رده‌ت و ده‌ست ب كرێكاریێ دكه‌ت.

ڕه‌ئوف ئاكره‌یی د سالا 1984’ان ده‌ رێكخراوا تێكۆشینا ره‌نجده‌رانی كوردستان دامه‌زراند و د هه‌مان سالێ ده‌ ل دژی جڤینا یه‌نه‌ك’ێ و حزبا به‌عس به‌یانامه‌یه‌ك ده‌رخست.

ڕه‌ئوف ئاكره‌یی سه‌رنڤیسه‌رێ رۆژنامه‌یا رێگای ره‌نجده‌ران بوو. ئە‌ڤ رۆژنامه‌ ب زمانێ كوردی و عە‌ره‌بی دهاته‌ چاپكرن. هه‌روها چه‌ند پرتوكه‌ك یێن شه‌هید ڕه‌ئوف هه‌نه‌. ئە‌و شۆره‌شگه‌ره‌ك ب دسپلین و باوه‌ریا وی ب كه‌د و خه‌باتا كرێكار و ره‌نجده‌ران هه‌بوو

.

🔘ڕه‌ئوف ئاكره‌یی ده‌ست ب خه‌باتا چه‌كداری كر

ڕه‌ئوف ئاكره‌یی د سالا 1987’ان ده‌ ل هه‌رێما به‌هدینانێ بوو پێشمه‌رگه‌، خه‌باتا چه‌كداری یا ئاكره‌یی دووری هه‌ر دو حزبێن په‌ده‌كێ و یه‌نه‌كێ بوو. وی هه‌ولا پاراستنا سه‌رخوه‌بوونێ ددا. پشتی راپه‌رینێ ژی كار ژ بۆ یه‌كخستنا هێزێن ماركسیست و رێخستنێن كرێكارێن باشوورێ كوردستانێ كر.

رۆژنامه‌ڤان ڕه‌ئوف ئاكره‌یی د سالا 1992’ان ده‌ پێشه‌نگتیا خوه‌پێشاندانا كو ل هه‌ولێرێ ل دژی هێرشێن ئارتێشا تركێ داگیركه‌ر ل سه‌ر باژارێ شرنه‌خێ هات لدارخستن ره‌ كر. د خوه‌پێشاندانێ ده‌ ل گه‌ل 12 كه‌سێن دن هات گرتن و 6 مه‌هان د گرتیگه‌هێ ده‌ ما. ئە‌و ژی وه‌ك یه‌كه‌م گرتیێن سیاسی یێن پشتی راپه‌رینێ تێت هژمارتن.

.

🔘ژ بۆ ئاڤاكرنا یه‌كتیا نه‌ته‌وی كه‌ت ناڤا هه‌ولدانان

خه‌باتا ڕه‌ئوف ئاكره‌یی ب باشوورێ كوردستانێ ته‌نێ ره‌ سنۆردار نه‌ما. ئە‌و ژ بۆ ب داوی ئانینا ناكۆكیێن ناڤا ئالیێن هه‌ر چار پارچێن كوردستانێ و پێكانینا یه‌كتیا نه‌ته‌وی كه‌ت ناڤا هه‌ولدانان.

🔘ره‌ئوف ئاكره‌یی و ئۆجالان

په‌یوه‌ندیه‌ك باش د ناڤبه‌را ڕه‌ئوف ئاكره‌یی و رێبه‌رێ گه‌لێ كورد عه‌بدوڵاه.ئۆجالان ده‌ هه‌بوو.

ڕه‌ئوف ئاكره‌یی د سالا 1992’ان ده‌ ل گه‌ل چه‌ند هه‌ڤاله‌كی خوه‌ چوون ئاكاده‌میا ماحسوم كۆركماز یا ل دۆلا به‌قایا لوبنانێ و ب رێبه‌ر.ئوجالان ره‌ هه‌ڤدیتن كرن. ئارمانجا وان یا سه‌ردانێ ب داوی ئانینا ئالۆزیا ناڤبه‌را په‌كه‌ك’ێ، په‌ده‌ك’ێ و یه‌نه‌ك’ێ بوو.

🔘تیرۆرا ڕه‌ئوف ئاكره‌یی

د شه‌ڤا 26 ل سه‌ر 27’ێ گولانا سالا 1993’ان ل باژارێ دهۆكێ رۆژنامه‌گه‌ر و چالاكڤانێ سیاسی ڕه‌ئوف كامل ئاكره‌یی ل به‌ر ده‌ریێ مالا خوه‌ ژ ئالیێ چه‌ند چه‌كداره‌ك ڤه‌ هاته‌ تیرۆركرن. هه‌یا نها ژی تێكلداری تیرۆرا ڕه‌ئوف ئاكره‌یی چ كه‌سه‌ك نه‌هاتیه‌ گرتن. تیرۆرا ڕه‌ئوف ئاكره‌یی پشتی راپه‌رینا باشوورێ كوردستانێ، وه‌ك یه‌كه‌م تیرۆرا رۆژنامه‌ڤان و رۆناكبیران ل باشوورێ كوردستانێ تێت بناڤكرن.

یه‌ك ژ هه‌ڤالێن ڕه‌ئوف ئاكره‌ی، كاوا نادر ژ به‌ریا نها د داخویانیه‌ك خوه‌ ده‌ تێكلداری قه‌تلكرنا ڕه‌ئوف ئاكره‌یی ژ رۆژنه‌وس’ێ ره‌ گۆتبوو،”په‌ده‌كه‌ و بنه‌مالا بارزانی د پشت قه‌تلكرنا ڕه‌ئوف ئاكره‌یی ده‌ یه‌ كو ب ده‌ستێ میتا ترك هاتیه‌ قه‌تلكرن. ژ به‌ركو وان وسان هزر دكر كو سه‌ركرده‌یه‌ك په‌كه‌ك’ێ تیرۆر كرینه‌. لێ شه‌هید ڕه‌ئوف ته‌نێ دلسۆزه‌كێ په‌كه‌ك’ێ بوو.”

كاوا نادر ئەشكه‌ره‌ كربوو كو ده‌ما رۆژنامه‌گه‌ر ڕه‌ئوف هاتی قه‌تلكرن ئاسایشێ ب به‌هانه‌یێن جوودا جوودا ده‌ستوور نه‌دا مالبات جه‌نازه‌ ببینه‌. نادر گۆت، “ده‌ما كو هاتی تیرۆركرن ئاسایشا دهۆكێ جه‌نازه‌ بر نه‌خوه‌شخانه‌یێ ده‌رفه‌ت نه‌دا مالبات ببینه‌. هه‌یا نها ژی ئەڤ دۆسیه‌ مایه‌ و هه‌یا كو تاوانبارێن ڤێ تیرۆرێ نه‌یێن دیتن، ده‌ستهلات ژێ به‌رپرسه‌.”

پشتی راپه‌رینا باشوورێ كوردستانێ ڕه‌ئوف ئاكره‌یی یه‌كه‌م رۆژنامه‌ڤان بوو هات قه‌تلكرن. پشتی وی د سالا 2008’ان ده‌ ئە‌بدولستار تاهر شه‌ریف ل كه‌ركووكێ، د سالا 2010’ان ده‌ سه‌رده‌شت.عوسمان ل هه‌ولێرێ، د سالا 2012’ان ده‌ كاوه‌ گه‌رمیانی ل كه‌لارێ، د سالا 2016’ان ده‌ ژی وه‌دات حسێن و شوكری زه‌ینه‌دین ل دهۆكێ هاتن تیرۆركرن.

پشتی 29 سال و قه‌تلكرنا گه‌له‌ك رۆژنامه‌ڤانان، نها ژی هه‌ولا بێده‌نگكرنا رۆژنامه‌ڤان و ئاكتڤیستان تێت داین. هه‌ری داویێ ژی د سالا بۆری ده‌ زێده‌تری 70 رۆژنامه‌ڤان و ئاكتڤیستێن به‌هدینانێ ژ ئالیێ پدك’ێ ڤه‌ هاتن بنچڤاكرن. ژ وانا 5 رۆژنامه‌ڤان و ئاكتڤیستێن به‌هدینانێ هه‌ر یه‌ك 6 سال جه‌زایێ گرتیگه‌هێ لێ هاتن برین.

ته‌ڤی كو جه‌زاكرنا رۆژنامه‌ڤان و ئاكتڤیستێن به‌هدینانێ هه‌م ل سه‌ر ئاستا ناڤخوه‌ هه‌م ل سه‌ر ئاستا ناڤنه‌ته‌وی راستی نه‌رازیبوونه‌ك مه‌زن هات ژی، لێ هه‌تا نها نه‌هاتنه‌ به‌ردان.