بنه‌ماڵا بارزانی گه‌لی مه‌ مه‌حكومی بێ كرامه‌تیێ كریه‌

Thursday, 07.21.2022, 09:49 AM

ماڵباتا بارزانی گه‌لێ باشور مه‌حكومی بێ كرامه‌تیێ كریه‌
مه‌ چ دا و مه‌ چ ستاند، سه‌دا هزار شه‌ید بناڤێ شۆڕه‌شا نه‌ته‌وه‌یی پێخه‌مه‌ت یه‌ك تشتی : ئازادی
ئازادیا سیاسی، كلتوری، نه‌ته‌وه‌یی، ڕاده‌ربڕین، هۆنه‌ر و سینه‌ما، ئابۆریا سه‌ربخوه‌ و هتد.. لێ بنه‌ماڵا بارزانی ته‌ڤاهیا تیۆرێن ئازادیێ د زنجیرێن داگیركه‌ریا ده‌وله‌تا تركدا ئاسێ كرن‌، د به‌رمیلێن گازێدا فه‌تساندن، ب كه‌له‌مچێن تركی ڕاپێچ كرن، ب چه‌كۆچێ تركی سزادان، ب بۆمبه‌بارانین تركی پارچه‌پارچه‌كرن!
ئازادیا ئابۆریا سه‌ربخوه‌ بنه‌بڕ كر، ئازادیا ڕاده‌ربڕینێ بنه‌بڕ كر، ئازادیا چاندا نه‌ته‌وه‌یی و دیرۆكی بنه‌بڕ كر، تا راده‌كێ كو ئێدی وه‌ڵاتپارێزی و نه‌ته‌وه‌یی بوون مه‌زنترین تاوانه‌!
دژایه‌تیا چاند و كلتورا توركی یان كالایێ تركی، تاوانه‌!
دژایه‌تیا داگیركاریا تركی تاوانه‌!
زانین و په‌رتوك ل داموده‌زگایێن فه‌رمی و په‌روه‌رده‌یی بڕه‌نگه‌كێ سانسۆركر كو ده‌رڤه‌ی وێ تاوانه‌!
ئاشكراكرنا سیخورێن ترك ل ناڤا هه‌رێمێ تاوانه‌!
هه‌ر ڕه‌نگێ پشته‌ڤانیا شۆره‌شگه‌رێت كورد ل هه‌مبه‌ر فاشیزما ترك ل رۆژئاڤا و باكور و باشور تاوانه‌!
پێشه‌سازی و پێشخستنا ئابۆریا سه‌ربخوه‌ ب ڕێیا كشتوكالێ ژبه‌ر زیانا وێ ژبۆ كۆمپانی و بازرگانیا تركی تاوانه‌!
ته‌ ماف نینه‌ لسه‌ر ڕاستیا دیرۆكا خوه‌ بژی، ته‌ ماف نینه‌ بێژی ئه‌ز كورده‌كم ژ هه‌مو نه‌ته‌وا خوه‌ حه‌ز دكه‌م، ته‌ ماف نینه‌ ناڤێ تاوانبارێت دز و گه‌نده‌ل و خایین و سیخورێت دژمنا بینی كو ب كێماهی دێ ب ناڤێ ناڤزڕاندنێ دێ هێیه‌ سزادان!
ڕۆژانه‌ گه‌لێ ته‌ به‌رچاڤێ ته‌ ب بوردمانان دهێنه‌ پارچه‌پارچه‌ كرن ته‌ ماف نینه‌ بۆ پرۆته‌ستۆ كرنا ده‌وله‌تا داگیركه‌ر بكه‌ڤیه‌ جادا!
ته‌ ماف نینه‌ لسه‌ر ڤان هه‌می تاوانا نڤیسه‌كێ به‌ڵاڤ بكه‌ی
گه‌ر ده‌ستهه‌لاتا ڤێ بنه‌مالێ ده‌وام بكه‌ت ل ئاینده‌كا نێزیك جلێ كوردی و ئاخڤینا كوردی ژی دێ بیته‌ تاوان!
كه‌واتا بنه‌ماڵا بارزانی گه‌لی مه‌ مه‌حكومی بێ كرامه‌تیێ كریه‌ كو ب هیچ ڕه‌نگه‌كێ ته‌ ماف نینه‌ تو كورده‌كێ ب شه‌ره‌ف بی!
ئه‌ڤ بۆیه‌را سه‌رهلدانا گه‌لێ عراقێ به‌رامبه‌ر داگیركه‌یا تركێ فاشیست ئه‌ڤ ڕاستیه‌ ئاشكرا كر كو بنه‌ماڵا بارزانی هه‌می كرامه‌ت و شه‌رافه‌ت و وژدانا گه‌لێ مه‌ هه‌ڤ شێوه‌ی سه‌رمایا ژێرخانا كوردی كریه‌ د به‌رمیله‌كا ده‌رگرتیدا و بۆ 50 ساڵا ڕاده‌ستی ده‌وله‌تا ترك كریه‌ و تاكه‌ چاره‌ ئه‌ڤه‌یه‌ كو ئه‌ڤ گه‌له‌ ژ وێ به‌رمیلێ ده‌ربكه‌ڤیت، وه‌ك گه‌لێ عێراقێ بێژیته‌ وان خایین و دز و داگیركه‌را ئه‌ز بێكرامه‌ت نینم و ژ عه‌ربان نه‌كێمترم، بێكرامه‌تان ژ ڕهۆ ڕیشالان ده‌ربینیت و ژ وه‌ڵاتی بكه‌ته‌ ده‌ر ژبۆ كو بكاریت كه‌رامه‌تا خوه‌ یا جاران ڤه‌گه‌ڕینیت نه‌ك یا هه‌ی ژی بدۆڕینیت..

ئەو بابەت و هەواڵانەی کە ناوی نووسەرەکانیان دیار و ئاشکرایە، تەنیا
نووسەرەکەی بەرپرسیارە، نەک تەڤداپرێس

تاكۆر زه‌رده‌شت