گەلۆ ئەگەر "رێبەر، سەرۆک، زانا و هشمەند"ێن کورد، پێداچوون و ڤەکۆلینێن رژد ل سەر ئالیێن ئەرێنی و نەرینیێن بوویەرێن گرینگێن دیرۆکا گەلێ کورد، نەکەن؟ پا دێ ئەقلێن کەڤنار، تەڤ ئارمانج و پرنسیپان ب ئارگومێنتان ــ Argumente پێچن، بەلێ پا ئەزموونێن زیندیێن جیهانێ ژی، ل سەر شکەستن و هلوشیانا دیرۆک و بوویەرێن خوە راوستیاینە. لەورا ئیرۆ دڤێت خواندنێن کوور و رژد ل سەر درستبوونا تەڤگەرێن کوردی بهێنەکرن، چونکو تا ئیرۆ ئەمێ باجان ددەین و دێ سوبەهی نفشێ نوو ژی هەر باجان دەت. بنێرە چەوا ئەرەب ژ بەر شکەستنا 1967، راستی شۆکبوونێ هاتن، چونکو پشتی ڤێ شکەستنێ هزرمەندێن ئەرەب/ جەلال سادق ئەلعەزم پەرتووکەک ب ناڤێ "رەخنا خوەیاتی پشتی شکەستنێ/ 1969" نڤیسی. دیارە دڤێت کورد ژی و ب تایبەتی ل باشوور، پشتی ڤان هەموو ڤێستگەهێن تراژیدی، هەر ژ ئینشیقاقا "1964 ــ 1966" یا د ناڤبەرا بارزانیێ باب و مەکتەب سیاسی دا درستبووی و تاکو دگەهیتە گرتنا پەرلەمانێ کوردستانێ "2014 ــ 2016"، ئەو ئارێشا د ناڤبەرا بارزانیێ کور و بزاڤا گۆران دا درستبووی، بکەن. ب هەمان تێگەهشتنێ، گرفت/ قەیرانێن/ "بەیانا 11 ئادارێ/ 1975" و "رێفرەندومێ/ 2017"، ژی دەنگێ گەلەک دۆست و هەڤالان بلندبوو، لێ دیسان سەرکرداتیا کورد گوهـ ل دەنگێن وان نەگرت. ئانکو گەلەک پێشنیار هەبوون، کو ئۆتۆنۆمیا هەیی جارێ بەسە، بەلێ سەرکرداتیا کورد گوهداریا دەنگێ ئەقلی نەکر، تاکو ل داویێ گەلێ کورد راستی "کیماباران، ئەنفال، وێرانکرنا گوندان و..." هاتی.

ئەگەر ئەم بخوازین ژ ڤێ گرفتێ دەرباز بین، دڤێت پەنەل و کۆنفرانسان ل سەر قووناغێن دیرۆکا خوەیا رەش و تاریا سالێن: ("64/ 1966"، "1974"، "1988"، "1991"، "1994"، "1996"، "2014" و "2017") بکەین، چونکو ئەڤا ئیرۆ روودای، رەهێن خوە دکێشیتە سەرهەڤبوونا شاشیێن هەمان ئەقل و ژێدەران. هەروەک نموونە، بنێرە دەرئەنجامێن سێ بوویەرێن تراژیدیێن گەلێ کورد، کو ب جوت پەیڤان هاتینە چارەسەرکرن: ل سالێن 1964 ــ 1966 تێگەهێن "مەلایی و جەلالی"، ل سالا 1975 تێگەهێن "ئاشبەتال و نسکۆ" و ل سالا 2017 تێگەهێن "عینادی و خیانەت"! سەرباری دڤێت مرۆڤ هەر بەحسێ (دەستبەردان و سەردەریا دگەل خەلکی ئەنفالا 1988، شەرێن براکوژی و ئینانا لەشکرێن دژمنان، رادەستکرنا شنگال و دەڤەرێن دی "2014" و فروشتنا کەرکووکێ "2017" هەر نەکەت! راستە ئەڤ قووناغێن ئەم تێرا بۆرین، نە ڤەدەری تەڤگەر و ئەزموونێن دیرۆکێ‌نە، بەلێ پا مرۆڤ وەک گرفت/ قەیران و هەستێن بەرپرسیاریێ، چ جودابوونێ د ناڤبەرا ڤان تەڤ قووناغان دا ناکەت.

د دیرۆکا تەڤگەر و شۆرشێن جیهانێ دا، هەر بێ پلانی و کورەفامیا دیالۆگا دگەل دژمن و یێ هەمبەر جورەکێ خیانەت و گونەهکاریێ بوویە. ئەگەر ب ڤێ پیڤانێ، ل دیرۆکا تەڤگەرێن کوردی بنێریت، گەلەک قووناغێن خیانەتێ ب خوەڤە دیتینە! دیارە فۆرمێن خیانەتێ ژی گەلەکن، چونکو خیانەت نە ب تەنێ گرتنا دەستێ/ یان داردەستیا دژمنانە، کو ئەڤە دکەڤیتە فۆرمەکێ ڤەکریێ خیانەتێ‌، بەلکو "خوەشباوری، بێ پلانی، بێ ئەختوباری، گەندەلی و..."، تەڤ جورێن خیانەتێ‌نە. بنێرە تەڤ هیڤی و خەونێن شەهیدێن مە هاتنە فروشتن، کو ئەڤە ب خوە ژی تەڤ رەنگێن ڤەشارتیێن خیانەتێ‌نە. مە دوهی شۆرش نەکرینە، داکو ئیرۆ ل هەڤهاتنێ بکەین، بەلکو مە شەرێن سار/ گەرم، ژ دوهی تا ئیرۆ بەردەوامکرینە! ئها ئەڤ دیرۆکا دژوارا شەرێن سار/ گەرم وەکریە، ئیرۆ ژی ل جهێ "هەڤکاری/ پارتنەری"، بوویە "نەیاری"، لەورا هەموو هیڤی و خەون هاتنە دزین و تالانکرن. ب ڤێ یەکێ، بێدادی و دۆزبەردان، حەز و ژێیاتیا ولاتی هاتە کوژتن، چونکو ئەم هێشتا ب هشمەندیا کەڤنەشۆپیێ و رەتکرنا یێ هەمبەر بارکرینە، دیارە ئەڤە ژی بەرمایێن رەفتار و زمانێ بەرێ مۆدێرنیزمێ‌نە.

ب کورتی، ئەو خەلکێ دوهی ژ بەر کوردینیێ شەهید دبوون، ئیرۆ ژی ب دەستێن کوردینیێ دهێنە مراندن/ کوژتن! ئێدی چەوا ئۆلان رەوشەنبیریا ژیانێ، کریە رەوشەنبیریا مرنێ، وسا ژی پارت و دەسەلاتا کوردی، ژیان ب تەڤایی کریە دۆزەخ/ مرن!

بەرلین، 2022.08.31