وتار

دبیت ئیران هزر ل دووبارەكرنا ئەزموونا رۆژئاڤایێ كوردستانێ بکەتەڤە

Wednesday, 10.26.2022, 02:24 PM

دبیت ئیران هزر ل دووبارەكرنا ئەزموونا رۆژئاڤایێ كوردستانێ بکەتەڤە
ل دویر ناهێتەزانین ئیران پێشنیارا رادەستكرنا بەشەکێ رۆژهەڵاتا كوردستانێ ب هێزەکا كوردستانی بكەت

دووڕیانا رۆژهەڵات
دەمێ خۆپێشاندانێن سوریا پێشکەتین و گەرم بووین، رژێما سوریا ب هەڤکاریا ئیرانێ بزاڤکرن كورد ل خۆپێشاندانێن سوریا دویربکەن و پیچەک رەوشێ دورپێچ بکەن.ل وی دەمی رێكخستنێن پەكەكێ ل رۆژئاڤایێ كوردستانێ چالاك بوو، كۆمەکا گروپان دروستكربوون ب ناڤێ تورا جوانان یان دەستا گەنجان دەست ب خۆپێشاندانێ کرن.
رژێما سوریێ پیلانا هندێ هەبوو كو كورد ل رۆژئاڤایی دوویربکەن ژ دروشمێ "بکەڤیت رژێم" و پشتی هنگی ل رێکا گفتوگۆیێ بشێن هندەک ژ مافێن سەرەتایی بدەنە كوردان و سەركردایەتیەکا كارتۆنی بۆ كوردان ل سوریێ بۆ ماوەکێ دیارکری دروستبكەن،پشتی هنگی ب سەناهی لێ پەشێمان ببن.هەتا ئەو پرۆسە جێبەجێ دبیت، بۆ ماوەکێ هێزەکا پێشمەرگەی بینە رۆژئاڤایێ كوردستانێ و رەوشەکا ئەمنی ب ستۆیێ خۆڤە بگرن.
ئەو بوو عەلی مەملوك كو زەلامەکێ نێزیك ژ بشار ئەسەدییە و بەرپرسیارێ دەزگەهێ هەوالگیریا سوریێیە، کەفتە لڤینێ و ل ناڤەڕاستا 2011 سەرەدانا هەولێرێ كر و ژبلی بارزانی كو وی دەمی سەرۆكێ هەرێمێ بوو، نوینەرێ پارتی و ئێکەتی دیتن.بەریا وێ سەرەدانێ قاسم سولەیمانیی نوینەرێ پارتی و ئێکەتی ل بەیروتي دیت بوون بۆ هەمان مەبەست و سەبارەت ب وێ پرسێ گفتوگۆ کربوون، سەرەدانا عەلی مەملوك ژی بۆ هەولێرێ ژلایێ قاسمی سولەیمانیڤە هاتبوو رێكخستن. ئەڤە بۆ هندێ بشێن هێزەکا پێشمەرگێن باشور ببەنە رۆژئاڤایێ كوردستانێ بۆ پاراستنا ئاسایش و ئەمنیەتێ و ئەو هێز بۆ ماوەکێ ل رۆژئاڤا بمینیت هەتا رێككەفتن لسەر هندێ پێنج هزار پێشمەرگان فرێکەنە باژێرێن كوردستانیێن سوریا و چەك و تفاق و مەزاختیێن وێ هێزێ ژلایێ سوریا و ئیرانێ بهێنە دابینکرن،بەلێ بزاڤێن وان سەركەفتی نەبوون ژبەرکو توركیا پیلان زانی! نەچاربوون بلەز سوریی و ئیرانی هەوارا خۆ بۆ قەندیلێ برن، ئەو بوو ناڤچێن كوردستانی، یان باژێرێن كوردستانا سوریا رادەستی وێ هێزێ كر کو پەكەکێ دروست کربوو ب ناڤێ یەپەگێ.

ب هزرا ئیرانی و سوریان رەوشێ دەمکیە و پشتی كۆنترۆڵكرنا خۆپێشاندانان دشێن ب سەناهی دگەڵ پەكەكێ رێكەڤن یان ژی ب هێز چارەسەریا ناڤچێن كوردی ژی بكەن،بەلێ رەوش ئاڵۆزبوو، داعش دروستبوو، ئێدی هەمی تشت ژ دەست سوریا و ئیرانێ دەرچوون.
خۆپێشاندانێن ئیرانێ رۆژ بۆ رۆژێ گەرمتر دبوون،دبیت زیکا نەهێتە كۆنترۆڵکرن،ژبەر هندێ ماوەکە هەمان هزر كو ل سوریێ جێبەجێكر ل ئیرانێ ژی بەحس دهێتەکرن و ب دویر ناهێتە زانین ببیتە پرۆژە و پێشنیار بۆ هێزەکێ یان چەند هێزەکێن كوردستانی ل رۆژهەڵاتا كوردستانێ بهێتەکرن.
ئانکو ئیرانی هزر ل هندێ دکەن كو دگەڵ گروپەکێ كورد ل رۆژهەڵاتا كوردستانێ بشێن پرۆژەکێ بدانن و رێكبکەڤن،ب جۆرەکێ كورد ل دروشمێ روخاندنا رژێما نوکە یا ئیرانێ دوویربکەڤن ل بەرامبەردا رژێما ئیرانێ بەشەک ژ ناڤچێن رۆژهەڵاتا كوردستانێ (ب سنورداریی) رادەست بكەت و دەسهەڵاتا سنوردار ب سەر ناڤچەیان هەبیت،پشتی هنگی گفتوگۆ دەربارەی پێدانا ماف و دەسهەڵاتان بهێتەکرن.

ئەڤا بەحس ژێ دکەم ب تنێ لێكدان نینە.ئەگەر خۆپێشاندانێن ئیرانێ بەردەوام بن، ئەڤ پێشنیارە پێشكەفتنا نوی‌ دێ ب خۆڤە بینیت.ب بوچوونا من ئەگەرێ ب هێز(ئەگەر گفتوگۆ بهێتەکرن) گفتوگۆیا ئیرانیان دێ دگەڵ پژاك بیت كو دیارە هێزەکا سیاسی و چەكدارییا نێزیک پەكەكێنە،ژبەرکو هەم رێكخستنەکا بەرفرەهـ ل رۆژهەڵاتا كوردستانێ هەیە، هەم ژی ژ روویێ سەربازیڤە رێكخستیتر و ب ئیمكانترن، هەر چەوا بیت ئەگەر رژێما ئیرانێ ل رەوشەکا هوسا دا لایەكێ دەرگەهێ ڤەکرەڤە بۆ گفتوگۆیێن مافێن گەلێ كورد، هوسا پێتڤیە لایەنێن كوردستانی ب هەستیارییڤە مامەلێ بكەن ژبەرکو نابیت كاریگەریا نیڤدەوڵەتی و هەرێمی دڤێ پرسێ دا ژبیربكەین. هەمی وێ راستیێ دزانن هەر گۆهرینەک یان پێشهاتەک دوویرنابیت ژ كاریگەریا نیڤدەوڵەتی، ب تایبەتی ژی ئەمریكا و ئوروپا.

ئەو بابەت و هەواڵانەی کە ناوی نووسەرەکانیان دیار و ئاشکرایە، تەنیا
نووسەرەکەی بەرپرسیارە، نەک تەڤداپرێس

سەرتیپ جەوهەر