ئه‌ز قورباننۆ (ئه‌مجه‌د یوسف، کۆڤان تارق، یوسف شەریف، مه‌حمود ناجی، نێچیرڤان به‌دیع) سه‌رێ بلندێ وه‌ ب وێ جۆش و گه‌رماهیا كو وه‌ دیتی ل كۆلانێت شێلادزا خۆڕاگر دیسا به‌رچاڤێ هه‌می جیهانێ دیار بۆ.

ڕێویێن ئازادیێ، هێمایێن به‌رخودانی و گورزێ گران به‌رامبه‌ر ده‌نگێ زۆڕداریێ هێژایی ڤێ گه‌رماهیا بجۆش بوون. سیمبولێن به‌رخودانا 2 ساڵان ئه‌شكه‌نجێن ده‌روونی و جه‌سته‌یی و گرانیا دویراتیا ژ خێزان و خۆشتڤی و حه‌زكریێن خوه‌ و گرانیا ئازارێن بن ئیرادا مانگرتنا ب رۆژێن درێژ، نه‌چاریا بێ ئاگه‌همانا ژ وان ده‌نگ و باسێن كو ڕۆژانه‌ هه‌دارا وه‌ یا شه‌ره‌فمه‌ندیێ پێ ته‌نا دبۆ، دویر كه‌تن ژ ئازادیا لناڤا سه‌قاێ پیرۆزێ وێ ده‌ڤه‌را به‌حه‌شت و دانگا چیایێن پان و به‌رینێن به‌رێگارێ، دۆلا سیدا، هه‌فته‌به‌قێ، كوره‌ژارۆ، سه‌رێ گه‌لیێ بالندا و ئاڤاشین.. بڕاستی ئه‌و ئه‌ساره‌تا وه‌ كێشای هه‌كه‌ ژبۆ خه‌لكه‌كێ جاره‌كێ قه‌فه‌س بیت، بێگۆمان ژبۆ وه‌ هزاران جار گرانتر بۆیه‌!
له‌وره‌ هوین دڤێت بزانن، جوانیا وه‌ و عه‌شقا په‌ڕ و باسكێن وه‌ نه‌ هێژایی وێ قه‌فه‌سێ بوو، 2 ساڵ ژ پڕبهاترین ده‌مێ ته‌مه‌نێ وه‌ ل بن پڕئازارترین رۆژێن گران دا ده‌رباز كرن، وی ده‌مێ كو ئاگر و خوین و ژه‌هر و بارووت ل شوینا بارینا ره‌حمه‌تا عه‌سمان و كایناتا بسه‌ر ده‌ڤه‌رێ دا دباری ده‌نگێ قیژێنا باز و شاهینێن وان زناران د گه‌وریا ژ میناكێت وه‌ دا دڤه‌هی، وی دژمنی ب بێده‌نگ كرن و ڤه‌دزینا وی ده‌نگێ بهێز، كه‌وێت كه‌هی كری ل وان دانگان ڤه‌حه‌واندن و ل شوینا وان قێژینا، قبقبا كه‌وێ كه‌هی به‌ردانه‌ وان زناران و دڤێت هوین باش بزانن ئه‌و كه‌و نه‌هێژایی ده‌ڤه‌را وه‌نه‌، كو ئیرۆ هوین هاتینه‌ به‌ردان وان 2 ساڵێن پڕئازار ده‌نگێ وه‌ هزار جارا بلندتر لێ كریه‌، لێ تنێ گه‌ر كو هوین بزانن ئه‌وان نه‌كاریه‌ وه‌ بته‌فینن، وان 2 ساڵ ژ پڕبهاترین ده‌مێن ته‌مه‌نێ وه‌ خار راسته‌، وان هوین ئازار و ئه‌شكه‌نجه‌دان و ژ ئازادیا كو مافێ وه‌ بۆ مه‌حروم كرن راسته‌، وان هوین كێشانه‌ بن چه‌كۆچێ دادگه‌هه‌كا ڕه‌فزبویی و سۆتی و ب بێدادی سزا لسه‌ر وه‌ سه‌پاندن راسته‌، ژیان ل ماڵباتێن وه‌ ب ئێش و ئازارێن ده‌روونی كرنه‌ دۆژه‌ھ ڕاسته‌، لێ ئه‌ڤه‌ لسه‌ر وه‌ دمینیت كانێ چه‌وا ل وێ هه‌می كه‌دا كو وه‌ دای خودان ده‌ركه‌ڤن. من وه‌ك دڵسۆزه‌كێ جۆشا كانی زه‌ڵالا روحێ گه‌نج و گه‌نجینه‌یا ده‌ڤه‌را وه‌ كو ئێك ژ وان كه‌سانم بساڵ و مه‌ھ و ڕۆژان ئازارا وه‌ ژ دل خواری، من ڤیا ڤێ په‌یاما ده‌رڤه‌كری بۆ وه‌ دانم و وه‌ هایدار بكه‌م لسه‌ر ڤان ڕاستیان و چه‌ند خالێن هه‌ستیار.

ئێكه‌م، هوین هه‌كه‌ به‌رێ ب مه‌زلومیه‌ت ڤه‌ هاتنه‌ گرتن و وه‌ چ نه‌كربۆ، ئیرۆ هوین نه‌چارن ئێدی بكه‌ن.

دووه‌م، گه‌ر هوین ئیرۆ وێڤه‌ ب هشیاری و ب وژدانی ل وێ كه‌دا وه‌ دای و وێ بێدادیا ده‌رحه‌قێ وه‌ هاتی كرن لخوه‌ خودان ده‌رنه‌كه‌ڤن هوین ڤێ جارێ بڕاستی دێ مرن، چونكی ده‌نگێ مه‌زلومیه‌تا وه‌ هه‌تا هه‌فت عه‌سمانا و چار به‌شێن ڤێ جیهانێ گه‌ریایه‌ و مه‌حاله‌ ئه‌ڤ ده‌سه‌ڵاته‌ ئێدی بشێت دووباره‌ خوه‌ لوه‌ بجه‌ڕبینیت و مافێ وه‌ یێ ده‌ربڕینا وی تشتێ بسه‌رێ وه‌ هاتی هه‌ر چنه‌بیت ب ده‌ربڕینا راستیان ژ سه‌دێ سه‌ده‌ و پێدڤیه‌ هوین بسه‌لمینن كو هه‌ر ئه‌و كانی زه‌ڵاڵێت دانگا گارێ و ده‌ڤه‌را مه‌رده‌مێرێن ڕێكانن و وه‌ چ كێمتر ژ گه‌نجێت دیرۆكا مێرخاسیا نه‌ته‌وا خوه‌ نینه‌.

سێیه‌م، بزانن د كه‌سایه‌تا وه‌دا هزاران هزار گه‌نجێن پرجۆش و ب حه‌ماس و ب خیره‌ت هاتنه‌ زیندان كرن، هاتنه‌ بێده‌نگ كرن، ب ترساندنێ، ب گڤاشتن و ته‌هدید و سنوردار كرنێ، ب كۆچبه‌ركرنا ژ ده‌ڤه‌ر و وه‌ڵاتی، لێ وه‌ دیت كو چه‌وا هه‌ر دیسا ژی جۆش و حه‌ماس ژبۆ وه‌ كه‌تیه‌ مه‌یدانان، ب وێ پێشوازیا مێژوویی یا كو ل وه هاتی كرن‌، بزانن وان كڕا ڕك و كینا خوه‌ به‌رامبه‌ر وێ زولمێ ب وێ عه‌شقا ب وه‌ ڤالا دكر، له‌وره‌ دڤێت بزانن بارێ وه‌ گرانتر بۆیه‌، چونكی هه‌كه‌ هوین ل سه‌ر ڤان بۆیه‌رێن بسه‌رێ وه‌ هاتین بێده‌نگ مان ئه‌ڤه‌ دیسا ئه‌و هزاران گه‌نجه‌ بدروستی ڤێ جارێ وه‌ كوشتن، هه‌م ژی ده‌نگێن ل كێله‌ك وان گه‌نجان، پێخه‌مه‌ت كرامه‌تداریا وه‌ ژبۆ ئازادیا وه‌ بلند بوی دێ ژ هیڤیا ب وه‌ هێنه‌ كوشتن.

چواره‌م، هوین و ب ده‌هان گه‌نجێت وه‌ك وه‌ گرتن و سزا دان، هنده‌ك مێرخاسێت ده‌ڤه‌را وه‌ ب ناڤێ لێدانا فرۆكێت داگیركه‌را كرنه‌ قوربان، ب هزاران گه‌نجێت وه‌ك دڕ و ئه‌ڵماسان ب ڕێخوه‌شكرنا ژبۆ ده‌رڤه‌ی وه‌ڵاتی و ئاواره‌ییان هه‌نارده‌ی ده‌رڤه‌ی وه‌ڵات كرن كو ل شوینا به‌رهه‌مێت كشتوكالی و پێشه‌سازی ئه‌ڤه‌یه‌ تاكه‌ مه‌تاێ پڕبهاێ وه‌ڵاتێ مه‌ ل ڤان 30 ساڵان بۆ وه‌ڵاتێت بیانیا، یێت مایی ژی ب بێده‌نگ كرنێ، ب ترساندنێ و ڤه‌مراندنا ب ڕێیا هنده‌ك سالوسێت كرێگرتی و بێ غیره‌ت شێلادزا ئازاد ل وان كرنه‌ زیندان، لێ ئیرۆ هوین ل ده‌رڤه‌نه‌ و نه‌هێژایه‌ ده‌ڤێ وه‌ لسه‌ر چنه‌بیت مافێ وه‌ و گه‌نجێت وه‌ك وه‌ ل ده‌ڤه‌رێ بكه‌ڤیته‌ سه‌رێك، لسه‌ر چنه‌بیت كۆمكرنه‌ڤا وان گه‌نجێت كو بهاێ هه‌ر ئێك ژ وان هندی چیایه‌كێ ئه‌ڵماسیه‌ ژبۆ پێشه‌رۆژا وێ ده‌ڤه‌رێ و ڕێگریا وه‌ ل كۆچكرنا وان به‌ر ب ده‌رڤه‌ی وه‌ڵات.

پێنجه‌م، و لدوماهیێ قوربانۆ، هوین به‌لكی باشتر ژ من دزانن، مرن ئه‌ڤه‌ نینه‌ خوینا من  و وه‌ بڕژیته‌ سه‌ر ته‌رشه‌ كه‌ڤره‌كێ یان سه‌ر چیمه‌نتۆێ چواردیواره‌كێ ب ده‌ستێ كه‌سه‌كێ بێ كه‌سایه‌ت و سه‌رشۆڕێ ده‌ستێ دژمنا، ژخوه‌ ئه‌ڤه‌ ب شاهدیا وه‌، بساڵانه‌ شێره‌ مێرێت ده‌نگێ رۆژێ رۆژانه‌ وێ خوینێ دده‌ن و هه‌ر زیندینه‌، وه‌ك دێمانێ سه‌ربلند و ڕێهه‌ڤاڵێت وی، لێ مرنا راسته‌قینه‌ ئه‌و مرنه‌ كو حاشایی رویێ وه‌، سالوسێت ژبۆ پاریه‌كێ نانێ بێ زه‌حمه‌تی خوه‌ ژبۆ بێغیره‌تیێ دچه‌مینن، ژبۆ پله‌یه‌كێ كو ژ ئه‌گه‌را جه‌بانی و ترسنۆكیێ وان پێدڤی پێ هه‌یه‌، مرن ئه‌وه‌ كو مرۆڤ دیف قه‌بینا كه‌وی به‌ر ب نه‌مانێ ڤه‌ بچیت، مرن ئه‌وه‌ لسه‌ر به‌حه‌شتا ده‌ڤه‌را خوه‌ مرۆڤ ده‌ڤێ خوه‌ ب جه‌هنه‌م كرنا وێ دانیته‌ سه‌ر ئێك، هوین 2 ساڵه‌ ژ هه‌ركه‌سه‌كێ وێ ده‌ڤه‌رێ زیندیتر بۆن، ئه‌ز نه‌هێژایی وێ مه‌ ژیانێ فێرێ شه‌ره‌فمه‌ند و مه‌رده‌مێرێت شێلادزا سه‌ربلند یێت وه‌ك وه‌ بكه‌م، تنێ به‌لكه‌ ڕێنماییه‌ك برایانه‌ بیت كو بكاریت وێ مه‌نگیا ئحتیمال یا ب 2 سالان زیندان و ئه‌شكه‌نجێ ژ سه‌رێ وه‌ ڤه‌په‌شینیت و جرفه‌ك نوی لسه‌ر بارێ گرانێ لسه‌ر ملێ وه‌ بده‌ته‌ وه‌.

چ جاران ژبیرنه‌كه‌ن، به‌رخوه‌دان و سه‌ربلندی و ئازادی هێژایی وه‌ و گه‌لێ ده‌ڤه‌را وه‌یه‌ و  چ كه‌سێ ماف نینه‌ وه‌ ژێ مه‌حروم بكه‌ت، جا هه‌كه‌ بمرن و زیندانكرنێ بیت، یان ب ئازادی و ژیانكرنێ.