خویشكا له‌زیزا دل بریندار، دایكا برومه‌تا كورد، بناڤێ ته‌ سه‌رخۆشیێ ل گشت ماڵباتێن ڤان شه‌هیدان دكه‌م، و پڕ خه‌مبارم بۆ ڤێ ڕویدانا هۆڤانه‌ و دل ته‌زین. لێ..
ژبۆ ڤان شه‌هیدان دڤێت ئێك دڵۆپ ژی رۆندك نه‌هێن باراندن، ئێك كوردی ژی تۆمه‌تبار نه‌كه‌ین!
ئه‌ڤه‌ مه‌سیرا مه‌ كوردا یا هه‌ر ڕۆژ ل قوناغا سه‌د سالێن ده‌ربازبوویی یه‌، دڤێت وێ كول و كۆڤانێ ب رۆندكا ده‌رنه‌كه‌ین دا خیانه‌تێ ل وێ دیرۆكا پڕی خوین نه‌كه‌ین، دا بزانین دڤێت ب چ هه‌ست و رۆحیه‌ته‌كێ ڤێ تاوان و ڤێ زوڵمێ ژبیر نه‌كه‌ین و چه‌په‌رێ خوه‌ یێ راست بناسین، دا نه‌بینه‌ شریك دگه‌ل زاڵمان، هه‌ر وه‌ك چه‌وا ئه‌ڤ جوامێرێ شه‌هید وه‌سیه‌ت دكه‌ت.

بزانین كو هه‌ر ئایه‌ته‌ك و هه‌ر پێغه‌مبه‌ره‌ك و هه‌ر ئایینه‌ك كو هاتیه‌ سه‌ر رویێ زه‌ویێ بۆ ڤێ هاتیه‌ كو بزانین زاڵم كافره‌ و یێ خۆ لبه‌ر وێ كوفرێ دچه‌مینت ژی شریكێ وی كافرییه‌، ئه‌ڤرۆكه‌ عیباده‌تا خودێ و هه‌ر قودسیه‌ت و پیرۆزییه‌ك دپێناسا ڤێ راستیێ دا ئاسێ یه‌، له‌وا هه‌كه‌ كه‌سوكارێت وه‌ ب ڤی ره‌نگی گیانێ خوه‌ سپارتن ئه‌ڤه‌ دهێته‌ ڤێ واتاێ كو كه‌سێت پربها و پیرۆزن، له‌وا هۆسا چۆن، به‌س دڤێت هوون وه‌ك بهادانا ب خوینا وان یا پیرۆز ئێدی بزانن كو گه‌لیێ زیلان چ دیرۆكه‌ك دگه‌لدایه‌ و كۆمكوژیا ئاراراتێ بناسی، كۆمكوژیا دێرسمێ، ساریقامیشێ، ئامه‌دێ، دێرسمێ، مه‌رعه‌شێ، سیواسێ و به‌سه‌دان هزار دایك و باب و هه‌تا زارۆكێن چاڤه‌رێ بۆن ژدایك ببن ب ده‌ست ڤان به‌ربه‌ر و مه‌غول وته‌تارێت هۆڤ هاتنه‌ كۆمه‌لكوژ كرن و تشتێ كو دایكه‌ك جه‌گه‌رسۆتی یا وه‌ك ته‌ دڤێت باش بزانیت ئه‌ڤه‌یه‌ كو هێشتا ژی ئه‌ڤ كۆمكوژیه به‌رده‌وامه‌ و رۆژانه‌یه. هه‌لبه‌ت كو ناڤێ گه‌لێ ڕێكان و ڕێكانی و به‌رخودانا وان یا ل هه‌مبه‌ر هۆڤیتیا ترك قه‌ت د هشێ تركۆ دا نه‌هاته‌ ژێبرن كو ل 26ێ ڤێ مه‌هێ سالیادا وێ سه‌رهلدانا پیرۆزه‌، ئه‌ڤه‌ ژی چه‌مكێ تركێ فاشیسته‌ كو قوتابیێن په‌روه‌ردا هێتله‌ر و نازیسما ره‌شن و ب ڤی ره‌نگی ب كوشتنا سڤیلان و سۆتاندنا جه‌رگێ مه‌ به‌رسڤا هه‌ر به‌خودانه‌كا مێرخاسانه‌ دده‌ن.‌.

رۆژانه‌ جه‌گه‌را مه‌ دسۆژیت، رۆژانه‌ لاپه‌رێت مێژۆیه‌كا سۆر و خویناوی ئاگری به‌ردده‌ته‌ ناخێ هه‌ر مرۆڤه‌كێ كوردێ بشه‌ره‌ف و ب غیره‌ت، د هه‌مان ده‌مدا ب ئازار تر ژ ڤان هه‌میا ئه‌و بێ كه‌رامه‌تێن ده‌ستهه‌لاتا بناڤ كوردی كو ده‌هان ساڵه‌ ملشۆڕێت ڤان هۆڤانه‌ بوینه‌، ئامیرێ پێشخستنا ئابۆریا ده‌وله‌تا تورك ل مه‌كانیزما بۆمبه‌رباران و كۆمكوژیێت لسه‌ر گه‌لی مه‌بۆینه‌، ب ده‌هان سازیێن هه‌والگیری وه‌ك چاڤ و گوهێن وان داگیركه‌ران ده‌زگایێ سیخوریا ل خزمه‌تا ده‌وله‌تا ترك بوینه‌، ڕه‌نگڤه‌دانا كلتور و چاندا ترك بوینه‌ ل به‌رامبه‌ر چاند و كلتورێ گه‌لێ وێران بویی یێ سه‌دان سالان، هێزا چه‌ك و فیشه‌كا وان بۆینه‌ ل سینگێ هه‌ر كورده‌كێ كو به‌حسا كوردبون و نه‌ته‌وه‌بون و ئێكگرتنا نه‌ته‌وه‌یی كربیت، ئایینێ پیرۆزێ ئیسلامی و ئایینێ كورده‌واریا بێ گه‌رد به‌ر ب منافقی و سیاسی كرنا مه‌عنه‌ویتا خودایی برینه‌ لگۆری ده‌جالێت ژێر ناڤێ ئایینێ ئیسلامێ كو ده‌وله‌تا ترك نوكه‌ پێشه‌نگیا وێ دكه‌ت.
ژ هه‌میێ وێران تر ده‌زگایێن راگهاندنا كوردی ل هه‌رێما مه‌ ب سیاسه‌ت و ده‌ربرینێت به‌رۆڤاژیكرنا راستیان دخزمه‌تا ده‌وله‌تا ترك دا بوینه‌، وه‌ك چه‌وا شه‌هید بونا ڤان هاولاتیێن مه‌ وه‌كی هه‌رجار دیسا ب شانۆگه‌ری به‌رێ وێ تاوانێ خستینه‌ لاێ شۆره‌شگه‌رێت كورد!
به‌س ئه‌رێ پا كۆمكوژیا رۆبۆسكێ كێ كر؟ كۆمكوژیا ل سیواسێ و یا ل ئه‌نقه‌رێ به‌رامبه‌ر ئاشتیخوازان كێ كر ده‌مێ سه‌دان كه‌س شه‌هید و بریندار بۆین، هێرشا سه‌ر وان گه‌شتیارێت دهۆكی ل ترابۆزانێ سه‌را ئالایه‌كێ سۆتی یێ بناڤێ كوردی دستوهێ كێ دابۆ؟ رۆژانه‌ جه‌نازێت كورد ل زیندانان بناڤی خۆكوشتن ده‌ردكه‌ڤنه‌ ده‌رڤه‌ كێ دكه‌ت؟ سالا 2013ێ سێ ژنێت كه‌سایه‌ت و سه‌ركردێت كورد ل پاریسێ هاتینه‌ تیرۆركرن كێ كر؟ ژخوه‌ ئه‌و ژی راگهاندنا ڤێ ده‌ستهه‌لاتا هه‌رێما مه‌ وه‌ك زمانحالێ راگهاندنا ده‌وله‌تا ترك هه‌میا كرنه‌ ستوهێ وان شۆره‌شگه‌رێت كورد، هه‌تا كو به‌رپرسێ میتێ پشتی چه‌ند ساڵا كو ئه‌سیر كه‌تیه‌ ده‌ستێ شۆره‌شگه‌ران، راستی ئاشكه‌را كر و گۆت كو چه‌وا وان بخوه‌ ب پیلان ئه‌و تیرۆر بڕێڤه‌ برینه‌.

ژ خوه‌ هه‌ر ڤان رۆژێن بۆری بۆ كو سێ سیاسه‌تڤان و هونه‌رمه‌ندێت كورد دیسا ب هه‌مان سناریۆ ل هه‌مان پاریسێ كومه‌لكوژ كرن. ما نه‌ تیرۆرا تاهر ئێلچی پارێزه‌رێ كوردپه‌روه‌رێ كورد ل 2015ێ ژی كرنه‌ ستوهێ شۆره‌شگه‌رێت كورد؟ مانه‌ هه‌ر دسه‌ریدا ژ ساڵێن هه‌فتیان وه‌ره‌ ب تیرۆرا حه‌قی قه‌رارێ سه‌ركردێ ده‌سپێكا شۆره‌شا باكور كو خستنه‌ ستوهێ ڤان شۆره‌شگه‌ران و هه‌تا دوماهیێ هه‌ر تاوانه‌كا قڕێژ ب هاریكاریا ڤان خیانه‌تكارێت كورد ل هه‌رێمێ هاتینه‌ سه‌رپۆش كرن؟ یان ب سه‌دان رۆشنبیرێن كورد یێن وه‌كی موسا عه‌نته‌رێن ل باكور و ره‌ئوف ئاكره‌ییان ل باشوور، هه‌ر هه‌می كرنه‌ ستوهێ وان شۆره‌شگه‌را. ژخوه‌ ئه‌و زارۆكێت ل بامه‌رنێ ژی شه‌هید بۆین هه‌ر ب زارێ بێكه‌رامه‌تانه‌یا پایه‌دار و رایه‌دارێت ڤێ ده‌ستهه‌لاتێ كه‌تنه‌ ستوهێ وان شۆره‌شگه‌را .

باشه‌ شۆره‌شگه‌رێت كورد هێشتا فرۆكه‌ نینن، هه‌كه‌ دا ڤان ده‌هان سه‌ركردێت ل ڤان چه‌ند ساڵان و ب سه‌دان خه‌لكێ سڤیلێ ده‌ڤه‌را ئامێدی و شێلادزێ ژی هه‌میا دا ئێخنه‌ سه‌ر ستوهێ وان شۆره‌شگه‌را.
به‌س دیاره‌ ئه‌ڤه‌ ژ ئه‌گه‌را مرنه‌كا سه‌رانسه‌ریا كورده‌ كو دشێن هه‌م نه‌فتا مه‌ بۆ 50 ساڵان داگیربكه‌ن، سه‌رمایا مه‌ بدزن و تاڵان بكه‌ن و بده‌نه‌ ب چه‌ك و هه‌م ژی مه‌ پێ قه‌تلعام بكه‌ن و هه‌م ژی ب ده‌ستێ كوردێ فرۆتی و سۆتی ژی پرۆپاگندا بۆ تۆمه‌تباركرنا شۆره‌شگه‌رێت راسته‌قینه‌یێت مه‌ بكه‌ن، لی تنێ وه‌سیه‌تا ڤی جوامێرێ پاكره‌وانه‌ و خوینا پیرۆزا وان دایك و خویشك و باب و زاڕۆكێت مه‌یه‌ كۆ ل مه‌ دكه‌ته‌ هه‌وار و دقێڕینیت و دبێژیت: دگه‌ل زاڵمی نه‌به‌، هه‌كه‌ تو ژی كافری و شریكێ زاڵمی و ل هه‌مبه‌ر وان رابه‌ سه‌ر پێیان و خۆ بێده‌نگ نه‌كه.