ل رێڤەبەرییا پولیسێن کارەبا دهوك لسه‌ر دوو پۆلیسێت بندیوارێن ژن ئالوزی کەفتە ناڤبەرا عەمید موسا بەرواری و عەمید نایف دوسکی.

به‌ری سێ ڕۆژا عه‌مید نایف دۆسكی ل جهێ عه‌مید موسا به‌رواری وه‌ك رێڤه‌به‌رێ پۆلیسێن كاره‌با دهۆكێ دهێته‌ دانان. پشتی ده‌ست بكاربونا عه‌مید نایفی وه‌ك رێڤه‌به‌رێ پۆلیسێن كاره‌با دهۆكێ، ڕادبیت ب كارێ دیفچۆنا میلاكێن پۆلیسێن ڤێ ئیدارێ و بۆ وی ئاشكه‌را دبیت نێزیكی 30 ژن لسه‌ر میلاكێ پۆلیسێن كاره‌بێ هاتینه‌ دامه‌زراندن بێ كو ڕۆژه‌كێ ده‌وامێ بكه‌ن.

عه‌مید نایف داخازا ڤه‌گه‌ڕینا وان بۆ ده‌وامێ ژ ئه‌فسه‌رێن كاربده‌ست دكه‌ت، لێ ئه‌فسه‌ر وی ئاگه‌هداردكه‌ن كو ئه‌ڤ ژنه‌ هه‌می گرێدای عه‌مید موسا به‌رواری نه‌ و موچه‌خۆرێت بندیوارێت وی نه‌.
پشتی لێكۆلینه‌كا به‌رفره‌ھ دیار دبیت ئه‌ڤ ژنێت بندیوار هه‌می دۆست و كه‌س و كارێت موسا به‌رواری نه‌ و بساڵانه‌ ل سه‌ر میلاكی پۆلیسێن كاره‌بێ موچه‌ی وه‌ردگرن. عه‌مید نایف داخازێ ژ عه‌مید موسا دكه‌ت وان ژنا بنێریته‌ ده‌وامێ، لێ ئه‌و ڕه‌د دكه‌ت كو ئه‌ڤ ژنه‌ ده‌وامێ بكه‌ن هه‌ر ژبه‌ر ڤێ ژی شه‌ڕه‌ده‌ڤ دناڤبه‌را واندا روی دده‌ت. عه‌مید نایف ژبه‌ر به‌رپرسیاریا ڤێ كریارێ دگه‌هیته‌ ڤێ ئه‌نجامێ ڕاپۆرتا ڤێ گه‌نده‌لیێ بۆ وه‌زاره‌تا ناڤخۆیا هه‌رێمێ بلند بكه‌ت.

موسا به‌رواری په‌نایێ دبه‌ته‌ كه‌ساتیێن عه‌شایری یێن دۆسكیا دا ڕێگریێ ل نایف دۆسكی بكه‌ن هه‌تا ئه‌و ده‌رفه‌تێ په‌یدا كه‌ت ڤان ژنا ڤه‌گۆهیزیته‌ سه‌ر میلاكه‌كێ دی گرێدای خوه‌. ئه‌ڤ بابه‌ته‌ هلاویستی مایه‌ و هیچ داموده‌زگه‌هه‌ك نینه‌ لێپڕسین و لێكۆلینێ لسه‌ر ڤی بابه‌تی بكه‌ت و چاره‌سه‌ریا به‌رپرسیاریا ڤێ گه‌نده‌لیێ بگریته‌ ستوو، بتایبه‌ت ده‌مێ لنگێ چاره‌سه‌ركرنا ب ڕێیا عه‌شیره‌تی هاتیه‌ ناڤ بابه‌تی.

بارزان به‌رواری