لە راپۆرتێکی سەندیکای رۆژنامەنووساندا هاتووە، لە نیوەی یەکەمی ئەمساڵدا ٤٤ حاڵەتی توندوتیژی دژی رۆژنامەنووسان لە هەرێم تۆمارکراوە و زۆربەیان لە پارێزگای هەولێر بووە و فیدراسیۆنی نێودەوڵەتی رۆژنامەنووسانیش داوادەکات پارێزگاری لە رۆژنامەنووسانی هەرێم بکرێت.

بەپێی راپۆرتێکی سەندیکای رۆژنامەنووسانی کوردستان، لە نیوەی یەکەمی ئەمساڵدا، ٤٤ حاڵەتی پێشێلکاری دژی رۆژنامەنووسان و راگەیەندکاران لە هەرێمی کوردستان تۆمارکراوە.

🔻لەسەر ئەو پرسەش فیدراسیۆنی نێودەوڵەتی رۆژنامەنووسان سەرکۆنەی پێشێلکارییەکانی ئازادی راگەیاندن دەکات و داوا لە کاربەدەست و لەیەنە پەیوەندیدارەکان دەکات رێکاری پێویست بگرنەبەر بۆ پاراستنی رۆژنامەنووسان.

لەکۆی ئەو ٤٤ حاڵەتە پێشێلکارییانەی دژی رۆژنامەنووسان لە هەرێمی کوردستان تۆمارکراوە، هەندێکیان بەرامبەر رۆژنامەنووسی سەربەخۆ ئەنجامدراوە و هەندێکی دیکەیان بەرامبەر ئەو رۆژنامەنووسانە ئەنجامدراوە کە سەر بە دامەزراوەیەکی میدیایین.

جگە لەوەش لە ٢٢ حاڵەتی دیکەدا قەدەغەی رووماڵی راگەیەندنیان بەسەردا سەپێنراوە و شەش حاڵەتی توندوتیژی و سوکایەتیکردن بە رۆژنامەنووسان و چوار حاڵەتی دەستبەسەردا گرتنی کەلوپەل و دوو حاڵەتی لێدان لە رۆژنامەنووسان تۆمارکراوە.

هەر بەپێی راپۆرتی سەندیکای رۆژنامەنووسانی کوردستان، لە ماوەی نیوەی یەکەمی ئەمساڵدا ٨٤ دامەزراوەی میدیایی و رۆژنامەنووسی لە هەرێمی کوردستان رووبەڕووی توندوتیژی بوونەتەوە.

زۆربەی حاڵەتەکانیش لە پارێزگای هەولێر تۆمارکراوە و ١٤ حاڵەتی لە سەندیکای رۆژنامەنووسانی کوردستان تۆمارکراوە و لە پارێزگای دهۆکیش ١٠ حاڵەتی بەڵگەدار تۆمارکراوە و لە پارێزگای سلێمانیش هەشت سەرپێچی دژی رۆژنامەنووسان تۆمارکراوە.