ب باوه‌را من كاك ئه‌دهه‌م بارزانی ئه‌ڤ گومانا لسه‌ر خوه‌ شكاند كو جارنا ئاراسته‌ی وی دبۆن، وی ب ڤێ داخوازێ و په‌یاما راشكاوانه‌ پێنگاڤه‌كا جوان هاڤێت به‌رامبه‌ر شكاندنا ڤێ تڕسێ كو ئه‌دهه‌م بارزانی پۆتانسیه‌لا پارتی بیت ژبۆ كۆمكرنا ده‌نگێن نه‌ڕازی، ژبه‌ر كو ئه‌و هه‌می به‌ره‌یا پێكڤه‌ داخواز دكه‌ت بۆ لهه‌ڤكرنه‌كا لسه‌ر بنه‌ماێ ستراتژیه‌كا سیاسی و ئۆپۆزسیۆنی ژبۆ ڕزگاركرنا ڤێ هه‌رێمێ ژ ده‌ستێ تاوانبارێن سه‌رێ ڕه‌ش، بگشتی لگۆری ده‌ربڕینێن وی كه‌واتا مژاره‌كا تاكڕه‌وی ل به‌ینێ نینه‌ و به‌رپرسیاریه‌كا دیرۆكی هه‌یه‌.

ئه‌و هه‌ستیاری و مه‌ترسیدار بوونا قوناغێ دنرخینیت و ده‌ستهه‌لاتا سه‌رێ ڕه‌ش وه‌ك وێرانكارێ هه‌ر ده‌سكه‌فته‌كێ ددانیته‌ به‌رچاڤ و بانگا چاره‌سه‌ریێ ل هه‌ر به‌ره‌یه‌كێ ب به‌رپرسیارانه‌ دكه‌ت و گونجای دزانیت سه‌رانێن سه‌رێ ڕه‌ش بكه‌ڤنه‌ ژێر لێپڕسینا دادگه‌ها مێژویا سه‌رده‌م.

ل ڤێ بانگه‌وازیا ژلاێ پسمامێ مه‌سعود بارزانی هاتیه‌ كرن هه‌ركه‌س و لایه‌ن و به‌ره‌یه‌كا مه‌یدانی دكاریت هه‌تا ب ڤه‌ده‌ركرنا كاك ئه‌دهه‌می ژ هه‌ر قه‌واره‌كا سیاسی ژی دیسان وه‌جێ بگریت!

بگشتی ته‌ڤاهیا خالێن دیاركری یێن ئه‌دهه‌م بارزانی د ڤێ بانگه‌وازیێ دا ده‌ربڕینێ ژ ڤێ دكه‌ت:

ستراتژیه‌كا سیاسی یا هه‌ڤبه‌ش ژبۆ به‌ره‌یه‌كا ئۆپۆزسیۆنی ژبۆ هلبژاردنان، كه‌واتا

كاركرن لسه‌ر ڤه‌گه‌ڕاندنا باوه‌رییێن شكه‌ستی د به‌ره‌یه‌كا گونجای یا ئۆپۆزسیۆندا كو ب ڤێ ئێكگرتنێ بێ شك دێ به‌شداریه‌كا ملیۆنی هێته‌ مه‌یدانێ هه‌م ژی داخاز دكه‌ت هه‌می ڕێكارێن ڕێگریا سه‌خته‌كاریا د هه‌لبژاردنان دا بهێنه‌ ده‌سته‌به‌ركرن كو بڤێ هه‌ڤگرتنا به‌رباس و چاڤدێریا تایبه‌تا ژلاێ نه‌ته‌وێن ئێكگرتی و كۆمسیۆنا بلند، ژبۆ پارتی قه‌ت مجالێ ڤێ سه‌خته‌كاریێ نامینیت یان دێ ڕێژه‌كا زێده‌ سنۆردار بیت، هه‌م ژی دیاره‌ كاك ئه‌دهه‌م وه‌كه‌ ئه‌زمون ل ڤێ سه‌خته‌كاریا دناڤ مسیۆنا ڕێڤه‌به‌ریا پارتیدا بباشی هایداره‌.

بانگا خه‌باته‌كا هه‌ڤبه‌ش یا نه‌ته‌وه‌یی دكه‌ت، كو بسالانه‌ وه‌ك دناڤا سندۆقه‌كا ژه‌نگیدا ده‌رگرتی مایی و ژلاێ هه‌ر به‌ره‌یه‌كا سیاسی تنێ د پرۆپاگندێن سه‌خته‌كارانه‌دا وه‌كه‌ دروشم هاتینه‌ بكار ئینان و قه‌ت پێگیری پێ نه‌هاتیه‌ كرن.

پێشنیارا لژنه‌كا هه‌ماهه‌نگی و چاڤدێری یا ئۆپۆزسیۆنی دكه‌ت كو پڕ مژاره‌كا گرنگه‌ و تنێ ب هه‌ماهه‌نگیا سه‌رانسه‌ری دشێت بدروستی پێك بهێت. دانپێدده‌ت كو ئازادی ب چ ره‌نگان ل ڤێ هه‌رێمێ نه‌بۆیه‌ و نینه‌ و داخوازا سه‌رژنو بنیادنانا وێ دكه‌ت.
تشتێ هه‌ری گرنگ داخوازا ڤه‌گه‌ڕاندنا كه‌سایه‌تێن بیرورا جودایێن هه‌رێمێ دكه‌ت كو بسالانه‌ هاتینه‌ په‌راوێز خستن و قه‌ده‌غه‌یا ڤه‌گه‌رینا بۆ هه‌رێمێ لسه‌ر وانه‌ ژلاێ ده‌ستهه‌لاتا تاوانبار و گه‌نده‌ل، كو به‌شه‌ك ژ وان كوسان ئه‌ون یێن كه‌سوكارێن وان هاتینه‌ تیرۆركرن ژلاێ ده‌ستهه‌لاتێ یان مافێن وان یێن هه‌بوونی و بیرورا هاتینه‌ بن پێ كرن، هه‌لبه‌ت ل ده‌رڤه‌ی وه‌ڵاتی پترینا نوخبه‌ و كه‌سایه‌تێن خوه‌دی گیانێ به‌رپرسیاری و كه‌سێن وه‌ك كه‌نزه‌كا ده‌رگرتی هاتینه‌ پشتگوھ خستن كو ب ڤه‌گه‌ڕینا ڤان كه‌سان جیهانه‌كا نوی یا سیاسی دهێته‌ چاڤه‌ڕێكرن ل هه‌رێمێ ئاڤا ببیت.

بتوندی ژناڤبرنا تاكڕه‌ویا بنه‌ماڵه‌یی و به‌رژه‌وه‌ندیێن شه‌خسی و حزبی دكه‌ته‌ ئارمانج كو وه‌كه‌ ئه‌گه‌را سه‌ره‌كه‌ یا ژناڤچۆنا بێ باوه‌ریا جڤاكێ پێناسه‌ دكه‌ت. ڕه‌خنا هه‌ری گرنگ لسه‌ر ڤان هێزێن ئۆپزسیۆنی ژی بزمان دئینیت كو ئه‌ڤ نه‌ته‌بایی بونا ئۆپۆزسیۆنێ دبیته‌ ئه‌گه‌را بێ باوه‌ریا ژلاێ هه‌م هێزێن ناڤده‌وله‌تی و هه‌م جڤاكا هه‌رێمێ.

بۆ زانینا هه‌ر كه‌س و لایه‌نه‌كێ سه‌رانێن سه‌رێ ڕه‌ش ژ هه‌ر كه‌س و لایه‌نه‌كێ زێده‌تر ترس و وه‌هما وان به‌رامبه‌ر پسمام و كه‌سوكارێن خوه‌ یێن یاخی یه‌، وه‌كه‌ پێڤاژۆیا ده‌ربازبویی كو ب نێزیكاتیێن مه‌سعود بارزانی و مالباتا خوه‌ دگه‌ل ڤان كه‌سوكارێن خوه‌ ئه‌ڤ ڕاستیه‌ كه‌ته‌ به‌رچاڤێ رایا گشتی. ئه‌ڤ ناكۆكیه‌ ژی مێژویا وێ ڤه‌دگه‌ڕیته‌ قرنه‌كێ كو پێدڤیه‌ پێداچۆنه‌كا باش ژ لاێ هه‌ركه‌سه‌كێ لسه‌ر بهێته‌ كرن.

د لۆتكێ دا كه‌ساتیا ئه‌یوب بارزانی براستی كو ل قوناغا 40 ساڵاندا لگۆری شیانێن خوه‌ پێنگاڤێن وی هێژایی گرنگیدانێ یه‌ كو وه‌كه‌ چرایه‌كا گه‌ش یا ڕۆناك كرنا وێ مێژوویا لێل و مژه‌وی یا مالا مه‌سعود بارزانی ڤه‌هاندی، مه‌ پڕ سود ژ ده‌ربڕین و دارشتنێن وی یێن مێژوویی گرتینه‌ كو هه‌كه‌ ئه‌و نه‌با دا گه‌له‌ك ڕاستیێن دیرۆكی ده‌رگرتی مینن.

پێدڤیه‌ گرنگی ب ڤێ ته‌خا یاخی یا ژبیرچۆیی بهێته‌ دان و ژ هه‌ر ئالیه‌كێ بێ دوودلی پشتگیریا هه‌لویستێ وان بكه‌ین، بتایبه‌ت هه‌لویستێ كاك ئه‌یوب و كاك ئه‌دهه‌م كو د ڤێ قۆناغا هه‌ستیار دا بڕیار دایه‌ خوه‌دیێ پێنگاڤێن ڕژد بین.