میمیر کریستیانسۆن  سیاسەتمەدارێکی نۆرویژی، ڕۆژنامەوان و نوسەرە. ئەو وەک نوێنەرێکی گۆڕانکاریی پارتە چەپەکان، بەتایبەتی پارتە ڕۆت، لە پارلەماندا کار دەکات و لەم گفتوگۆیە دا وەلامی پرسیارەکانی هاوکارمان کاک رامین دەداتەوە.

🟠 پرسیار:  ئاگادار کراوین کر ئێوە شێروان شێروانیتان بۆ وەرگرتنی خەڵاتی نۆبێل بەربژێر کردووە. پێم خۆش بوو بزانم چی وایکرد کە بە تایبەت شێروان شێروانی بۆ خەڵاتی ئاشتیی ئەم ساڵ بەربژێر بکەن؟

🔴 وەلام:  پێم وایە کاتی ئەوە هاتووە کوردستان خەڵاتی ئاشتی بباتەوە. ساڵانێکی دوور و درێژە کە کوردەکان بۆ سەربەخۆیی، ئازادی و دادپەروەری خەبات دەکەن - لە دژی دیکتاتۆرە داپڵۆسێنەرەکان و شەڕخوازەکانی چەندین وڵات.

شێروان شێروانی، وێڕای ئەو خەباتە، لە دژی گەندەڵی و کۆنتڕۆلی نێوخۆیی لە کوردستانیش ڕاوەستاوە. لەم ساڵانەی دواییدا هێڕش بۆ سەر ڕۆژنامەوانەکان لە هەموو جیهاندا زیادی کردووە، بۆیە کاتی ئەوە هاتووە کە بە خەڵاتی نۆبێل ڕێز لە ڕۆژنامەوانێکی کورد بگیرێ.

🟠 پرسیار : ئایا ئەم بەربژێرکڕدنە چ واتایەکی بۆ شێروان و باقی گیراور سیاسییەکانی کوردستان و ڕۆژهەڵاتی نێوەڕاست هەبێ؟

🔴 وەلام : هیوادارم هیوایەکیان پێ ببەخشێ، هەر وەها پشتیوانی و هاوڕاییەکی نێونەتەوەیشی بەدواوە بێ. لە ژێر سێبەری ئەو قەیرانە پڕ لە نەهامەتییەی کە لە غەززە و ئوکراینا هەیە، پێشێل کارییەکانی مافی مرۆڤ و زەخت و گوشارە زۆر وڵاتی دیکەش بەردەوامن، کوردستانی عێراقیش یەکێک لەو شوێنانەیە

🟠 پرسیار : شێروانی بە هۆی کارەکانییەوە وەکوو ڕۆژنامەوان گیراوە. ئەم کەیسە چمان بۆ دەسەلمێنێ سەبارەت بە ئازادیی ڕادەربڕین و ڕەوشی مافی مرۆڤ بە گشتی لەو ناوچەیەدا؟

🔴 وەلام: گیرانی شێروان شێروانی بە ڕوونی دەریدەخا کە ئازادیی ڕادەربڕین لە کوردستان بوونی نیە. ئەوە کێشەیەکی جیدییە، تەنانەت لە ڕوانگەی ئاشتیشەوە. بە بێ هەبوونی مێدیای ئازاد و ڕەخنەگر، کاربەدەستانی گەندەڵ هەر چیان پێ خۆش بێ بە سەر گەلەکەیان دێنن

🟠 پرسیار : پێت وایە دەبێ نەرویج بە چ شێوەیەک کار بۆ کەیسی شێروان و خەبات بۆ ئازادیی ڕادەربڕین لە ئاستی نێونەتەوەییدا بکا؟

🔴 وەلام:  نەرویج دەبێ لە هەموو جیهان پشتیوانی لە ئازادیی ڕادەربڕین و مافەکانی مرۆڤ بکا. کاربەدەستانی نەرویج دەبێ لەو ڕوانگەیەوە لە گەڵ بەرپرسانی کوردستانی عێراق بکەونە وتووێژەوە تا لەو ڕێگایەوە یارمەتیدەر بن تا شێروان ئازاد بکرێ

🟠 پرسیار : ڕاتان سەبارەت بەو تێڕوانینە چییە کە دەڵێ خەڵاتی ئاشتیی نۆبێل دەبێ بدرێ بەو ئەکتەرە ناونەتەوەییانە کە ناسراون و جێکەوتوون؟

🔴 وەلام : زۆر باشترە کە خەڵاتی ئاشتیی نوبێل بدرێ بە ڕۆژنامەوانێکی بوێر و چالاکڤانێکی دێمۆکراسی لە کوردستان تا بچێ بۆ سەرۆک کۆمارێکی ئامریکا یا بچێ بۆ یەکیەتیی ئەوڕووپا. خەڵاتی نۆبێل بۆ ڕێزگرتن لەو کەسانە نیە کە دەسەڵاتیان هەیە، بەڵکوو بۆ پشتیوانی لەو کەسانەیە کە بۆ ئازادی لە دژی دەسەڵات تێدەکۆشن.