تۆڕی پاراستنی تەندروستی گشتی چەند رۆژێک پێش ئێستا داوای رونکردنەوەی لە وەزیری تەندروستی کرد دەربارەی بڕوانامەکەی. لە ڕاگەیاندراوێکە تۆرەکەمان پرسیاری خستە سەر یاسایی بونی بڕوانامەکەی وەزیر. هەر لەم بارەوە گومانەکانمان خستە ڕوو لەسەر ئەوەی کە وەزیری تەندروستی بەدەر لە ڕێنماییەکان لە کاتی دەوامی فەرمی وەکو بەڕێوەبەری تەندروستی هەولێر هاوکات خوێندنی دکتۆرایشی کردوە.

ئێمە چاوەڕوانی ئەوە بوین کە جەنابی وەزیر بفەرمێ بە بڵاوکردنەوەی ڕونکردنەوە لەسەر ئەو بابەتە. بەڵام وەکو هەمیشە، دەسەڵاتدارانی هەرێمی کوردستان خۆیان لەسەرو لێپرسینەوە و پرسیار دادەنێین.

بۆیە و بەهۆی ئەوەی وەڵامێکمان لە وەزیر و وەزارەتەکەی دەستنەکەوت، داوا لە دەستەی نەزاهەی هەرێمی کوردستان دەکەین کە لێکۆڵینەوە لەم بابەتە بکەن. هەر لێرەوە دوبارە پرسیارەکانمان دەخەینە ڕوو.

بە گوێرەی ئەو زانیاریانەی کە دەست تۆڕەکەمان کەوتوە، گومان لە کارێکی نایاسایی وەزیری تەندروستی دەکرێت.

زیاد لە سەرچاوەیەک بە تۆڕەکەمانیان راگەیاندوە کە گومان هەیە وەزیری تەندروستی بەدەر لە رێنماییەکان خوێندنی تەواوکردبێ.

هەر بە گوێرەی ئەو سەرچاوانە، د سامان بەرزنجی وەزیری تەندروستی، کاتێک بەڕێوەبەری گشتی تەندروستی هەولێر بوە، هاوکات سەرقاڵی خوێندنی دکتۆراش بوە.

بە بۆچۆنی ئێمە، خوێندنی دکتۆرا ئەگەر بە رێکوپێکی و بێ پێچ و پەنا و ئاسانکاری نازانستی بکرێ ئەوا کاتی تەواوی دەوێت. رەنگە لە هیچ شوێبێکی دنیادا ڕوینەدابێ کە کەسێک لەیەک کاتدا دکتۆرا بکا و بەڕێوەبەری گشتی تەندروستی پارێزگایەکی گەورەی وەکو هەولێر بێت!

هاوکات، ئەوەندەی ئێمە ئاگاداربین، هیچ ڕێنماییەک نیە کە بوار بەم جۆرە لە هەڵسوکەوتە بدات.

بۆیە لێرەوە داوا لە دەستەی نەزاهە دەکەین کە بە زوترین کات لێکۆڵینەوە لەسەر ئەم بابەتە بدات. ئێمەش وەکو تۆڕی پاراستنی تەندروستی گشتی ئامادەی هەمو هاوکارییەکین لەم بارەوە.

تۆڕی پاراستنی تەندروستی گشتی

٢٠٢١/١/١٨