لە یادی ڕاپەریندا، حەزم دەکرد کوڕە موستەشار بومایە!

Saturday, 03.06.2021, 09:54 AM

ئارەزو دەکەم کە من لە بری ئەوەی کوری پیاوێکی تا سەر ئێسقان جەلالی ، کورە موستەشارێک بومایە ، ئیدی دایکم هەرگیز بە ترسەوە چاوی نەکردە خەو ، هیچ کاتێ لە دراوسێ و خەڵکی کۆڵانەکەمان نەدەسڵمیەوە ، براکانم و خۆشم دەبوینە دەستی ڕاست و چەپی باوکم ، لە بری ئەوەی بکرێن بە عەسکەر چەکداری لای باوکی موستەرشارم دەبوین ، براکەم نەدەبوو بە پێشمەرگە ، دایکە کڵۆلەکەم خەمی شارو شاخی نەدەدا بە کۆڵیداو بەشوێن سۆراخی نامەیەکی براکەم ئەم لادێ و ئەولادێی نەدەکرد ، براکانی ترم لەبەر قورسی و جەنگی نەبراوەی قادسیەی صدام فرار نەدەبوون ، شەوان بە ئیسراحەت دەنوستین نەک لەهەر دەنگێکی دەرگا ئێمە ڕاچلەکێێن وەک پشیلەیەکی تۆقیو ، ئیدی منیش بە ئازادی لە کۆڵان و گەرەک بە ئارەزوی خۆم دەگەڕام ، تا دەگەیشتمە قوتابخانە دە کۆڵان و پێچە بەدەورەم نەدەکرد ، هاوپۆلەکانم لێم دەترسان ، مامۆستاکانم لە باوکی موستەشارم سڵیان دەکردەوە و نەیان دەوێرا سەیری ناو چاوم بکەن ، ئەگەر لە دەرسێک دەرنەچوبام یەک مۆڕەی باوکم بەس بوو تا نمرەی باشم بۆ دانێێن ، دایکم و خوشکەکانم هەمیشە چاوبەفرمێسک نەدەبوون گەر ئێوارەیەک برایەکم یان خۆم درەنگمان پێ بچوایە بۆ ماڵەوە ، بەشداری ئەنفاڵمان دەکردوو ، کەلاوەکەی بەرامبەر ماڵمان دەکرد بە مەخزەنی شتی تاڵانکراوی لادێکان ، هەمیشە چەکدار لەبەر ماڵمان دەبوو ، هیچ شتێکمان پێ عەیب و عار نەدەبوو ، لە پێش ڕاپەریندا ، ( ئەندازیارانی ڕاپەرین ) بە رێزەوە نامەیان بۆ باوکی موستەشارم دەنوسی ، کە لوتف بکات و لەگەڵیان بێت ، ئێمەش دەبوین بە پاڵەوان و رزگارکەی نیشتمان ، باوکی موستەشارم لاگەڵ سەرکردەو سەرۆکی حیزبەکان وێنەی دەگیراو ، میوانداری دەکراو میوانداریمان دەکردن ، دەستی رێزیان دەخستە سەر شانی باوکی موستەشارم ، لە کۆنگرەی حیزبدا لە ریزی پێشەوە دادەنیشت ، منیش دەبووم بە کادری پێشکەوتوی حیزب و ڕاگەیاندکارو و خاوەن مەنصەب ، باوک و دایکیشم بە پلەیەکی گەورەی سەربازی خانەنشین دەکران ، خوشکەکانم دەبونە بەرێوەبەری فەرمانگە یان مودیر عام ، دەبوینە بزنز مان و خاوەن کۆمپانیاو ، ئەندام پەرلەمان و وەزیرو ئەندامی سەرکردایەتی حیزب . بە یاسا `قەدەغە دەکرا بڵێن جاش ، چونکە ناویان نان چەکدارەکانی سەر بە رژێم ، لە ساڵیادی ڕاپەریندا باوکی موستەشارم لە تەنیشت سەرکردەکانی شاخەوە دەبوو ، مەدالیای رێزیان دەکرد بە یەخەدا ، نەوەک ئێمەی بەشمەینەت لە هەدوو دنیا ، پڕ بە دڵ ئارەزوم دەکرد باوکم لەبری ئەوەی شەست ساڵ بە تۆخی جەلالی بوایە ، موستەشارو جاش بوایە ، ئارەزوم بوو بریا منیش کورە موستەشار بومایە .

ئەو بابەت و هەواڵانەی کە ناوی نووسەرەکانیان دیار و ئاشکرایە، تەنیا
نووسەرەکەی بەرپرسیارە، نەک تەڤداپرێس

دانا ڕەشید