لاهوڕ جەنگی، سەردەستەی تاقمی خۆفرۆشی ١٦ی ئۆكتۆبەر، لە ڕێگەی تاقمەكەیەوە، سەرپەرشتیی دەیان پاڵاوگەی نایاسایی لە شاری سلێمانی دەكات و بەم هۆیەشەوە خەڵكی ئەو شارە تووشی شێرپەنجە دەكات، دەیان ماڵپەڕ و پەیجی چەواشەكاریش بە داهاتە نایاساییەكەی دادەمەزرێنێت و خەڵكی پێ چەواشە دەكات.

ئەمڕۆ چوارشەممە ١٠ی ئاداری ٢٠٢١، لێنەی سامانە سرووشتییەكانی پەرلەمانی كوردستان لە پرێس كۆنفرانسێكدا هۆشداری لەبارەی ئەو پاڵاوگانە دا كە بە ڕێگەی نایاسایی بەنزین و گازوایل بەرهەم دەهێنن و دەبنە هۆی تێكدانی ژینگە و مەترسی لەسەر گیان و سەلامەتیی خەڵكی دروست دەكەن.

لەمبارەیەوە رێبوار بابكەیی، ئەندامی لێژنەی سامانە سروشتییەكانی پەرلەمانی كوردستان بۆ (باسنیوز) ئاشكرای كرد، ئەو پاڵاوگانەی لە سلێمانیدان، سەرجەمیان نایاسایین و لە ژێر حوكمی لاهوور جەنگیدان.

بەپێی زانیارییەكانی (باسنیوز)، لەوەتەی كۆنگرەی چوارەمی یەكێتی كراوە و لاهوڕ جەنگی لە ڕێگەی هەڵڕشتنی پارە لە لایەك و چاوسووركردنەوە لە ئەندامانی كۆنگرەی حزبەكەی لە لایەكی دیكە، بۆتە هاوسەرۆكی ناشەرعیی یەكێتی، دەیان پاڵاوگەی تازەی نایاسایی لە سلێمانی دامەزراندووە و لە ڕێگەی پیاوەكانی خۆیەوە سەرپەرشتییان دەكات.

لە ماوەی رابردوو عەلی حەمە ساڵح، ئەندامی فراكسیۆنی گۆڕان لە پەرلەمانی كوردستان رای گەیاندبوو كە دەیان گۆڕەپانی دروستكردنی بەنزین و گازوایل لە ناوچەی تانجەڕۆی سلێمانی هەن، لە هیچ دامەزراوەیەكدا مۆڵەتیان نییە، سووتەمەنی لە ئێرانەوە دێنن و لەگەڵ ماددەی تر تێكەڵی دەكەن، دەبێت بە هۆی تووشبوونی خەڵك بە شێرپەنجە، تەنانەت ”بە ئارەزووی خۆیان شت لە بەنزین دەكەن“.

لەمبارەیەوە شیرین عەبدولڕەحمان دینۆ، ئەندامی پێشووی فراكسیۆنی پارتی لە پەرلەمانی عێراق بە (باسنیوز)ی راگەیاند، لاهوڕ جەنگی نەك لە ڕابردوودا هیچی بۆ خەڵكی كوردستان نەكردووە، بەڵكوو هەر ڕۆژەی بە شێوەیەك زیان بە خەڵكی دەگەیەنێت.

باسیشی لەوە كرد كە ئەوەی وایكردووە بابەتی پاڵاوگە نایاساییەكان نەبێتە پرسێكی گەورەی میدیایی، ئەوەیە كە لاهوڕ جەنگی پارەیەكی زۆری خیانەت و قاچاخچێتی و مافیاگەری دەست دەكەوێت و بەشێكی بە میدیا و پەیجە چەواشەكارەكانی سنوورەكەی دەدات، ئەوانیش بە هەموو شێوەیەك كار دەكەن تاوەكوو سەرنجی ڕای گشتی لەسەر ئەم بابەتە لابدەن.