ئەنجومەنی سەرتاسەری مامۆستایانی ناڕازیی، سەبارەت بە بڕیاری دادگای پیاداچونەوەی هەولێر و سەپاندنی بڕیاری زیندانیکردنیان بە شەش ساڵ بە ستەمکارانە و زاڵم دەناسێنێت و داوای هەڵوەشانەوەی ئەو بڕیارە ناڕەوایە و ئازادکردنی زیندانیانی داگایی نەکراوی بادینان دەکات. داگا و دەسەڵاتداران ئاگاداردەکاتەوە کە کاردانەوەیان دەبێت و یەکەم ڕۆژی جەژن دەکەن ڕۆژی خۆپێشاندان و چونە سەر شەقام

دەقی بەیاننامەکە

وەک هەمووان ئاگادارن دادگای تەمیز بڕیارێکی ستەمکارانەی دەرحەق بەدەستگیرکراوانی بادینان پەسەندکرد، خراپترین و زاڵمترینی کاربەدەستەکان لە کاتی نزیک بوونەوەی جەژن و بۆنەکان بڕیاری لێبوردن بۆ تاوانباران دەردەکەن، بەو بڕیارەیان بەرامبەر بە ژمارەیەک مرۆڤی بێتاوان ، دەسەڵاتداران سەلماندیان لە زاڵمترینی  سیستەمی حکومڕانی سەرزەوی خراپترن،

بۆیە لەم ڕوانگەیەوە داوادەكەین

١ـ بڕیاری ستەمکارانەی دادگای تەمیز دەرحەق بە دەستگیراوانی بادینان هەڵبەوەشێتەوە و دەستگیرکراوان ئازاد بکرێن .

٢- داواکارین ئەو دەستگیرکراوانەی دادگایی نەکراون، لەگەڵ مامۆستا بەدەل بەرواری  ،پێش جەژنی ڕەمەزانی پیرۆز ئازاد بکرێن ئەگەر بە کەفالەتیش بێت بۆ ئەوەی جەژن لەناو ماڵ و منداڵیاندا بکەن .

لە کۆتاییدا ڕای دەگەیەنین

لە ئەگەری جێ بەجێ نەکردنی داواکارییەکانمان و ئازاد نەکردنی دەستگیرکراوان، ئێمەش یەکەم ڕۆژی جەژن کاتژمێر ١٠ی سەرلەبەیانی لە سەرجەم شارو شارۆچکەکان لەسەر شەقام دەبین .

        ئەنجومەنی سەرتاسەری مامۆستایانی ناڕازی

              ٦ /٥ / ٢٠٢١