مەریوان قەرەنی

رۆژی ١٦ی ئاب، یۆبیلی ئەڵماسە بەنرخەكەی گەلی كوردە، حەفتاوپێنجەمین ساڵڕۆژی لەدایكبوونی سەرۆك و رێبەرمان مەسعود بارزانی و دامەزراندنی پارتی دیموكراتی كوردستانە.

ئەو سەرۆكەی هەموانی فێر كرد بەرامبەر دڕندەترین دوژمن خۆ نەچەمێنین و لە ناخۆشترین چركەساتەكاندا سەرمان بەرز بكەینەوە و پڕ بە دەنگمان هاوار بكەین: ”ئێمە كوردین و بەزین لە فەرهەنگماندا نییە“.

سەرۆك بارزانی كە پەنجا ساڵە پێشمەرگەی ئەم كوردستانەیە، جگە لە ناوخۆی كوردستان و پشتیوانیی خەڵكی خۆڕاگر، لە ئاستی هەرێمی و نێودەوڵەتیيشدا خاوەن پێگەیەكی باڵایە و هەموو وڵاتانی دونیا، كاتێك بیر لە ڕۆژهەڵاتی ناوەڕاست و هاوكێشەكانی دەكەنەوە، ناتوانن چاوپۆشی لە بوونی سەركردەیەكی كارێزمای وەك سەرۆك بارزانی بكەن. ئەو سەرۆكەی سەدان شانازیی بۆ گەلی كوردستان تۆمار كردووە كە شایستەی ئەوەیە ئێمە بە رابەر و تاكە مەرجەعی خۆمانی بزانین و شانازیشی پێوە بكەین.

لەم ڕۆژەدا شایانی ئەوەین شانازی بە بوونی سەرۆكێكی خاوەن ئیرادە و خۆڕاگر و قاڵبوو لە خەبات و ئەزموونی سیاسییدا بكەین، دڵخۆش بین بەوەی سەرۆكێكمان هەیە، خەمی گەورە و هەرە لەپێشینەی، هێنانەدیی خەونە مەزنەكانی نەتەوەیەكە، سەرۆكێك كە مانای كۆڵدان نازانێت و هەمیشە وەبیرمان دێنێتەوە كە ئێمە كورد و كوردستانیین و ئامانجێكی باڵامان هەیە دەبێ كار و خەباتی بۆ بكەین، سەرۆكێك كە تۆوی هیوا و ئومێدمان تێدا دەچێنێت و لانی كەم گەلانی ئەم ناوچەیە ئیرەییمان پێدەبەن كە رابەرێكی وەهامان هەیە.

بەڵێن دووپات دەكەینەوە كە هەمیشە پێشمەرگەی بەئەمەكی ئەم كوردستانە دەبین و سینگمان قەڵغان دەبێت بەرامبەر بە دوژمنانی ئەم وڵاتە و لە ناوخۆشدا هەرچەندە بۆمان بكرێت، لە خزمەتكردن و پێشخستنی هەرێمەكەمان درێغی ناكەین.